भुरग्यांचे सुरक्षीतताये खातीर आयोगाची धडपड

भांगरभूंय | प्रतिनिधी

विद्यालयांनी सीसीटीव्ही बसोवपाचें आयोगान सुचयलांच, तेच बरोबर भुरग्यांच्यो कागाळी मेळोवपा खातीर एक खासा ‘कम्प्लेंट बॉक्स’ लेगीत दवरचें, अशें आयोगान सुचयलां.

फाटल्या कांय म्हयन्यांत गोंयांतल्या विद्यालयांनी चली भुरग्यांचेर जावपी लिंगीक शोशणाचीं प्रकरणां, ल्हान भुरग्यांचे अश्लील व्हिडिओ एकामेकांक धाडपाचे प्रकार, आनी तंबाकुच्यो जायराती पळयल्यो जाल्यार खंयच्याय संवेदनशील व्यक्तीचें मन दुखपा सारकें आसा. अशे प्रकार घडचे न्हय म्हूण लोक जागृताय करपाक शकतात. पूण दुबावितांक धरून ख्यास्त दिवंक शकनात. तें काम पुलीस आनी न्याय संस्थांचें. पूण अशे प्रकार घडचेच न्हय म्हूण पयलीं पावलां मारपाचीं गरज आसा आनी हाचें भान आशिल्ल्यान गोंय राज्य बाल अधिकार राखण आयोगान तशी संवेदनशीलताय दाखोवन शिक्षण खातें धरून संबंदीत अधिकाऱ्यांकय जाग्यार हाडपाचे यत्न केल्यात.
2013 वर्सा वास्को शारांत एका शाळेंतल्या सात वर्सां पिरायेचे चलयेचेर लिंगीक शोशणाचो प्रकार घडिल्लो. विरोधकांनी आनी लोकांनी आवाज करतकच शिक्षण खात्यान परिपत्रक काडून सगल्या विद्यालयांनी धाडिल्लें आनी सीसीटीव्ही बसोवपाची सुचोवणी केल्ली. इतलेंच न्हय तर भुरगीं विद्यालयाच्या कॅम्पसा भायर वतात जाल्यार शिक्षिकेन तांचे वांगडा वच्चें अशें सांगिल्लें. ते भायर अनवळखी व्यक्तींक भुरग्यांक मेळपाक दिवचे न्हय हाची खबरदारीय वेवस्थापनान घेवची अशें सुचयिल्लें. हे गजालीक आतां धा वर्सां पुराय जाल्यांत. कितल्या विद्यालयांनी सीसीटीव्ही बसयल्यात आनी बसयल्यात जाल्यार तातूंतले कितले चलतात हें सरकारान जाणून घेवप म्हतवाचें. तशेंच तेन्ना घालून दिल्लीं मार्गदर्शक तत्वां कितल्यो शिक्षणीक संस्था पाळटात हाचेरय सरकाराची नदर आसपाक जाय.
फाटल्या पावसाळी अधिवेशनांत जेन्ना वास्कोचे आमदार कृष्णा साळकार हांणी विद्यालयांनी भुरग्यांचे सुरक्षीतताये विशींचो विशय काडलो, तेन्ना मुख्यमंत्री प्रमोद सावंत हांणी आपलें सरकार सरकारी शाळांनी सीसीटीव्ही बसोवपाचो विचार करता अशें म्हणलें. हाचो अर्थ ते मेरेन सरकारी शाळांनी तरी सीसीटीव्ही बसोवंक नाशिल्ले.
फाटल्या कांय म्हयन्यांनी उत्तर आनी दक्षीण गोंयांतल्या कांय विद्यालयांतल्या शिक्षकांचेर विद्यार्थिनींचें लिंगीक शोशण केल्ल्याचो आरोप जालो आनी तांचे आड गुन्यांव लेगीत नोंद जाले. हाची दखल घेवन गोंय राज्य बाल अधिकार राखण आयोगान रोखडेंच शिक्षण खात्याक पत्र बरोवन अशे प्रकार घडचे न्हय म्हूण उपाय घेवपाक सांगलें. विद्यालयां भुरग्यां खातीर सुरक्षीत सुवात जावची आनी तांकां कसलेच तरेचे त्रास जावचे न्हय हे खातीर सरकारान काम करपाची गरज आसा. तेंवूय बी प्राधानान्यान आनी गंभिरतायेन…
म्हामार्गांच्या कुडक्या कुडक्यांचें उक्तावण करपाक जो खर्च करतात, ताच्या बदलांत जर शिक्षण मळाचेर भुरग्यांक सुरक्षेचो विस्वास तयार करून दिवपाक खर्च केल्यार त्या पयशांचो वालोर जातलो. ताचें स्रय सरकाराकच पालकां कडल्यान आनी जनते कडल्यान मेळटलें.
गोंय राज्य बाल अधिकार राखण आयोगाचे अध्यक्ष पीटर बॉर्जीस हांणी शाळांनी भुरग्यांक सुरक्षीत वातावरण मेळचें म्हूण यत्न चलयल्यात. तांणी बारीक बारीक गजालींचेर लक्ष दवरून संबंदीत खात्यांक आनी अधिकाऱ्यांक दक्ष करपाचो यत्न केला.
