भांगरभूंय | प्रतिनिधी
कान फोडपी हॉर्नाच्या आवाजान तशेंच कोंयडीक लागून लोक बेजार
भांगरभूंय । प्रतिनिधी
वास्कोः वास्कोच्या पोरण्या बसस्टॅण्डार खूबश्यो मिनी बशी बेशिस्त तरेन रस्त्याचेरूच पार्क करतात. ताका लागून ह्या रस्त्याचेर सदांच येरादारीची कोंयडी जावपाचे प्रकार घडटात.
फाटलीं कितलीशींच वर्सां हो प्रकार चालू आसा. ह्या प्रकरणांत कोणूच गंबीर नाशिल्ल्यान हेर वाहन चालकांक ताचो गरजे भायर त्रास जाता. दुसरी गजाल म्हणल्यार एक केंद्रीय मंत्री नितीन गडकरी हे गाडयांचे हॉर्न ना करपाच्या यत्नांत आसात, जाल्यार दुसरे वटेन पोरण्या बसस्टॅण्डा वयल्या कांय मिनी बस चालकांनी बशींक कान फोडपी हॉर्न बसयल्यात. तांच्या ह्या हॉर्नांक लागून विक्रेत्यां सयत भोंवतणच्या लोकांक गरजे भायर त्रास सोंसचो पडटा.
पोरणें बसस्टॅण्डार आदीं खाजगी बशी वांगडा कदंबाची शटल सर्वीस सेवा बूथ आशिल्लो. पूण थंय फुटपाथीचो वापर लोकांक करपाक मेळना, तशेंच थंय बशी उब्यो करतात, हाका लागून थंय गाडयांची कोंयडी जाताली. हें लक्षांत घेवन तेन्नाचे वास्कोचे आमदार कार्लूस आल्मेदा हांणी कदंब शटल सर्विशीचो बूथ टी. बी. कुन्हा वाठारांत व्हेलो. तशेंच खाजगी मिनी बशींक फाटीं व्हरून पोरण्या बसस्टॅण्डा वयली शटल सर्विशेची सुवात दिली. ताका लागून येरादारीची कोंयडी जावपाचे प्रकार उणें जाल्ले. लोकांक फुटपाथीचो वापर करपाक मेळपाक लागिल्लो, पूण कांय म्हयन्यां उपरांत त्या खाजगी बस चालकांनी शटल सर्विशेचे सुवाते सयत आदलीय सुवात बळकायली. आदले परस थंय चड गाडयो पार्क करपाक लागल्यात. ताका लागून थंयच्यान चलत वचप लेगीत लोकांक कुस्तार जालां. बसकारांनी पुराय फुटपाथूच आपल्या ताब्यांत घेतल्या. थंय बशी एका फाटल्यान एक उब्यो करचे बदला, दोन रांकांनी बशी उब्यो करतात. ताका लागून अर्दो अदीक रस्तो आडायतात. ताका लागून हेर बशींक थंयच्यान येरादारी करप त्रासाचें जाता. हेर गाडयांची कोंयडी जाली तरी लेगीत थंय उब्यो केल्ल्यो बशींचे चालक शांतपणान बसून हो सगळो प्रकार पळयतात. ह्या प्रकाराचेर थळाव्या लोकांनी तिकड उक्तायल्या. दरेकल्यान वेवसाय करचो, पूण ताचो त्रास दुसऱ्यांक जावचो ना, हाची जतनाय घेवची, अशी लोकांची मागणी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
