भांगरभूंय | प्रतिनिधी
वाराणसी, खबरां संस्था ः काशीक ‘मोक्ष भूमि’ ह्या नांवान वळखतात. काशींत निमणे संस्कार करप हें शुभ मानतात. “कश्यम मारनत मुक्ती” म्हळ्यार काशीत कुड सोडून वचपी मनीस जल्म- मरणाच्या चक्रांतल्यान मुक्त जाला, अशें मानतात. ते खातीर देशभरांतले जायते लोक निमणे संस्कार करपाक काशींक येता. काशींतल्या मणिकर्णिका मसणभुंयेंत हालींच एक वेगळेच तरेन निमणे संस्कार जाले. हे खेपे काशींत मरण हो शोक न्हय तर एक उत्सव अशें स्पश्ट जालें. हे घडणुकेचो व्हिडियो सोशल मिडियाचेर व्हायरल जाला.
मणिकर्णिका मसणभुंयेंत एका पुतान बापायचे जळपी चितेचेर सोरो, सिगरेट आनी बनारसी पान दवरलें. आपल्या मेल्ल्या बापायच्यो सगळ्यो इत्सा पुराय जावच्यो ह्या हेतान ताणें ह्यो वस्तू अर्पण केल्ल्यो, अशें म्हण्टात. पूण, मसणभुंयेंत हाजीर आशिल्ल्या लोकांक हें दृश्य धक्को दिवपी आशिल्लें.
बापायची खंयचीच इत्सा अपूर्ण उरची न्हय म्हणून आपूण अशें करतां असो तो व्हायरल व्हिडियोंत सांगता. हे वेळार तो पयलीं जळपी चितेचेर सोऱ्याची बाटली ओतता, मागीर सिगरेट आनी बनारसी पान दवरता. ह्या वेळार कुटुंबांतले लोक संगीत वाजोवन आनी नाचत मेल्ली कूड निमाणे संस्कारां खातीर हाडटात. मेल्ल्या मनशाचे आवडीची खाणां अर्पण करतात. आनी उपरांत हर हर महादेव जप आनी मंत्रोच्चारण करून निमणे संस्काराच्यो विधी पुराय करतात. मेल्ल्या मनशाचेर निमणे संस्कार करतना त्या मनशाच्या आवडीचें पदार्थ अर्पण करचें अशें हांगाचे थळावे लोक मानतात.
अशे तरेन काशींतल्या मणिकर्णिका मसणभुंयेंत दर दिसा जायत्या मड्यांचेर निमणे संस्कार करतात. थळाव्या लोकां खातीर हें दृश्य सामान्य आशिल्लें तरी भायल्या लोकांक खातीर हे दृश्य अजापीत करपी आशिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
