भांगरभूंय | प्रतिनिधी
महाराष्ट्रांतूच न्हय तर देशभरांतल्या राजकारणमोगीं मदीं चर्चेंत आशिल्ल्या आमदार अपात्रताय प्रकरणाचेर अखेरेक सभापती राहुल नार्वेंकार हांणी निकाल दिलो. शिवसेना ही एकनाथ शिंदे हांचीच, अशें तांणी म्हणलां. आतां ह्या वादाचेर पड्डो पडला. पूण राजकी शह, काटशह, डावपेच चालूच उरतले. न्यायालयांनीय आव्हान याचिका वतल्यो. हें सरकार बरखास्त करपाचो आदेश दिवपाची गरज ना अशें सर्वोच्च न्यायालयान म्हणिल्लें, मात आतां उबाठा (ह्या नांवाक उद्धव ठाकरे हांचो विरोध आसा.) शिवसेनेन ह्या निवाड्यांतल्या एखाद्या निर्णयाक आव्हान दिल्यार कोर्ट वेगळो कितें निर्णय दिवंक शकता, अशें राजकी धुरंधरांक दिसता. चार म्हयन्यांनी लोकसभा वेंचणूक आसा, मागीर स म्हयन्यांनी विधानसभा वेंचणूक जातली. ताचेर ह्या निकालाचो परिणाम जातलो काय ना, ताचे कडेन आतां सगल्याचेंच लक्ष आसतलें.
21 जून 2022 दिसा शिवसेनेक वेर गेली. मुख्यमंत्री उद्धव ठाकरे फक्त घरांतूच बसून आसतात, आमकां मेळना, फोन घेना, आमचीं कामां करिना, राष्ट्रवादी काँग्रेसीचो सरकाराचेर शेक आसा (आतां अजितदादा राष्ट्रवादी गट शिंदे, भाजपा वांगडा सत्तेंत आसा.) असो आरोप करून शिंदे हांच्या फुडारपणा खाला शिवसेनेचो गट फुटिल्लो. तीस, पस्तीस करता करता सगलेच आमदार तांचे वटेन गेल्ले. सुरत, आसामांत म्हयनोभर मुक्काम करून मागीर तो गट मुंबय आयिल्लो आनी शिंदे मुख्यमंत्री, भाजपाचे देवेंद्र फडणवीस उपमुख्यमंत्री जाल्ले. शिवसेना आनी राष्ट्रवादी काँग्रेस पक्ष फोडपा फाटल्यान भाजपा आसा अशें जायत्या जाणकारांक दिसतालें. मात भाजपान निमाणें मेरेन तें न्हयकारलें. फुटीर गटानूय आमी फक्त मतदारसंघ, राज्याचे उदरगती खातीर पक्ष सोडला, अशें सांगलें.
शिवसेनेचे कुडके जातकच शिंदे गटान ताचेर हक्क सांगलो. वेंचणूक आयोगानूय तांचे कडेन सेनेचे चड आमदार आशिल्ल्यान शिवसेना हें नांव आनी धनुश्य बाण हें चिन्न शिंदे गटाक दिलें. मदीं खूब राजकी घडामोडी, खेळी जाल्यो. आतां सभापती नार्वेंकार हांणी निकाल दिला. शिंदे गट ही खरी शिवसेना, गटाचे फुडारी म्हूण तांची केल्ली नेमणूक वैध थारता, भरत गोगावले हांची प्रतोदपदार केल्ली नेमणूक वैध, शिंदे गटाचे वांगडी संपर्काच्या भायर गेल्यात अशें ठाकरे गटाची नोटीस म्हणटा, हें पुराव्यां वयल्यान सिद्ध जायना. ठाकरे गटाचे सुनील प्रभू हांकां कसलीच बसका आपोवपाचो अधिकार नाशिल्लो, ताका लागून शिंदे गटाच्या वांगड्यांचेर अपात्रतायेची कारवाय करपाची मागणी भायर मारतां…. अशें सभापतीन म्हणलां. विशेश म्हणल्यार शिंदे गटाची ठाकरे गटाच्या आमदारांक अपात्र थारावपाची मागणीय सभापती नार्वेंकार हांणी भायर उडयल्या.
ह्या निवाड्याचेर आरत्यो परत्यो प्रतिक्रिया अर्थांत येतल्योच. उपमुख्यमंत्री फडणवीस हांच्या मतान हें सरकार बळिश्ट आनी थीर आसा हें आतां तरी सगल्यांक पट्टलें. कायद्याक पुराय पाळो दिवन तें स्थापन केलां आनी तें विधानसभेची मुजत सोंप मेरेन सत्तेर उरतलें अशेंय तांणी सांगलें. उद्धव ठाकरे हांची प्रतिक्रिया अर्थांत तिखट आसा. सभापती घटनात्मक संरक्षण आसता, ताचो तांणी गैरफायदो घेतला. आमी न्यायालयाचो अवमान केल्ल्याची याचिका घालपाक मेळटा जाल्यार घालतले. हो निकाल म्हणल्यार निर्लज्जपणाचो कळस. आमच्या शिवसेनेची घटना ग्राह्य ना जाल्यार तांणी दोनूय गटांतल्या एकल्याकूय कसो अपात्र थारायलो ना, अशी प्रतिक्रिया तांणी दिली. राजकी मळा वयले भीष्म मानतात, त्या शरद पवार हांणी आतां आमी महाविकास आघाडी म्हूण लोकां सामकार वतले आनी ह्या राजकी निकाला विशीं तांकां सांगतले. ह्या निकालाक लागून आमकां आयती संद मेळ्ळ्या. हो निर्णय जनतेच्या न्यायालयांत गेल्ल्यान तीच आतां कितें तो निर्णय घेतली, अशी आस्त ते बाळगून आसात. मतदारांचो कल कोणा वटेन आसा, तें वेंचणूक निकाला उपरांतूच कळटलें.
दोगांचें केस्तांव, तिसऱ्याचो लाव
लोणयाचो गुळो कोणे खावचो हाचे वयल्यान दोन माजरां मदीं पेट्टा. हे संदीचो लाव घेवन एक माकड लोणयाचें समान वाटप करपाचें धोंग करून सगलें लोणी आपूणच खाता. हे काणये वयल्यान दोगांचें केस्तांव आनी तिसऱ्याचो लाव, असो बोध मेळटा. मात, फोंडेंच्या माजराक मात वेगळो अणभव आयलो. दोगांच्या झगड्यांनी ताका बाबड्याक मार खावचो पडलो. काणी कुशीक दवरली, तरी घरांतल्या पाळीव जनावराक अशें मारप समा न्हय. प्राणी कायद्या प्रमाण तो गुन्यांव. सून आनी माय हांचे शाब्दीक लटाफटींत कारण नासतना त्या माजराक भोगचें पडलां. सुनेचें माजर म्हूण मायक ताची नसाय आशिल्ली काय ना, तें थळाव्यांक खबर आसतलें. दोगांय झगडटात तें पळोवन माजर बाबडें मदीं पडलां आसतलें वा पांयां कडेन घुटमळ्ळां आसतलें. ताका बाबड्याक खंय खबर रेड्या पाड्याच्या झुजांत झाडांचेर काळ म्हूण!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
