भांगरभूंय | प्रतिनिधी
दिवचलः सांखळी पालिकेन शार नितळ दवरचे खातीर आंखिल्ले उपक्करम आनी ताका लोकांनी दिल्लो बरो आदार हे खातीर सांखळी शाराक नितळ शार पुरस्कार फावो जाला. नवी दिल्लींत राष्ट्रपतींचे हाजिरेंत तशेंच केंद्रीय मंत्र्यांचे हस्तुकीं हो पुरस्कार नगराध्यक्ष रश्मी देसाय आनी उपनगराध्यक्ष आनंद काणेकार हांणी सांगाती नगरसेवकांचे हाजिरेंत स्विकारलो.
घराघरांतलो कोयर एकठांय करप, ओलो आनी सुको कोयर वेगळो करप, नेमान नितळसाण करप, कोयराची योग्य पद्दतीन विलो लावप हे बाबतींत पालिकेन साबार उपक्रम चालीक लायले. तशेंच लोकांनी बरो आदार करून तशेंच नितळसाण कामगार, कर्मचारी, नगरसेवक हांणी मजत केल्ल्यान ‘क्लीन सिटी’चो मान मेळ्ळो, अशी प्रतिक्रिया नगराध्यक्ष रश्मी देसाय आनी उपनगराध्यक्ष आनंद काणेकार हांणी उक्तायली.
मुख्यमंत्री डॉ. प्रमोद सावंत हांच्या मार्गदर्शना खाला आमी शाराचें नियोजन आनी उदरगत आराखडो तयार करून खूबश्यो येवजण्यो चालीक लावपांत येस आयिल्ल्याचें नगराध्यक्ष आनी उपनगराध्यक्षान सांगलें. मुख्यमंत्री डॉ. प्रमोद सावंत हांणी पालिका मंडळ तशेंच सांखळी पालिका वाठारांत रावपी लोकांक परबीं दिली. दरेकल्यान समाजीक जापसालदारकेची जाणीव दवरून नितळ शारा खातीर यत्न केलो जाल्यार सेगीत शार नितळ आनी सुंदर दवरप शक्य आसा, अशी प्रतिक्रिया दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
