भांगरभूंय | प्रतिनिधी
देशांतलो सगल्यांत चड लांबायेचो दर्या वयलो सेतू महाराष्ट्राच्या राजधानीत जाला. गोंया उपरांत देशांत दुसरो अटल सेतू मुंबय प्री
कास्ट काँक्रीट पद्धतीन बांदला. मुंबयत जावपी येरादारीची कोंयडी कमी करपाक हो पूल उपेगाचो अशें महाराष्ट्र सरकारान सांगलां. स दसकां आदीं ह्या सेतूची येवजण जाल्ली. साबार आराखडे, टेंडरांनी घुस्पल्ल्या ह्या पुलाचो वावर नवी मुंबई स्मार्ट सीटी खाला येता. येरादारी एखाद्री पांच पटींनी वाडटली. आदले मुख्यमंत्री मनोहर पर्रीकार हे गोंयांतल्या सेतुचीं गणितां मांडटना आपल्या घराब्यांतलो राजकी उत्तराधिकारी घडोवपाक विसरले. राजकारण दिसानदीस विस्कळीत जाता हें तांकां होल्मल्ले आसतलें. विस्कटिल्ल्या राजकारणांत, उच्च शिक्षण घेतिल्ले, कायदे, अधिकारांची जाणविकाय आशिल्ले अधिकारी, शिक्षण उणें आशिल्ले राजकारणी घुस्मट्टात. पणजेचे आदले आमदार आनी पयलींच्या मुखेलकार्यकारी अधिकाऱ्यां परस स्मार्ट सीटी पणजी फाटलीं दोन वर्सा घुस्मटल्या. कित्याक?
गोंयच्या राजधानीचें रुप बदलता, त्या वावराक वीस वर्सा आदीं आरंभ जाल्लो. बदल जातना पणजेंतल्या मांडवी न्हंयेच्या ल्हारांची, वाऱ्याची, सरभोंवतणची दिका बदल्ल्या? विज्ञानीक नदरेंतल्यान अभ्यास जावपाक जाय.
पर्वरे सचिवालयांत बसून सचीव म्हणून चार खातीं सांबाळटना पणजी स्मार्ट सीटीच्या वावराचेर अधिकारी दीसपट्टे नदर दवरूंक शकनात हें सत लिपून उरूंक ना. स्मार्ट सीटीचे येवजणेची बांदावळ करपाक पणजी म्हापालिका आयुक्त म्हणून आयचे सरकारी सचीव संजीत राॅड्रिग्ज हेवूय घुस्पल्ले. इमेजीन पणजी कंपनीचे पयलींचे मुखेल कार्यकारी अधिकारी स्वयंदिप्त राय चौधरी हांचे बराबरीन तांणीय कामां करून घेतल्यांत. तेन्नाची तांची पिराय, वावर करपाची गती आयज आसा? पणजीचे आमदार मंत्री बाबूश मोंसेरात हांचें आनी तांचें वांकडेपण कालय आशिल्लें, आतांय आसा. हालींच जाल्ले बसकेंत मुख्यमंत्री डाॅ. प्रमोद सावंत हांणी बाबूश स्मार्ट सीटीच्या वावराचेर लक्ष दवरतले अशें सांगलां. स्मार्ट सीटी, इमेजीन पणजी, म्हापालिका कायदो कितें सांगता? ते अधिकार कोणाक आसात? नगरपालिका खात्या खाला म्हापालिका येना? नगरविकास मंत्री स्मार्ट सीटी प्रक्रियेंत ना?
पणजे कडेन आदल्या आमदारांनी आपलेपणान पळयलें तें त्या मतदारसंघातल्यान चड वेळा वेंचून आयिल्ले म्हणून. 1994 ते 2024 मजगतीं पणजेतलीं समाजीक समिकरणां बदलल्यांत. तीन दसकांनी पणजेन कितें मेळयलें, व्हगडायलें हो विशय भासाभासेचोच. तेपरस आसा ती पणजी सांबाळपाक स्मार्ट देखरेख यंत्रणा गरजेची. पणजी म्हापालिका, स्मार्ट जातना ताळगांव, सांताक्रुज मतदारसंघ पणजेक लागीं आयले. स्मार्ट सीटीच्या वावरांतल्यान ताळगांवां वचपाक वेगळ्यो वाटो जाल्यात, फाटलीं दोन वर्सां त्याय वावराक नेट आयला.
उजो पालोवपी दळाचें नवें कार्यालय, नव्या रुपांतले कांय वर्सां फाटीं कोयराच्या राशींनी भरिल्लें कांपाल परेड मैदान, शारांतले कांय रस्ते, वीज आनी उदका पुरवण जाल्लें सुदारप न्हयकारपाक जायना. आत्र्या पयऱ्यान एका फाटल्यान एक फेस्तां पणजेच कित्याक जातात ? त्या फेस्तांतल्यान पणजेक, म्हापालिकेक येणावळ मेळटा? जापो सोदून काडत विरोधी वांगडी विधानसभेंतल्या प्रस्नांतल्यान. पणजेंतली येरादारी कोंयडी फोडपा पासत दोना पावल वास्को, वास्को कळूंगट, तेरेखोल पूल जायत?
