भांगरभूंय | प्रतिनिधी
केंद्र सरकारान उखल्लां पावल
नवी दिल्ली, खबरां संस्था ः केंद्र सरकारान गर्भाशयाच्या कॅन्सराचें प्रमाण उणें करपाचे दिकेन व्हड पावल उबारलां. हाचे प्रमाण 9 ते 14 वर्सां पिरायेच्या चलयां खातीर ह्यूमन पॅपिलोमा व्हायरस (एचपीव्ही) वासीन दिवपाची मोहीम तीन वर्सांत तीन टप्प्यांनी सुरू जातली. ती येत्या जुलय सावन सुरू जावपाची शक्यताय आसा. सूत्रांनी दिल्ले म्हायती प्रमाण, पयल्या टप्प्या खातीर जाय आशिल्ल्या साडे स ते सात कोटी वासिनांचो स्टॉक सरकाराक मेळ्ळे उपरांत ही मोहीम सुरू जातली. गर्भाशयाच्या कॅन्सरा भायर ही वासीन ‘ह्यूमन पॅपिलोमाव्हायरस’ च्या संसर्गाक लागून जावपी गुदद्वाराचो कॅन्सर, योनी आनी गळ्याचो कॅन्सर आडायता.
सध्या एक ‘एचपीव्ही’ वासीन दोन हजार रुपयांक बाजारांत मेळटा. पूण सरकारान वासीन दिवपाची मोहीम सुरू केल्या उपरांत तें फुकट दितले. तीन वर्सांनी हें वासीन 9 ते 14 वर्सां पिरायेच्या चलयां मदल्या एक तृतीयांश चलयांक दितले. सुमार आठ कोटी चलयांक. पयल्या वर्सा उण्यांच 26 लाख चलयांक तें मेळटलें, अशी म्हायती अधिकाऱ्यांनी दिल्या.
पुण्यांतल्या ‘सीरम इन्स्टिट्यूट ऑफ इंडिया’ हे संस्थेन सर्व्हाव्हॅक नांवाची ‘एचपीव्ही’ वासीन तयार केल्या आनी तें बाजारांत उपलब्ध आसा. सरकाराच्या वासीनीकरण मोहिमेक गरजेचो वासीन सांठो तयार करपा खातीर ‘सीरम’ खूब वावुरता.
० गर्भाशयाच्या कॅन्सराचे सगळ्यांत चड दुयेंती आशिल्लो भारत हो पांचवो देश.
० भारतांत दर वर्सा सुमार सव्वा लाख दुयेंतीची नोंद, सुमार 75 हजार बायलांक मरण.
० एचपीव्ही उपप्रकारांची खर संसर्ग जाल्यार गर्भाशयाच्या कॅन्सराचो धोको वाडटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
