सांस्कृतीक दायज सांबाळपाक विद्यार्थ्यांनी योगदान दिवचें

भांगरभूंय | प्रतिनिधी

डॉ. विष्णू नाडकर्णी: झांट्ये म्हाविद्यालयांत इक्विनोक्स कार्यावळीचें उक्तावण

दिवचल: इक्विनोक्स सारक्यो कार्यावळी ह्यो विद्यार्थ्यांच्या सर्वांगी उदरगती खातीर म्हत्वपूर्ण आसतात. शिक्षणीक पाठ्यक्रमा भायले अशें उपक्रम फक्त मनरिजवणे खातीर नासून नवी कुशळटाय, नवी वळख आनी सांस्कृतीक दायज मुखार व्हरपा खातीर आसतात. नव्या शिक्षणीक धोरणांतूय अशा उपक्रमांचो आस्पाव आसून विद्यार्थ्यांनी अशा उपक्रमांत वांटेकार जावन परिपूर्ण व्यक्तीमत्व विकास सादचो अशें आवाहन गोंय विद्यापिठाचे कुलसचीव डॉ. विष्णू नाडकर्णी हांणी विद्यार्थ्यांक केलें.

दिवचले नारायण झांट्ये वाणिज्य म्हाविद्यालयांत इक्विनोक्स-2024 चें उक्तावण केले उपरांत मुखेल सोयरे ह्या नात्यान ते उलयताले. ह्या वेळार माचयेर विश्वस्त सिद्धार्थ झांट्ये, सल्लागार डॉ. अनील डिंगे, आदले आमदार तशेंच म्हाविद्यालयाचे वेवस्थापन अध्यक्ष प्रवीण झांट्ये, प्राचार्य डॉ. राजेंद्र कुमारजुंवेंकार, उपप्राचार्य डॉ. राजेश आमोणकर, विद्यार्थी मंडळाची अध्यक्षा प्रा. अनुराधा बांदिवडेकार, पालक शिक्षक संघाचे अध्यक्ष तुळशीदास शिरोडकार, विद्यार्थी मंडळाचे प्रसाद गांवस हाजीर आशिल्ले.

प्रवीण झांट्ये हांणी लेगीत विद्यार्थ्यांक व्यक्तीमत्वाचे उदरगती खातीर अशा उपक्रमांनी वांटेकार जावपाचें आवाहन करून शुभेत्सा दिल्यो.

प्रतिबींब ह्या म्हाविद्यालयाच्या विवीध उपक्रमांची म्हायती आशिल्ल्या तीन म्हयनाळ्याचें ह्या वेळार मानेस्तांचे हस्तुकीं विमोचन जालें.

11 आनी 12 वेर म्हाविद्यालयाचे उक्ते माचयेर इक्विनोक्स कार्यावळी खाला गोंयच्या विवीध म्हाविद्यालयांतल्यान विद्यार्थी आपली कुशळटाय सादर करतले. वट्ट 11 म्हाविद्यालयांतले 200 विद्यार्थी हातूंत वांटेकार जाल्यात. ह्या वेळार म्हाविद्यालयाच्या विद्यार्थ्यां खातीर गूंज ह्या सांस्कृतीक कार्यावळीचेंय आयोजन केलां.

सुरवेक मानेस्तांचे हस्तुकीं दिवली पेटोवन उक्तावण केलें. येवकार आनी प्रास्तावीक अनुराधा बांदिवडेकार हांणी केलें. प्राचार्य डॉ. राजेंद्र कुमारजुंवेंकार, प्रा. डॉ. राजेश आमोणकार हांणी लेगीत आपलें मनोगत उक्तायलें.

सुत्रसंचालन प्रा. अपुर्वा हळर्णकार आनी मृणाल वाळके हांणी केलें. उपकार प्रसाद गांवस हांणी मानले.