भांगरभूंय | प्रतिनिधी
मडगांवः नुव्यां बंद सिग्नलाक लागून अपघातांनी वाड जावपाक लागल्यात. हाचे आदीं हे सुवातेर जाल्ल्या एका अपघातांत स्कुटर चालकाचे पांय मोडिल्ले. हे घडणुके उपरांत शेनवारा सकाळीं परतून एक फावट वेगान वचपी मोटारीन रिक्शाक धपको दिलो. तातूंत रिक्शा चालक जखमी जाल्ल्यान ताका उपचारा खातीर दक्षीण गोंय जिल्हो हॉस्पिटलांत दाखल केलो.
मेळिल्ले म्हायती प्रमाण, नावेलीचो राजाराम मयेंकार शेनवारा सकाळीं आल्टो मोटारींतल्यान वतालो. ताची गाडी नुवेंच्या राजी मोटर्स लागसार जंक्शनाचेर पावली तेन्ना सिग्नल बंद आशिल्ल्यान रस्त्यार येवपी रिक्शेचो ताका अदमास येवंक ना. ह्याच सिग्नलाचेर मडगांव गांधी मार्केटांतलो रिक्शा चलोवपी अब्दुल हांचे रिक्शेक मोटारीन धपको दिलो. तातूंत रिक्शा सुमार 10 ते 20 मिटर मेरेन फरफटत गेली.
ह्या अपघातांत रिक्शाचें लुकसाण जालें आनी रिक्शा चालक अब्दुल हांचे तकलेक घावो जालो. तांकां बेगोबेग उपचारा खातीर दक्षीण गोंय जिल्हो हॉस्पिटलांत दाखल केलो. नुव्यां हायवे वयले सगळे सिग्नल बंद आशिल्ल्यान रस्तो हुंपपी, रस्त्यार चलपी वा हेर गाडयांच्या चालकांक अदमास येना. हाका लागून ह्या वाठारांत अपघात वाडत आसात. हाचे आदीं स्कॉर्पिओ गाडयेन दोन दुचाकींक धपको दिल्ल्यान एका चालकाचे पांय फ्रॅक्चर जाल्ले. हे खेपे आदलो आमदार विल्फ्रेड डिसा हांणी जनआंदोलनाची शिटकावणी दिल्या. आतां तरी ह्या अपघाता उपरांत सिग्नल सुरू करचें, अशी मागणी थळाव्या लोकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
