भांगरभूंय | प्रतिनिधी
अन्न आनी वखदां प्रशासनाचो निर्देशः नेम मोडिल्ल्याचें निरिक्षण
भांगरभूंय । प्रतिनिधी
वास्कोः दाबोळी वाठारांत चिकन, मटण विक्रेते नेम मोडटात, अशें दिसून आयिल्ल्यान अन्न आनी वखदां प्रशासनान तीं दुकानां बंद करपाचे निर्देश दिल्यात.
ह्या प्रकरणांत चिखली पंचायतीक लेगीत अन्न आनी वखदां प्रशासना कडल्यान स्पश्टीकरणा संबंदांत नोटीस मेळपाची शक्यताय आसा. आमी चिकन विक्रेत्यांक फ्रोझन चिकन विकपाचो परवानो दिल्लो. पूण तांणी जित्यो कोंबयो मारून विकपाचो वेवसाय सुरू केल्ल्याचें दिसता, अशें चिखलीचे सरपंच कमलाप्रसाद यादव हांणी सांगलें. संबंदीत प्राण्यांची एकेच सुवातेर कत्तल करचे खातीर आमी रोखडीच सुवात सोदतले, अशेंय तांणी स्पश्ट केलें.
दाबोळी वाठारांत चिकन, मटणाच्यो टाकावू वस्तू उक्ताडार उडयिल्ल्यान विमानांक सुकणी आपटपाचें प्रकार जातात. हे संबंदांत भारतीय नौदळान जिल्होधिकारी कार्यालयाक कळयिल्लें. ताची दखल घेतना पंदरा दिसां आदीं जिल्होधिकारी कार्यालया कडल्यान चिखली पंचायतीक नोटीस मेळिल्ली. ते नोटिशे उपरांत चिखली पंचायतीन तो प्रस्न गंभीरतायेन हाताळपाचें थारायलें. ह्या प्रकरणांत अन्न आनी वखदां प्रशासन, भलायकी खातें, गोंय राज्य प्रदुशण नियंत्रण मंडळ हांणी संयुक्त पळोवणे खातीर पत्रां बरयिल्लीं. ते प्रमाण बुधवारा सकाळीं संबंदीत सरकारी यंत्रणे सयत यादव हांणी दाबोळी वाठारांतल्या मटण, चिकन दुकानांची पळोवणी केली. त्या वेळार कांय बेकायदो गजाली उजवाडाक आयल्यो.
यादव हांणी सांगलें, चिखली पंचायतीचो दाबोळीचो कांय वाठार विमानांच्या फनेल झोनांत येता. ह्या फनेल झोनांत कांय जाण चिकन, मटणाच्यो टाकावू वस्तू उडयतात. ताका लागून चिकन, मटण दुकानांची पळोवणी करपाक गेल्ले, तेन्ना संबंदीत विक्रेत्यां कडेन परवाने नाशिल्ल्याचें कळ्ळें. तांकां तांचीं दुकानां बंद करपाचे निर्देश दिल्यात. जेन्ना ते सगळे नेम पाळटले तेन्नाच हाचेर विचार करूं येता. एकेच कडेन संबंदीत प्राण्यांची कत्तल करचे खातीर आमी सुवात सोदतात. थंय परवानगी घेवनूच प्राण्यांची कत्तल करपाक मेळटली. जर तें शक्य जालें जाल्यार गोंयांतल्या हेर पंचायतींत तें सुरू जातलें, अशें तांणी सांगलें.
कोयराचो विलो लावचे खातीर वोवा प्लांट उबारला, पूण संबंदीत चिकन, मटण विक्रेते कोंबयो, बोकड्यो मारले उपरांत टाकावू गजाली त्या प्लाटांत दिनात. एकादो कोण तरी कंत्राटदारा कडेन त्यो गजाली दितात. कंत्राटदार ताचो आपल्याक जाय थंय व्हरून विलो लायता. त्या कंत्राटदाराची कोयर वेवस्थापन म्हामंडळा कडेन नोंदणी आसा काय ना, ताची आमी चवकशी करतले. हे संबंदांत आमी संबंदीत कंत्राटदारा आड कारवाय करतले. कांय विक्रेते जाल्यार थेट मेकळे सुवातेर व्हरून त्यो गजाली उडयतात. हे संबंदांत आमी गंभीर आसात. ताका लागून आमी संबंदितांचेर कारवाय करतले, अशें यादव हांणी सांगलें. ह्या विक्रेत्यांच्या दुकानांनी उदकाची वेवस्था ना. रगताचो योग्य विलो लायनात. रगताचे व्हाळ फुटपाथा वयल्यान व्हांवतात. तशेंच त्या दुकानांनी बुरशेंपणां आशिल्ल्याचें दिसलें. ताका लागून तीं बंद करपाचे निर्देश दिल्यात, अशें यादव हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
