भांगरभूंय | प्रतिनिधी
युरी आलेमांवः भाजप सरकार फक्त प्रयोग करता तें जालां स्पश्ट
भांगरभूंय । प्रतिनिधी
मडगांवः कोंकणी भाशेंतलो अणकार करप्यांची पदां रद्द करून ते सुवातेर संशोधकाची नेमणूक करचे खातीर राजभास विभागाक मंत्रीमंडळान दिल्ली मंजुरी म्हणल्यार भाजप सरकार फक्त प्रयोग करता तें स्पश्ट जाता. कोंकणींत राजपत्र प्रकाशीत करप आनी राजभास कायद्याची प्रभावी अंमलबजावणी हें दिसा सपन थारलां, अशें विरोधी पक्ष फुडारी युरी आलेमांव हांणी म्हणलां.
राजभास विभागांत कोंकणी संशोधन केंद्र स्थापन कराक मंत्रीमंडळाचे मंजुरीचो संदर्भ दिवन, राजभास कायदो लागू करपाक सरकार अपेशी थारिल्ले खातीर विरोधी पक्ष फुडाऱ्यान टिका केली. ह्या सरकाराक नव्यो नव्यो घोशणा करपाचें आनी प्रसिद्धी मेळोवपाचें पिशें लागलां, पूण प्रत्यक्षांत कांयच निश्पन्न जायना, अशें आलेमांव हांणी म्हणलां.
राजभास विभाग प्रशासनांत कोंकणीक चालना दिवचे खातीर सामकोच अपेशी थारला. सरकाराच्या नव्या निर्णयाक लागून अणकार करप्यांची पदां रद्द जाल्यांत. संशोधन वावर हें शिक्षण खात्याच्या अखत्यारीत येवपाक जाय आनी गोंय विद्यापीठ हें कोंकणी भाशेंत संशोधन करपा खातीर योग्य माची आसा, अशें मत नामनेचे कोंकणी लेखक अॅड. उदय भेंब्रे हांणी जें मत उक्तायल्लें ताका आलेमांव हांणी तेंको दिलो.
राजपत्राच्या अणकारा खातीर तिगां अणकारप्यांक राजभास विभागान मुद्रण आनी स्टेशनरी विभागा खातीर नियुक्त केल्ल्याची म्हायती सरकारान फाटल्या विधानसभा अधिवेशनांत दिल्ली. मात, आतां मेरेन राजपत्र इंग्लिशींतल्यानूच प्रकाशीत जाता. सरकाराक कोंकणी अणकारप्यांची कित्याक गरज आसा? खरें म्हणल्यार राजपत्र कोंकणींत आसपाक जाय आनी तें मागीर हेर भाशांनी अणकारीत जावपाक जाय, अशेंय तांणी म्हणलें. कोंकणी भाशेंतल्यान वेवसाय हाताळपाक सरकारी अधिकार्यांक प्रशिक्षण दिवपाक सरकारान बेगोबेग कृती आराखडो तयार करचो. सरकारी कर्मचार्यांक कोंकणी भाशेचें चड गिन्यान आसचें देखून कोंकणी भाशेंतल्या तज्ञांक आपोवन व्हडा प्रमाणांत कार्यशाळो घडोवन हाडच्यो, अशें युरी आलेमाव हांणी सांगलें.
फक्त गोंयकारांकूच सरकारी नोकरी मेळची, अशी वेवस्था सरकारान करप ही काळाची गरज. राजभास कायदो आनी भरती नेमांत दुरुस्ती जावचे खातीर सगल्या सरकारी भरतीं खातीर कोंकणीचें शिक्षणीक गिन्यान सक्तीचें करपाक आपणें पयलींच मुख्यमंत्र्याक पत्र बरयलां, अशें आलेमांव हांणी पत्रकारांचे नदरेक हाडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
