भांगरभूंय | प्रतिनिधी
संवसारांतले सगळ्यांत बळिश्ट पासपोर्ट ६ देशां कडेन आसात. तातूंत जपान, सिंगापूर, स्पेन, फ्रांस, इटली, जर्मनी हांचो आस्पाव जाता. Henley Partners हे पासपोर्ट रँकींग संस्थेन २०२४ वर्सा खातीर पासपोर्ट निर्देशांक जारी केला. हे रँकींग इंटरनॅशनल एअर ट्रान्सपोर्ट असोसिएशन (IATA) च्या डेटाचेर आदारून आसा.
भारत ८० वे सुवातेर आसा. २०२३ तूय भारत ह्याच नंबराचेर आशिल्लो. पूण फाटल्या वर्साचे तुळेंत अंदूं भारतीयांक आनीक ५ देशांनी व्हिसा बगर प्रवास करपाक मेळटलें. २०२३ त, भारतीय ५७ देशांनी व्हिसा बगर प्रवास करपाक शकतालें. अंदूं हो आंकडो ६२ चेर पावला.
भारताचो शेजारी देश पाकिस्तानाचो पासपोर्ट संवसारांतलो दुबळो पासपोर्ट जावन आसा. पाकिस्तान पासपोर्ट क्रमांक १०१ आसा. तांच्या नागरिकांक व्हिसा मुक्त ३४ देशांनी वचूंक मेळटा. सुमार दोन वर्सां सावन झूज सुरू आसून लेगीत युक्रेनाचो पासपोर्ट भारताच्या न्हय, तर रशियाच्या पासपोर्टा परसूय चड बळिश्ट आसा.
Henley Partnersचे वळेरेंत युक्रेनचो पासपोर्ट ३२ व्या क्रमांकाचेर आसा. हांगचे नागरीक १४८ देशांनी फुकट व्हिसा प्रवास करपाक शकतात. जाल्यार रशियन पासपोर्टचो नंबर ५१ आसा. रशियन नागरीक व्हिसा बगर ११९ देशांक भेट दिवपाक शकतात. ३ म्हयन्यां सावन हमास कडेन झूज करपी इस्रायलच्या पासपोर्टचो नंबर २१ आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
