भांगरभूंय | प्रतिनिधी
उपसभापती ज्योशुआ डिसोझा हांचे म्हापशें वेपारी संघटणेक आस्वासन
भांगरभूंय । प्रतिनिधी
म्हापशें: म्हापशें पालिका मंडळान बाजारांतल्या दुकानांचें भौशीक बांदकाम खात्याच्या दरा प्रमाण भाडेंवाड करपाचो निर्णय घेतला. ह्या निर्णयाचेर फेरविचार करचे खातीर जोडबसका घेवची, अशी मागणी म्हापशें वेपारी संघटणेन उपसभापती ज्योशुआ डिसोझा हांचे कडेन केली. सोमारा वा मंगळारा ही बसका घेवपाचें आस्वासन तांणी संघटणेक दिलें.
शुक्रारा 12 जानेवारीक संघटणेच्या पदाधिकाऱ्यांनी उपसभापती डिसोझा हांणी पालिका कार्यालयांत बसका घेतली. पूण नगराध्यक्ष प्रिया मिशाळ, उपनगराध्यक्ष विराज फडके हे दिल्ली गेल्ल्यान ते गैरहाजीर रावले. ताका लागून ते परतून आयले उपरांत आमदार, नगराध्यक्ष, उपनगराध्यक्ष आनी वेपारी संघटणा हांची जोडबसका आयोजीत करपाची हमी डिसोझा हांणी दिली.
संघटणेच्या शिश्टमंडळांत अध्यक्ष श्रीपाद सावंत, सरचिटणीस सिद्धेश सावंत, भांडारी जितेंद्र फळारी, गीतेश डांगी आनी हेर वांगडी हाजीर आशिल्ले.
नगराध्यक्ष आनी उपनगराध्यक्ष हे उपचारीक कामा खातीर गोंया भायर गेल्यात. तांचे गैरहाजिरेंत आपूण तुमचे मागणी संबंदांत कांयच उलोवपाक वा चर्चा करपाक शकना, अशें उपसभापती डिसोझा हांणी संघटणेच्या पदाधिकाऱ्यांक सांगलें. ते प्रमाण येता त्या सोमारा वा मंगळारा संघटणा, आमदार आनी पालिकेची जोडबसका जातली. ते बसकेंत भाडेंवाडी संबंदांत उपाय येवपाची शक्यताय आसा.
मजगतीं, सोमारा म्हापशें वेपारी संघटणेच्या शिश्टमंडळान उपसभापतींची तांच्या घरा भेट घेतली आनी तांकां मागण्यांचें निवेदन सादर केल्लें. पालिका मंडळान घेतिल्लो दरवाडीच्या निर्णयाचेर फेरविचार करचो, हे खातीर तुमी यत्न करचे आनी तशे निर्देश सत्ताधारी पालिका मंडळाक दिवचे, अशी मागणी संघटणेन केल्ली.
ह्या विशयांत लक्ष घालून ते संबंदीची सुचोवणी पालिका मंडळाक करतलों, अशें आस्वासन उपसभापती डिसोझा हांणी शिश्टमंडळाक दिवन शुक्रारा पालिका कार्यालयांत चर्चे खातीर येवचे, अशी सुचोवणी संघटणेक केल्ली. पूण नगराध्यक्ष आनी उपनगराध्यक्षांचे गैरहाजिरेक लागून ह्या विशयाचेर चर्चा जावंक ना. मजगतीं, हालींच जाल्ले म्हापशें पालिका मंडळाचे बसकेंत पालिका स्थावर मालमत्ता आशिल्ल्या बाजारपेठेंतल्या दुकानांचें भाडें भौशीक बांदकाम खात्याच्या दरा प्रमाण वाडोवपाचो थाराव घेतला. ते प्रमाण हो नवो दर 152 रुपया वयल्यान 296 रुपया दर चौखण मिटर केला. ह्या सुमार दुपेटीन केल्ले दरवाडीक हरकत घेवन म्हापशें वेपारी संघटणेन खर विरोध केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
