भांगरभूंय | प्रतिनिधी
तुमकुरू, खबरां संस्था ः कर्नाटकांतल्या तुमाकुरू जिल्ह्यांतल्या सरकारी निवासी शाळेंत धक्को दिवपी घडणूक घडल्या. णववी वर्गांतले एके चलयेन भुरग्याक जल्म दिला. चिक्कबल्लापुर हॉस्पिटलांत ती बाळंत जाली. धक्को दिवपी गजाल म्हळ्यार डिलीव्हरी जाय मेरेन आपूण गुरवार आसा हें ताका कळ्ळें ना. ह्या प्रकरणांत पुलिसांनी भारतीय दंड संहिते खाला आनी पोक्सो खाला बलात्काराचो गुन्यांव नोंद केला.
सरकारी निवासी शाळेच्या हॉस्टेलांत ही 14 वर्सां पिरायेची चली रावता. पोटाची दुखणी वाडल्या उपरांत तें बागेपल्ली तालुक्यांतल्या आपल्या घरा गेले. ताच्या पोटांत खूब दुखता म्हणून आवय- बापायन ताका हॉस्पिटलांत व्हेलें. थंय तपासणी केले उपरांत ते गुरवार आसा हें स्पश्ट जालें. दोतोरांनी मागीर ताका हॉस्पिटलांत दाखल केले. तिच्यो वैजकी चांचण्यो केल्यो. उपरांत 9 जानेवारीक डिलीव्हरी जाली. चलयेचें वजन उणें आसा, पूण जल्मल्ल्या भुरग्याची स्थिती थीर आसा, अशें वरिश्ठ पुलिसांनी सांगलें.
पिडितेन समुपदेशनांत कितें सांगलें?
ही धक्को दिवपी म्हायती उजवाडाक आयले उपरांत बाल कल्याण समितीन चलयेचे समुपदेशन केले. त्या वेळार तिचेर कोणे लैंगीक अत्याचार केला काय अशें तिका विचारलें. तिणें तिच्या वयल्या वर्गांतल्या एका भुरग्यान तिचेर लैंगीक अत्याचार केल्ल्याचें सांगलें. देखून ती गुरवार जाली. पूण त्या भुरग्यान हे सगले आरोप न्हयकारले.
मजगतीं, पुलिसांनी आयपीसीच्या कलम 376 (बलात्कार) आनी लैंगीक गुन्यांवांतल्यान भुरग्यांची राखण करपाच्या कायद्याच्या हेर संबंदीत कलमा खाला गुन्यांव नोंद केला. तशेंच तुमकुरू जिल्लो प्रशासनान निवासी हाॅस्टेलाच्या वार्डनाक निलंबीत केल्या, अशें अधिकाऱ्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
