भांगरभूंय | प्रतिनिधी
4 लाखांचें लुकसाण; घातपाताचो दुबाव
भांगरभूंय । प्रतिनिधी
फोंडें: तामसुली- खांडोळेंच्या धनंजय च्यारी हांच्या वर्कशॉपाक बिरेस्तारा रातच्या 10.15 वरांच्या सुमाराक उजो लागलो. ह्या उज्यांत वर्कशॉपांत आशिल्ल्या सगळ्या साहित्याचो लासून गोबर जाला. म्हत्वाचें म्हणल्यार वर्कशॉपांत वीज कनेक्शन नाशिल्ल्यान दुबाव निर्माण जाला.
धनंजय च्यारी हांणी सुमार 4 लाख रुपयांचें लुकसाण जाल्ल्याचो दावो केला. तशेंच अचकीत उजो लागिल्ल्या प्रकरणांत पुलीस कागाळ दाखल केल्या.
धनंजय च्यारी हांणी बिरेस्तारा काम करचे खातीर प्लायवूड हाडिल्ले. तशेंच काम करपा खातीर लागपी सगळीं मशिनां वर्कशॉपांत दवरिल्लीं. बिरेस्तारा रातीं धनंजय च्यारी आनी ताचीं घरचीं लागींच आशिल्ल्या देवळांत गेल्लीं. पूण धनंजय च्यारी आनी ताचीं घरचीं देवळांत पावताच तांच्या वर्कशॉपाक उजो लागिल्ल्याची म्हायती मेळ्ळी.
उजो पालोवपा खातीर कुंडय, फोंडें आनी पोरणें गोंयच्या उजो पालोवपी दळाच्या जवानांनी घडणुकेचे सुवातेर येवन उज्याचेर नियंत्रण मेळयलें. कुंडय उजो पालोवपी दळाचे अधिकारी गणेश गोवेकार हांच्या मार्गदर्शना खाला हेर जवानांनी उजो पालयलो. उज्यांत सुमार 4 लाख रुपयांचें लुकसाम जाल्ल्याचो दावो धनंजय च्यारी हांणी केला. वीज कनेक्शन नाशिल्ल्या वर्कशॉपाक उजो लागिल्ल्याची कागाळ म्हाड्डोळ पुलीस स्टेशनार दाखल केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
