‘कॅपिटल’ अक्षरांनी प्रिस्क्रिप्शन बरयात, ‘झिग- झॅग’ नाका : ओडिशा हायकोर्ट
भांगरभूंय | प्रतिनिधी
भुवनेश्वर, खबरां संस्था ः दोतोराचें प्रिस्क्रिप्शन वाचतना तांणी बरयल्लें आमकां कळना. आनी मागीर वखदां घेवपाच्या वेळार आमकां आडखळी येवं शकता. फार्मासकार सोडल्यार दोतोरांनी कितें बरयलां तें कोणाक वाचपाक कळना. आतां ओडिशांतल्या सगळ्या दोतोरांक आनी खाजगी हॉस्पिटलांक प्रिस्क्रिप्शन बरयतना कॅपिटल अक्षरांनी बरोवचें पडटलें अशी सुचोवणी ओडिशा उच्च न्यायालयान एका म्हत्वाच्या निर्णयांत दोतोरांक दिल्या. ओडिशा उच्च न्यायालयान ‘झिग-झॅग’ बरोवप बंद करपाचो आदेश दोतोरांक दिला.
डेंकनाल जिल्ह्यांतल्या हिंडोलच्या रासानंद भोई हाचो व्हडलो पूत सौवाग्या रंजन भोई हाका सोरपान घांस मारलो आनी मरण आयले. ताच्या पुताच्या मरणा उपरांत तांणी दाखल केल्ली याचिकेचे सुनावणी उपरांत उच्च न्यायालयान हो आदेश दिला.
आतां दोतोरांक स्पश्ट आनी वाचपा सारक्या वा कॅपिटल अक्षरांनी प्रिस्क्रिप्शन बरोवचें पडटलें. आतां राज्यांतल्या सगल्या दोतोरांक, खाजगी हॉस्पिटलांनी आनी वैजकी केंद्रांक सगळ्यो वखदां, पोस्टमार्टम अहवाल आनी वैजकी-कायदेशीर कागदपत्रां स्पश्ट आनी वाचपा सारक्या तशेंच कॅपिटल अक्षरांनी बरोवपाचें आदेश दिल्यात. ह्या आदेशाची प्रत सगल्या वैजकी केंद्रांक, खाजगी हॉस्पिटलांनी आनी वैजकी म्हाविद्यालयांक धाडपाक न्यायाधीश एसके पाणिग्रही हांणी सांगलां.
‘झिग-झॅग’ बंद करात
उच्च न्यायालयान म्हणलें, “बऱ्याच प्रकरणांनी दोतोरांनी बरयल्लो पोस्टमार्टम अहवाल वा वखदांचे प्रिस्क्रिप्शन समजून घेवपाक अडचणी येतात. न्यायालयाक लेगीत अशे वैजकी कागदपत्र वाचपाक कठीण जाता.” देखून दोतोरांनी झीग-झॅग बरोवप बंद करचें आनी निवळ तशेंच कॅपिटल अक्षरांनी बरोवचें. उच्च न्यायालयाच्या ह्या नव्या आदेशाक लागून भलायकी क्षेत्रांत सुदारणा जातली अशी अपेक्षा आसा. तशेंच दस्तावेज वाचपाक आनी समजूंक सोंपें जातलें, जाका लागून गैरसमज आनी चुको जावपाची शक्यताय उणी जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
