सीईएस-2024 त संवसारांतलो पयलो पारदर्शक स्मार्ट टीव्ही

भांगरभूंय | प्रतिनिधी

लास वेगास, खबरां संस्था ः ह्या वर्साचो सगळ्यांत व्हडलो तंत्रगिन्यानाचो इव्हेंट म्हणल्यार कंज्युमर इलेक्ट्रॉनिक्स शो (CES) 2024 अमेरिकेंतल्या ह्या शारांत सुरू जाला. हातूंत दक्षीण कोरियाचे एलजी कंपनीन संवसारांतलो पयलो पारदर्शक टीव्ही बाजारांत हाडला. तशेंच एआय रोबॉट आनी 2 इन 1 लॅपटॉप सारकिल्ले उत्पादनाय बाजारांत हाडल्यात.
1 लाख 30 हजारां परस चड लोक सीईएसाक हाजीर रावपाचे आसात. 12 जानेवारी मेरेन चलपी हे कार्यावळींत संवसारभरांतल्या 4000 परस चड कंपनींनी आधुनीक इलेक्ट्रॉनीक उपकरणांचें प्रदर्शन केलां. हांतूत वांटो घेवपी 35% कंपनीं अमेरिकन आसात.

संवसारांतलो पयलो पारदर्शक ओएलईडी डिस्प्ले (OLED Display) टीव्ही

दक्षीण कोरियाची एलजी कंपनीन संवसारांतलो पयलो पारदर्शक स्मार्ट टीव्ही बाजारांत हाडला. तातूंत 77 इंचाचो ग्लास डिस्प्ले आसा. देखून स्क्रीनाचेर आशिल्लीं चित्रां हवेंत उडताना दिसतात. एलजी सिग्नेचर ओएलईडी टीव्ही (LG Signature OLED TV) ह्या वर्साच्या निमाणें मेरेन संवसारीक पांवड्यार उपलब्ध जातलो.
टीव्ही बंद केल्यार अदृश्य जाता अशें एलजी सांगता. टीव्ही झीरो कनॅक्ट बॉक्स सयत आसता, जो वायरलेस तंत्रज्ञानाच्या आदारान टीव्हीचेर आशिल्ल्या डिस्प्ले पॅनलाचेर व्हिडियो आनी ऑडियो प्रसारीत करता. तशेंच सॅमसंग कंपनीन हांगा मायक्रो एलईडीचेर चलपी पारदर्शक टीव्हीय बाजारांत हाडला.

ग्वावज घालून गेम खेळतना भलायकेची म्हायती
पामप्लग कंपनीन नवीन ग्वावज बाजारांत हाडल्यात. ताचेर दरेका बोटाचेर सेन्सर आनी एलईडी लायटी आसतात. व्हर्च्युअल रिॲलिटी सयत जायत्या कामां खातीर ताचो उपेग करूं येता. तशेंच स्ट्रोक जाल्ल्या दुयेंती खातीरय ताचो उपेग करूं येता. हातूंत दुयेंती गेम खेळत रावता आनी दोतोरांक तांचे भलायके संबंदीत डेटा मेळटा.

पाळीव प्राण्यां खातीर एआय रोबॉट
रोबोटिक्स कंपनी ऑगमनान ह्या शोंत ओरो (ORo) नांवाचो रोबोट हाडला, जो तुमच्या पाळीव प्राण्यांची पुराय जतनाय घेतलो. तो तांचे वांगडा खेळटलो, तशेंच गरज पडल्यार तांकां खावपाक आनी वखदांय दितलो. तो आपलें पुराय काम आर्टिफिशियल इंटेलिजन्स (AI) च्या मजतीन करतलो.

लेनोवोन 2 इन 1 लॅपटॉप हाडलो
लेनोवोन 2 इन 1 लॅपटॉप ‘थिंकबुक प्लस जेन 5 हायब्रिड’ (ThinkBook Plus Gen 5 Hybrid) बाजारांत हाडला. हातूंत वापरप्यांक विंडोज वांगडाच एंड्रॉयड ऑपरेटिंग सिस्टीम मेळटली. जेन्ना तुमी लॅपटॉप मोडांत वापरतले तेन्ना तो लॅपटॉपा सारको काम करतलो. ताचो डिस्प्ले काडले उपरांत तो एंड्रॉयड टॅबलेटांत रुपांतरीत जातलो.