भांगरभूंय | प्रतिनिधी
सुवर्णा तेंडुलकारः चार वर्सां उपरांत जिल्हो नियोजन समितीची बसका
भांगरभूंय । प्रतिनिधी
मडगांवः दक्षीण गोंय जिल्हो नियोजन समितीचे चार वर्सां उपरांत जाल्ले बसकेंत 2024 ते 25 ह्या काळा खातीर 148 कोटी रुपयांचो जिल्हो नियोजन आराखडो सादर केलो. दक्षीण गोंयांतल्यो 53 पंचायती आनी एके पालिके कडल्यान उदरगत आराखडो सादर केला, अशें अध्यक्ष सुवर्णा तेंडुलकार हांणी सांगलें. तशेंच हो प्रस्ताव राज्य सरकाराक धाडटले, अशें तांणी स्पश्ट केलें.
जिल्हो नियोजन समितीची बसका बिरेस्तारा सकाळीं दक्षीण गोंय जिल्होधिकारी कार्यालयांत जाली. दक्षीण गोंय जिल्हो नियोजन समितीची बसका चार वर्सां उपरांत जाली. हे आदीं डिसेंबराक घेतिल्ली बसका गणपुर्ती जावंक नाशिल्ल्यान तहकूब करची पडिल्ली. दक्षीण गोंय जिल्हो पंचायत अध्यक्ष सुवर्णा तेंडुलकार हांचे अध्यक्षते खाला जाल्ले बसकेक मंत्री आलेक्स सिक्वेरा, आमदार निलेश काब्राल, आमदार उल्हास तुयेंकार, आमदार आंतोनियो वाझ हांचे सयत जिल्हो पंयायत समितीचे वांगडी हाजीर आशिल्ले.
सुवर्णा तेंडुलकार हांणी सांगलें, अध्यक्षपद स्विकारले उपरांत जिल्हो नियंजन समितीची बसका घेवपाचें थारायिल्लें. जिल्हो नियोजनाचें काम हें जिल्हो पंचायतीच्या कर्मचाऱ्यां कडल्यानूच केलें. ते प्रमाणय यत्न करून ही बसका घेतल्या. दक्षीण गोंयांत सात म्हाल, आठ पालिका आनी 89 पंचायतींचो आस्पाव आसा. तातूंतल्या फक्त 53 पंचायतीं कडल्यान ग्रामविकास आराखडो सादर केला. 36 पंचायतीं कडल्यान आराखडो सादर करूंक ना. तशेंच मडगांव पालिके कडल्यानूय बसके दिसाच सकाळीं उदरगत आराखडो सादर केलो. ते भायर एकेय पालिके कडल्यान उदरगत आराखडो सादर करूंक ना. आयिल्ले प्रस्ताव पंचायत संचालनालया कडेन धाडटले. पंचायती कडल्यान 3119 प्रस्ताव आयल्यात. जिल्हो पंचायती कडल्यान 346 प्रस्ताव दाखल जाल्यात. उरिल्ल्यो पंचायती आनी पालिकांक पत्रां धाडिल्लीं, पूण तांचे कडल्यान प्रतिसाद मेळूंक ना. 31 डिसेंबर 2023 मेरेन जे प्रस्ताव जिल्हो पंचायती कडेन आयल्यात तांचो आस्पाव आराखड्यांत केला, अशें तेंडुलकार हांणी सांगलें.
‘समितीचे वांगडी हेच गणपुर्तीचो वांटो आसचो’
हे आदींची बसका गणपुर्ती जावंक नाशिल्ल्यान तहकूब केली. पंचायतीच्या बसकां वेळार गणपुर्ती जावंक नाशिल्ल्यान अर्द वरा उपरांत परतून बसका सुरू करतात, पूण जिल्हो पंचायतींत तशें ना. हे संबंदांत राज्य सरकार आनी पंचायत खात्या कडेन चर्चा करतले. तशी तजवीज जिल्हो नियोजन समितीचे बसके खातीर करपाची मागणी करतले, अशें सुवर्णा तेंडुलकार हांणी सांगलें. जाल्यार कायम स्वरुपी आमंत्रीक हे गणपुर्तीचो वांटो न्हय. समिती वयले वांगडी हेच गणपुर्तीचो वांटो आसचो, अशें मत मंत्री आलेक्स सिक्वेरा हांणी उक्तायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