भुरगीं शाळांनी गिन्यान मेळोवपाक येतात. आपूण शिकून कोण तरी बरो व्यक्ती जातलो आनी बऱ्या पदाचेर काम करतलो अशें तांचें सपन आसता. तांच्या सपनांक बळगें दिवपाचें काम शाळांच्या वेवस्थापनां कडल्यान आनी सरकारा कडल्यानय जावप गरजेचें. नाजाल्यार लिंगीक शोशणा सारके प्रकार घडले जाल्यार भुरग्यांक शाळेंतल्यान भायर सरतना भिरांतीचें सांवट घेवन घरा वच्चें पडटलें. तातूंतलीं कितलींशींच भुरगीं दुसऱ्या दिसा परतून शाळेंत वचपाक फाटीं फुडें जातलीं. तांकां फाटीं दवरपाचें ना, तर मुखार वचपाक एक सुरक्षीत मार्ग करून दिवपाची जबाबदारी पालक शिक्षक संघानूय आपल्या भुजार घेवंक जाय.
भुरग्यांचेर लिंगीक शोशणाचे प्रकार जाले जाल्यार शाळांनी कितें पावलां घेवंक जाय हाची वळेरी गोंय राज्य बाल अधिकार राखण आयोगान तांकां धाडल्या. हे सगले नेम खरपणान चालीक लागपाची गरज आसा. भुरग्यांच्या भावनीक विश्वाक कसलेच तरेचे त्रास जावचे न्हय हाची खबरदारी घेवंक जाय.
पॉक्सो कायदो, 2012 खाला जीं पावलां मारपाक येतात तीं मुख्याध्यापकान मारूंक जाय अशें गोंय राज्य बाल अधिकार राखण आयोगान म्हणलां. ताचें पालन जावंक जाय.
विद्यालयांनी सीसीटीव्ही बसोवपाचें आयोगान सुचयलांच, तेच बरोबर भुरग्यांच्यो कागाळी मेळोवपा खातीर एक खासा ‘कम्प्लेंट बॉक्स’ लेगीत दवरचें, अशें आयोगान सुचयलां.
राज्यांत कितलेशेच कडेन तंबाकुच्यो जायराती दिसतात. बशींचेर लेगीत तंबाकुच्यो जायराती जातात हें गोंयकारांनी पळयलां आनी शिस्त नाशिल्ल्यान तंबाकू खावन उडयिल्लीं पाकिटां जळामळां दिसतात. हाचो परिणाम बालमनांचेर जाता. अशा गजालींची दखल घेवन गोंय राज्य बाल अधिकार राखण आयोगान हालींच हे प्रकार बंद करपा खातीर पावलां मारल्यांत. ‘पान मसाला’ (तंबाकू) कंपनींच्या जायरातींचे होर्डिंग्स बी लावंक परवानगी दिवची न्हय अशें आयोगान संबंदितांक शिटकायलां. हे विशीं आयोगान पंचायत खातें आनी पालिका प्रशासनाक बरयलां आनी तांणी कारवाय करची म्हूण मागलां. तशेंच जंय आदीं अशे तरेचे होर्डिंग्स लायिल्ले आसात, थंयच्या संबंदीत अधिकाऱ्याकय कारवाय करपाक सांगलां. जे कोण कारवाय करपाक पाळो दिनात तांचेर बाल हक्क कायद्या खाला कायदेशीर कारवाय जावंक शकता अशें आयोगान शिटकायलां.
भुरग्यांचे सुरक्षीतताये खातीर एक पावल मुखार मारतना, गोंय राज्य बाल अधिकार राखण आयोगान राज्याच्या मुखेल सचिवाक चीट बरोवन पुलीस स्टेशनांचेर भुरग्या संदर्भांतल्यो केशी सांबाळपा खातीर बायल पुलीस उपनिरिक्षकाची नेमणूक करपाची मागणी केल्या. अशें केल्यार भुरग्यांच्यो केशी हाताळप सोंप्यो जातल्यो आनी भुरग्यांक न्याय मेळपाक कुस्तार जावचें ना.
बाल कल्याण पुलीस अधिकारी नेमपाची ही मागणी पूर्ण जाल्यार घडये भुरग्यांच्यो केशी बेगीन हाताळप जातल्यो आनी तांकां न्याय मेळपाक शकतलो. सरकाराक हें करप कठीण ना. फक्त जाय ती इत्साशक्त. आयोगान दिल्ल्यो बऱ्यो सुचोवण्यो चालीक लागल्यो जाल्यार भुरग्यांचेर जावपी अत्याचाराचेर खंय तरी आळो बसपाक शकता. गुन्यांव करप्यांचेर जर कारवाय जालिना आनी ख्यास्त जालिना, जाल्यार आपल्याक पयलो गुन्यांव पचला म्हूण तो परत परत तोच गु्न्यांव करीत रावता. हे खातीर गुन्यांव जावपा पसून आडावपाची गरज आसा. विद्यालयां सयत हेर सुवातोय भुरग्यां खातीर सुरक्षीत जावपाची गरज आसा… गोंय सरकारान आयोगाच्यो सुचोवण्यो कानार घेवन त्यो चालीक लावच्यो आनी भुरग्यांक सुरक्षीततायेच्यो नव्यो दिशा दाखोवच्यो…. तांचीं मनां शेणपाक दिवचीं न्हय…
(लेखक ‘आयएएनएस’ हे राष्ट्रीय खबरां संस्थेचे गोंयचे मुखेल प्रतिनिधी आसात.)

संजय बोरकार
9921343430