भांगरभूंय | प्रतिनिधी
भांगरभूंय । प्रतिनिधी
म्हापशेंः कोलवाल हांगच्या हळर्णकार चॅरिटेबल ट्रस्टाच्या पालवान डायगो वाझ उच्च माध्यमीक विद्यालयांत आयोजीत केल्ले आंतर उच्च माध्यमीक विद्यालयीन वृत्तपत्र लेआवट सर्तींत म्हापशेंच्या पुरुषोत्तम वालावलकार उच्च माध्यमीक विद्यालयाचो अनिश नायक आनी सई किंजवेडकार हांका पयलें इनाम फावो जाले. पिर्णाच्या श्री शारदा उच्च माध्यमीक विद्यालयाच्या समृद्धी शेट्ये आनी संचिता हांका दुसरें आनी पर्वरीच्या विद्या प्रबोधिनी उच्च माध्यमीक विद्यालयाच्या संचना देसाय आनी सौरा काळे हांका तिसरें इनाम फावो जालें.
बाळशास्त्री जांभेकर हाणी 6 जानेवारी 1832 वर्सा दर्पण हें मराठींतले पयले नेमाळे सुरू केल्लें. ताचे यादस्तीक ही सर्त आयोजीत केल्ली. ह्या वेळार मुखेल सोयरे आनी परिक्षक म्हणून मनशू कृष्णा पाटील, आनी श्रीधऱ कामत हाजीर आशिल्ले. उच्च माध्यमीक विद्यालयाची मुखेली माधवी हळर्णकार, श्रीराम विद्या मंदिराची जोआना मोंतेरेो आनी वरिश्ठ शिक्षिका उल्का काकडे माचयेर आशिल्ली.
दिवली पेटोवन सर्तीक सुरवात जाली. प्रा. जोआनान येवकार दिलो आनी शिक्षिका सुश्मिता मोपकारान मानेस्तांची वळख करून दिली. पाटील हाणे नेमाळीं आनी तांचो इतिहास हाचेर उजवाड घातलो. भास, लेखन आनी निरीक्षण शक्त कशी आसपाक जाय ते विशीं विद्यार्थ्यांक मार्गदर्शन केलें. शिक्षिका सुनिता कोटकारान उपकार मानले. पसायदानान कार्यावळीचो समारोप जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
