भांगरभूंय | प्रतिनिधी
महेश आमोणकारः भाजपाचे नगरसेवक एकवटींत आशिल्ल्याचो दावो
भांगरभूंय । प्रतिनिधी
मडगांवः मडगांव पालिकेचेर भाजपाचो नगराध्यक्ष आसा. भाजपाचे सगळे नगरसेवक एकवटींत आसात. ताका लागून नगराध्यक्ष दामोदर शिरोडकार हांकां बदलपाचो प्रस्न येतलो, अशें दिसना. ते बरे काम करतात. तांच्या कार्यकाळांत खूबशे उरिल्ले प्रस्न सुटावो जाल्यात. अशें नगरसेवक महेश आमोणकार हांणी सांगलें.
महेश आमोणकार हांणी पत्रकार परिशद घेवन नगराध्यक्ष शिरोडकार हांकां तेंको उक्तायलो. 15 म्हयन्यां उपरांत बदल करपाचें कांयच थारूंक ना. कसलोय निर्णय घेवपाचो आसत जाल्यार पक्षाचे वरिश्ठ फुडारी घेतले. मडगांव पालिकेंत गोवा फॉरवर्ड आनी काँग्रेसीची युती आशिल्ली तेन्ना 15 म्हयन्यांनी नगराध्यक्ष आनी उपनगराध्यक्ष बदलपाचें थारिल्लें. पूण आमदार दिगंबर कामत हांणी भाजपांत प्रवेश केले उपरांत सगळीं राजकी गणितां बदल्ल्यांत. तेन्ना भाजपाचो एक व्हड गट तयार जालो. त्या वेळार थारावीत मुजत अशें कांयच थारूंक नाशिल्लें. तेच खातीर उपनगराध्यक्षपद लेगीत तीन वर्सां एकेच व्यक्ती कडेन आसा आनी तें बदलूंक ना, अशें आमोणकार हांणी सांगलें. नगराध्यक्ष दामोदर शिरोडकार बरें काम करतात. तशेंच भाजपाचे सगळे नगरसेवक एकवटींत आसात. बरें काम करपी व्यक्तीक कोणाचोच विरोध आसना. ते प्रमाण आमकां नगरसेवकांक कसलोच प्रस्न ना. सुरवेक आपूण लेगीत नगराध्यक्ष दामोदर शिरोडकार हाचे आड कांय विधानां केल्लीं, पूण पदाचो ताबो घेवन तांणी कामाक सुरवात केले उपरांत तांचें काम पळोवन आपलो विरोध लेगीत सोंपलो. पालिकेंतल्या खूबश्या कर्मचाऱ्यांचे उरिल्ले प्रस्न नगराध्यक्ष शिरोडकार हांणी सोडयल्यात. जीपीसीचें जें काम उरिल्लें तें पालिका कर्मचाऱ्यां कडल्यान करून घेवन तो प्रस्न सुटावो केला. कांय कर्मचाऱ्यांक कायमस्वरुपी करपाचें, बडटीचें काम खूब वर्सां सावन पडून आशिल्लें, तेंवूय पुराय जालां, अशें आमोणकार हांणी सांगलें.
‘नगराध्यक्ष बदलत रावल्यार कामां जावचीं नात’
मडगांवचो नगराध्यक्ष बदलतलो अशी वावडी कांय जाण पातळयतात. तातूंत कांयच खरेंपण ना. नगराध्यक्ष एकसारको बदलत रावल्यार लोकांचीं कामां कशीं जातलीं? कांय जाण पदां खातीर उडयो मारतात. तशें आसत जाल्यार आपूण लेगीत अपक्ष म्हूण भोवमतान वेंचून आयला. आपूण लेगीत पदाचेर दावो करपाचो, पूण तशें ना. कारण नगराध्यक्ष बरें काम करता. कितेंय आसत जाल्यार मडगांवचो आमदार निर्णय घेतलो, पूण तशें कांयच दिसना. कोणाक कसलेंच आस्वासन दिवंक ना. तशें आशिल्लें जाल्यार उपनगराध्यक्षाक आपलें पद सोडचें पडटलें आशिल्लें, अशें महेश आमोणकार हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
