भांगरभूंय | प्रतिनिधी
जानेवारी म्हयनो उजवाडलो की सगल्यांक मकर संक्रातीची उत्सुकताय लागता. मकर संक्रात ही हिंदू धर्मांतली सगल्यांत म्हत्वाची परब मानतात. मकर संक्राती निमतान पतंगोत्सव मनोवपाची परंपरा भारतांत खूब पोरणी आसा. रंगीबेरंगी पतंग मळबांत हुबोवन हो उत्सव मनयतात. ल्हान पिरायेच्या भुरग्या सावन ते जाण्टे पिराये मेरेन सगलेच जाण पतंग हुबोवपाचो आनंद ह्या निमतान घेत आसतात. पूण हालीं हो खेळ जिवघेणो थारत आसा. गोंयांत पतंग हुबोवपाची परंपरा ना. पूण चडशे गोंयांत राबितो केल्ले गुजराती लोक पतंग हुबोवपाचो आनंद घेतात. गोंयांतली मकर संक्रात म्हणल्यार हळडीकुकमाची परंपरा. सवायशिणी बायलां वायन वांटून ही परब मनयतात. पणजेंतल्या मिरामार दर्यावेळेर पतंग हुबोवपाची कार्यावळ जातात. हे कार्यावळींत गुजाराती भावा बरोबर गोंयकारूय व्हड संख्येन वांटो घेतात. ही एक खोसदिनी गजाल.
पतंग हुबोवपा खातीर पयली सादें सूत वापरताले. पूण कांय वर्सां सावन पतंग हुबोवपा खातीर चीनी वा नायलॉन मांजाचो वापर करतात, आनी होच नायलॉन मांजो आतां जिवघेणो थारत आसा. दुचाकी वेल्यान वतना नायलॉन मांजान गळो चिरून एका पुलीस हवालदाराक मरण आयिल्ल्याची बातमी हालींच वाचपाक मेळ्ळी. हाचो अर्थ नायलॉन मांजान गळो चिरून निश्पाप नागरिकाक मरण आयिल्ल्याची ही पयलीच बातमी न्हय. दर वर्सा अशो खूबश्यो खबरो दिसाळ्यांतल्यान वाचूंक मेळटात. महाराष्ट्रांतले खबरे प्रमाण पुणें जिल्ह्यांतल्या दौंड म्हालांत लेगीत फाटल्या वर्सा अशेच तरेन एका दुचाकी स्वाराक मरण आयिल्लें. दोन वर्सां पयलीं पुण्यां एके तरणाटेक लेगीत अशेच तरेन दुर्दैवी मरण आयिल्लें. फक्त पुणेंच न्हय जाल्यार नाशिकांत लेगीत अशीच घडणूक घडिल्ली. तातूंत लेगीत एके बायलेक नायलॉन मांजान गळो चिरून दुर्दैवी मरण आयिल्लें. अर्थांत ही प्रातिनिधीक उदाहरणां आसात. अशे तरेन नायलॉन मांजान कितल्याशाच निश्पाप लोकांक आपलो जीव व्हगडावचो पडला. ह्या मांजात आडकून सुकणीं लेगीत जखमी जातात जाल्यार कांय जाणांक मरण येता.
चीनी बनावटीचो हो मांजो नायलॉन धागो, कवचेचो चुरो, लोखंडाचे कण आनी रसायनीक पदार्थां सावन तयार करतात. हो मांजो मनशां बरोबर सुकणीं आनी प्राण्यां खातीर लेगीत घातक आसा.
वास्तवीक नायलॉन मांजाचे खरेदी विक्रीचेर बंदी घालपाचे आनी वापरा विशीं प्रतिबंधात्मक उपाय येवजण करपाचे निर्देश सरकारान दिल्यात. मांजाक लागून प्राणी, सुकण्यांक जावपी दुखापती विशीं पर्यावरण रान आनी जलवायू परितर्वन मंत्रालयान राज्य सरकारांक पत्रां धाडिल्लीं. नायलॉन मांजाक लागून रानजीव (संरक्षण) अधिनेम 1972 च्या अनुसुचीतल्या रानजीव आनी सुकण्यांक मरण आयल्यार वा तांकां दुखापत जाल्यार रान कायद्याच्या कलम 9 खाला खर कारवाय करपाचे निर्देश दिल्ले. ताका लागून नायलॉन मांजाचे विक्रीचेर बंदी घाल्ली आसतनाय हो मांजा दुकानांत सर्रास विकतात. तरी लेगीत विक्रेत्यांचेर कारवाय जातना दिसून येना.
कांय कडेन सरकारान खर कारवाय केल्ल्याच्यो खबरो वाचूंक मेळ्ळ्यो. ही समाधानाची गजाल आसली तरी कारवायेंत सातत्य ना. जो मांजा दुकानांत विकपा खातीर येता, तोच मांजा प्रशासनाक कसो मेळना? आनीक कितले बळी गेले उपरांत प्रशासनाक जाग येतली? प्रशासनान नायलॉन मांजा आड खर मोहीम राबोवंक जाय. नायलॉन मांजा विकपी आनी खरेदी करपी अशा दोगांचेरूय कारवाय जावंक जाय. नागरिकांनी लेगीत नायलॉन मांजान पतंग हुबोवपा बदला साद्या सुताचो वापर करून पतंग हुबोवचो आनी मकर संक्रातीची परब मनोवची.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