आदले मुख्यमंत्री मनोहर पर्रीकार फक्त पणजेचेच न्हय जाल्यार मुख्यमंत्री ह्या नात्यान ते गोंयचे, संरक्षण मंत्री म्हणून देशाचे आशिल्ले. तांकां पद्मभूषण फावो जालें, तांचें नांव देश, राज्यांतल्या कितल्याशाच प्रकल्पांक मेळ्ळें तें तांच्या राजकारणांतल्या कर्तुपा पासत. बाबूश हांकां वेंचून हाडपाक, तांची प्रतिमा सुदारपाक, तांकां मानाचें पान मेळोवन दिवपाक पणजेच्या आदल्या आमदारांचो, भाजपाचोय व्हड वांटो आसा.
एका फाटल्यान एक पक्षांतरां, सत्तांतरां गोंयांत जालीं ती निवळ करपाची मोख दवरून म. गो. पक्षाच्या आधारान भाजपाचे भाऊ, भाई गोंयभर फिरले. लोकायुक्त ते भौशीक गाराणीं कायद्याची बांदावळ करपा पासत भाईंनी मेकळेपणान बुद्धिमानी राजकारण्यांचें, नागरिकांचे विचार आयकून घेतले.
तिसरो पाटो पूल बांदतना, आदिलशहा पालासीच्या मुखारचो रस्तो रुंद करतना पणजी बुडपाक लागली तेन्नाच कोस्टल रोडाची येवजण जाली. दयानंद बांदोडकार मार्ग, मांडवी न्हंयेचे देगे वयल्यो पासयो सुदारतना परशुराम पुतळो ते हाॅटेल मेरियट मेरेनच्या मार्गाचें मुळावणय वीस वर्सांत घालपीय आदले मुख्यमंत्रीच. स्मार्ट सीटींतल्या कामांतल्यान नवो स्मार्ट योग मार्गय दोन वर्सांत जाला. अध्यात्म, आत्मीक शांती दिवपी पणजेंतलो हो मार्ग शारांतल्या नागरिकांकच न्हय भोंवडेकारांकय थाकाय दिवपी, नामनेचो सेल्फी पाॅयंटय. कला अकादमी सुदारतना फाटले वाटेन नवो पांचवो ताल्ल वाठारय सैमाचें लुकसाण जातना नवनिर्मणीय जाता हें शिकोवपी. कोणे केलो हो सगलो वावर? दीसपट्टे मुख्यमंत्री, आमदार स्मार्ट सीटींत भोंवताले?
कळंगूट आनी हेर दर्यादेगे बरोबर पणजेच्या मिरामार दर्यादेगेक धपको बसला, नव्यो ल्हान दर्यावेळो तयार जातात.
पणजे शार अटल पुनर्निमर्णेत हाडटना आपूण ताळगांवां राबित्याक पावलां हें पणजीचे आदले आमदार विसरूंक नाशिल्ले. ताळगांवचे रस्ते बाबूश हांचे देखरेखे खाला जाल्ले आसत पूण पयशे सरकाराचे, तजवीज गोंयच्या आदल्या मुख्यमंत्र्यांनी केल्ली. आदले मुख्यमंत्री प्रतापसिंह राणे, आमदार दिगंबर कामत, लक्ष्मीकांत पार्सेकार, मुख्यमंत्री डाॅ. प्रमोद सावंत, वीज मंत्री सुदिन ढवळीकार, आमदार निलेश काब्राल, बाबुश हांचोय पणजे, ताळगांवातले स्मार्ट रस्ते घडोवपांत वांटो आसा. पणजेंत कांय स्मार्ट रस्ते फाटल्या देड वर्सांत जाल्यात. शार स्वच्छता सर्वेक्षणांत बक्षीस मेळयता, तेखातीर बुन्यादीचो वावर मनोहर पर्रीकार हांणीच केल्लो. सरकार येतलें, वतलें, उरतल्यो बऱ्यो येवजण्यो, केल्लें कर्तृप, शार, नागरिकां कडेन आशिल्ली लागणूक. तें आडावपाक, थांबोवपाकय येना.
केंद्रीय नगर वेव्हार मंत्री हरदिपसिंग पुरी तशें सदांच सांगतात. स्मार्ट सीटीच्या वावरांत शिस्त येवपाक जाय, तकटे, जायरातींतल्यान कामा विशीं शिटकावणी जाय. मुखेल म्हळ्यार स्मार्ट सीटीच्या जाल्ल्या वावराचें आॅडीट जावचें. शारांतल्या वेवसायिकांक कितें दिसता तें आयकून घेवपाक जाय. गरजे भायर स्मार्ट रस्त्यार जेन्ना डिझायनींग जाता तें कित्याक? तो राजमार्ग? स्मार्ट सीटीतलीं कामां मे म्हयन्या मेरेन पुराय जावचीं ना हें खरें. पावसा आदीं व्हडलीं फोंडकुलां उरचीं नात, नवीं पडचीं नात हाची जतनाय घेवची.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
