भांगरभूंय | प्रतिनिधी
दिवचलः बोड्डें – दिवचल वाठारांत फाटल्या कांय दिसांनी डेंग्यूच्या संसर्गाक लागून लोकां मदीं भंय पातळ्ळा. हे फाटभुंयेर वॉर्डाची नगरसेविका रंजना वायंगणकार हांणी दिवचल भलायकी केंद्राक सुचोवणी दिल्ली. ते प्रमाण भलायकी अधिकारी डॉ. सिध्दी कासार हांच्या मार्गदर्शना खाला शेनवारा ह्या वाठारांतल्या लोकांची मुळावी तपासणी केली तेन्ना 10 जाणांक डेंग्यूची लागण जाल्ल्याचें स्पश्ट जालें.
बोड्डें विभागांत डेंग्यूचे 10 दुबावीत दुयेंती मेळ्ळे उपरांत भलायकी खात्याच्या पंगडान शेनवारा वाठारांत जळारा मरपी वखदांचो फवारो मारलो. तशेंच नितळसाण मोहीम सुरू केली. डेंगूचो आनीक प्रसार जावचो न्हय हे खातीर थंयच्या लोकांक म्हत्वाच्यो सुचोवण्यो दिल्यात.
वेगवेगळ्या सुवातींनी घाणयारें उदकाचीं गटारां उक्तीं आसात. तातूंत जळारां आशिल्ल्याचें पंगडाक दिसलें. आपल्या वाठारांत घाणयाऱ्या उदकाचो सांठो जावचो ना हाची जतनाय घेवपाची सुचोवणी भलायकी अधिकाऱ्यांनी लोकांक दिली. मेळिल्ल्या दुयेंतींचेर मुळावे उपचार सुरू केल्यात. हेरांक तीन दिसां परस चड जोर आसल्यार तांणी बेगोबेग फुडली चांचणी करची, असो उलो भलायकी अधिकारी डॉ. कासार हांणी मारलो.
मजगतीं, आमदार डॉ. चंद्रकांत शेट्ये हांणी हे विशीं दखल घेवन भलायकी खात्याक फावो ती सगली जतनाय घेवपाची सुचोवणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
