भांगरभूंय | प्रतिनिधी
भांगरभूंय । प्रतिनिधी
पोरणे गोंयः कुडका पंचायत वाठारांतल्या सान्तान चर्ची लागल्या रस्त्याची राखणे वणत कोसळून सात म्हयने जायत आयले तरी ती सारकी करपाचें बांदकाम खातें नांव घेना. ताका लागून तिडकल्ल्या सान्तान हांगच्या लोकांनी बांदकाम खात्यान ती सारकी करपाची प्रक्रिया सुरू करपाक सात दिसांची मुजत दिल्या. ना जाल्यार बांदकाम खात्याच्या अधिकाऱ्यांक तांच्या ऑफिसांनी वचून घेराव घालपाची शिटकावणी दिल्या.
राखणे वणत कोसळत सावन ह्या मार्गा वयल्यान चारचाकी वाहनां व्हरपाक बंदी घातल्या. आमकां ताचो सामको त्रास जाता अशें सान्तान वाठारांतल्या लोकांनी सांगले. बांदकाम खातें राखणे वणत सारकी करून येरादारी सुरू करतलें म्हणून आमी वाट पळयली. मात आतां आमचें पांशियश सोपलां, अशें एकल्यान सांगला. ह्या रस्त्या वयल्यान चारचाकी वाहनां व्हरपाक मेळनात आनी थळाव्या लोकांक पोरणे गोंय आनी हेर कडेन वचपाक लांबच्या रस्त्या वयल्यान वच्चें पडटा.
आम आदमी पक्षाचो फुडारी रामाराव वाघ हाणे राखणे वण्टीची दुरुस्ती प्रक्रिया सुरू करपाक बांदकाम खात्याक सात दिसांची मुजत दिल्या. ही प्रक्रिया सुरू केली ना जाल्यार अधिकाऱ्यांक घेराव आनी हेर उपाय येवजण आमकां करची पडटली अशें ताणे सांगलें. ह्या मार्गा वयली दुचाकींची येरादारी आमी बंद करतले अशें थळाव्यांनी सांगलें. जुलय म्हयन्यांत सान्तान चर्चीचें तवश्यांचें फेस्त जाता. ताच्या पयली राखणे वणत बांदून रस्तो सगळे तरेच्या येरादारीक मेकळो करपाक जाय अशें लोकांनी सांगलां.
कुडका पंचायतीचो उपसरपंच विनेश आडपयकार हांणे मुख्यमंत्री डॉ प्रमोद सावंत हाका हातूंत लक्ष घालून राखणे वण्टीच्या दुरुस्तीचें काम जाता तितल्या बेगीत हातांत घेवपाची ताका विनवणी केल्या. सान्तआंद्रेचो आमदार विरेश बोरकार हाणे राखणे वण्टीच्या दुरुस्ती कामाक कळाव लागपाक बांदकाम खातें जापसालदार आसा असो आरोप केला. संबंदीत कामा खातीर सरकारान सल्लागार नियु्क्त केल्लो. ताणे दुरुस्ती कामा खातीर 17 कोटी रुपया खर्च येतलो अशें सांगल्लें. तातूंतले 10 कोटी रुपया जमीन संपादन आनी बाकीचे वणत बांदपाक लागतले.
नीलेश काब्राल हाका बांदकाम मंत्रिपदाचो राजिनामो दिवचो पडलो आनी आतां ह्या खात्याचें काम मुख्यमंत्री डॉ सावंत पळयता. आता राखणे वण्टी संबंदात निर्णय घेवपाचें काम मुख्यमंत्र्यान करपाक जाय अशें बोरकारान सांगलें.दरेका आमदाराक आपल्या मतदारसंघात उदरगतीच्या कामां खातीर 10 कोटी रुपया खर्च करपाक मेळटात. राखणे वणत बांदपाक 17 कोटी रुपया खर्च येतलो देखून मुख्यमंत्र्यान आतां ह्या खर्चाक मंजुरी दिवपाक जाय. लोकांनी बोवाळ केल्या बगर सरकार आयकना. फाटल्या सात म्हयन्यां सावन सान्तान चर्ची कडली राखणे वणत कोसळल्ल्यान लोक येरादारीक लागून त्रास काडटात. मुख्यमंत्र्यान बेगीन काम सुरू करचें अशें बोरकारान मागलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
