इटा सावन 2400 किलाची घांट अयोध्येंत पावली
भांगरभूंय | प्रतिनिधी
अयोध्या, खबरां संस्था ः सध्या रामाचे मुर्तीच्या प्राणप्रतिश्ठा उत्सवाची चर्चा संवसारभर चालू आसा. 22 जानेवारीची सगळीच व्हडा उमेदीन वाट पळयतात. हे खाशेल्या खिणा निमतान घुंगरू आनी घांट उद्देगाच्या इटा शारांच्या जालेसरांतल्यान 2400 कील वजनाची घांटी बुधवारा सकाळीं अयोध्येक पावली. वेपाऱ्यांनी ही अष्टधातू घांट फुलांनी सजयल्ल्या रथांतल्यान अयोध्याक हाडल्या. ती श्री राम जन्मभूमि तीर्थ क्षेत्र ट्रस्टाक समर्पित केल्या. शांत वातावरणांत तिचो आवाज सुमार 2 किमी मेरेन आयकूंक येता. तशेंच तिची उंचाय 6 फूटांपरस चड आसा.
75 कारागिरांनी 3 म्हयन्यांत घांट तयार केलां. ती तयार करपाक सुमार 25 लाख रुपया खर्च जालो. हाचे वांगडाच दरेकीं 50 किल वजनाचीं आनीक 7 घंटीय ह्या ट्रस्टाक समर्पित केल्यात. जालेसर हांगाच्यो घांटी संवसारभर फामाद आसात. म्हत्वाचें म्हणल्यार ही घांट वाजल्यार ‘ॐ’ हो आवाज आयकूंक येता. हाचे पयलीं 2100 किलाची घांट तयार करपाचें लक्ष्य दवरिथरल्लें. उपरांत उमेद आयली आनी 2400 किल वजनाची घांट तयार करपाचें थारायलें.
जालेसराच्यो पितळेच्यो घंटयो संवसारभर फामाद आसा. 2000 किल घंटी आसूं वा 50 ग्रामाची घंटी, ती वाजता तेन्ना ‘ॐ’ असो आवाज जाता.
कांय दिसां पयलीं श्रीरामा खातीर 108 फूटाची उजवात तयार केल्या. उपरांत अरविंदभाय पटेल हांणी 1100 कील वजनाचो दिवो तयार केला. हो दिवो 501 किलो तूप घालून पेटयतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
