कोन्सुआ चौकांत येरादारी सिग्नलाची खर गरज

भांगरभूंय | प्रतिनिधी

आंतोनियो वासः मुख्यमंत्र्यां कडेन चर्चा करपाचें उतर

भांगरभूंय । प्रतिनिधी

वास्कोः कुठ्ठाळी मतदारसंघांत कोन्सुआ चौकांत येरादारी सिग्नलाची खर गरज आसा. ते संबंदांत आपूण यत्न करतलों. हो चौक रस्तो हुपप्यां खातीर आनी वोल्त घेवपी वाहन चालकां खातीर घातक थारला. ताका लागून वाहन चालक, रस्त्या वयल्यान चलप्यांनी योग्य ती जतनाय घेवन रस्तो हुपचो, अशें कुठ्ठाळीचे आमदार आंतोनियो वास हांणी मागलां. हे सुवातेर येरादारी नियंत्रणा खातीर येरादारी पुलीस विभागा कडेन फावोशे कर्मचारी नात. ताका लागून आपूण हे संबंदांत मुख्यमंत्री डॉ. प्रमोद सावंत हांचे कडेन चर्चा करतलों, अशेंय तांणी सांगलें.

कोन्सुआ चौकांत शुक्रारा सकाळीं एका अपघातांत वेळसांवच्या फ्रान्सीस डिसिल्वा (60) हाका सुवातेचेरूच मरण आयिल्ल्या ह्या चौकांतली येरादारी वेवस्था चर्चेंत आयल्या. ह्या अपघाता संबंदांत थळाव्या लोकांनी तिडक उक्तायिल्ली. थंय स्पीडब्रेकर वा येरादारी सिग्नल उबारचे खातीर आपूण फाटल्या कितल्याश्याच वर्सां सावन मागणी करता. पूण अजून मागणेची दखल घेनात, असो दावो थळाव्या लोकांनी केल्लो. ह्या प्रकरणांत दखल घेवन आमदार वास हांणी संबंदीत अधिकाऱ्यांची शेनवारा सकाळीं आपल्या कार्यालयांत बसका आपयिल्ली. ते उपरांत तांणी कोन्सुआ चौकांत वचून पळोवणी केली. ह्या वेळार तांचे वांगडा कुठ्ठाळीची सरपंच सानिया परेरा, वेळसांवचे आदले पंच रोकोझीन डिसोझा, येरादारी पुलीस निरिक्षक शैलेश नार्वेंकार आनी हेर अधिकारी हाजीर आशिल्ले.

सध्या कोन्सुआ चौकांत रम्बरल्स घालपाचें आस्वासन येरादारी पुलिसांनी दिल्ल्याचें आमदार वास हांणी सांगलें. अवजड गाडयो रस्त्या कुशीक पार्क करच्यो न्हय, अशें आमदारान मागलां. तशेंच अवजड वाहनां रस्त्या कुशीक पार्क करचीं न्हय हे खातीर जतनाय घेवपाक आमदारान पुलिशेक सांगलां.

कोन्सुआ चौकांत रम्बलर्स घालपाचे यत्न करतले. वाहन चालकांनी गतीन गाडयो चलोवच्यो न्हय. गती संबदांतले नेम पाळात. रस्तो हुपतना रावात, पळयात आनी उपरांतूच मुखार सरात, असो उलो शैलेश नार्वेकार हांणी मारला. सरपंच सानिया परेरा हांणी थंय वेगमर्यादा पाळपाची गरज आशिल्ल्याचें सांगलें. थंय येरादारी नियंत्रणा खातीर येरादारी पुलिसाची नेमणूक करची, अशीय तांणी मागणी केल्या.