भांगरभूंय | प्रतिनिधी
म्हत्वाकांक्षी आसप, करियर करप हातूंत कांय चूक ना. मात, तें करतना एकमेकांचे पांय ओडप, कारस्थानां करप, गोड उलोवन केंसान गळो कापप अशे प्रकार खूब जाण करतात. कालांतरान ताची संवय जाता आनी त्या मनशाच्यो भावना फातरा परस घट जातात. तो पक्को वेव्हारी जाता. वेवसाय, नोकरी, धंद्या सामकार तो नातीं पसून विसरता. हें फक्त दादल्यांचेच बाबतीत जायना, तर बायलोय तातूंत फिशाल जाल्यात. कांय जाणांच्या मतान घोव नाशिल्ल्यो बायलो चड येसस्वी जातात. पूण बरे भशेन संवसार, कर्तव्यां पुराय करून राज्य, देश गाजोवपीय जायत्यो बायलो आसात. येसस्वी जावपाक बंधनां आसपाक जायना, अशें कांय ना! दोन दिसां पयलीं गोंयाकूच न्हय, तर पुराय देशाक हालोवन उडोवपी घडणूक घडली. नात्याक खत लावपी, आवयपण, मनीसपण मातयेंत माड्डुपी हो प्रकार. एके आवयन पुताक जिवेशी मारलो. ‘माता न तूं वैरिणी’ अशें गीत रामायणांत पद आसा. भरत तें कैकयीक उद्देशून म्हणटा. मात सिकेरी हाॅटेलांत जें आवयन केलें तें कल्पना पसून करपा सारकें न्हय!
मेळिल्ले म्हायती प्रमाण, बंगळुरुंतले ‘माइंडफुल’ हे आर्टिफिशियल इंटेलिजन्स कंपनीची संस्थापक आनी सिइओ आशिल्ली ही सुशिक्षीत, पयशेकार बायल. 2021 वर्सा तिचें नांव (सुचना सेठ) 100 ब्रिलीयंट वूमन इन एआय एथिक्स लिस्टांत आयिल्लें. मूळ अस्तंत बंगालांतली. केरळांतल्या उद्देगपती कडेन तिचें लग्न जाल्लें. एक चलोय जालो. करियरांत उडणां मारपाचीं आसल्यार संवसार सांबाळीत काम करचें पडटा. घोव, बायलेक एकमेकां विशीं मोग आसचो पडटा. दुबावाची कीट पडपाक फावना. फक्त पयसो एके पयसो, करियर एके करियर करूनय उपकारना. घरांत चड मनशां आसल्यार तीं भुरगीं, संवसार सांबाळटात. मात ‘हम दो, हमारे दो’ प्रकारांत हें शक्य जायना. वावराडेंचेर भुरगीं पातयेवप सगल्यांकूच पटना. मागीर घोव- बायले मदीं वाद जातात. करियर काय व्यक्तीगत जीण? हे बायलेचे बाबतींत अशेंच जालां. केस्तांवांक विटून तिणें आनी घोवान वेगळें जावपाचें थारायलें. पूण चार वर्सांच्या चल्याची कस्टडी कोणा कडेन वतली, हाचे वयल्यान परत झगडीं जावपाक लागलीं. दोन दीस शांतीकायेन सारतलीं, अशें चिंतून ती चल्याक घेवन गोंयांत आयली. हांगाय इंडोनेशियाक गेल्ल्या घोवा वांगडा तिचें परत वाजलें. ह्या वेळार तिचें मानसीक संतुलन इबाडलें आसतलें आनी ते भिरकेन तिणें भयानक पावल उखल्लें. कांय खिणा भितर तिणें पुताचो खून केलो. स्वताय आत्महत्या करपाचो यत्न केलो खंय. कुडींत पडिल्ल्या रक्ताच्या दागा वयल्यान हाॅटेलाच्या कर्मचाऱ्यांक दुबाव आयलो आनी उपरांत पुलीस कागाळ जाली. तो मेरेन ती गाडयेंतल्यान बंगळुरुचे वाटेक लागिल्ली. ही गाडी हाॅटेलानूच मागयिल्ली. म्हणटकच पुलिसांनी त्या टॅक्सीकाराक फोन करून लागींच्या पुलीस स्टेशनार वचपाक सांगलें. चित्रदुर्ग पुलिसांनी गाडी तपासली तेन्ना बॅगांत चल्याची कूड मेळ्ळी. तिणें सांगलां तेंच कारण काय आनीक कित्याक लागून तिणें हें पावल उखल्लें तें कळटलेंच. तिचो घोवूय चित्रदुर्गांत पावला.
तिडक ही सामकी वायट. चडश्यांचे संवसार तिडक, इगो, भायलो नाद, अती म्हत्वाकांक्षा, कामांतूच घुस्पून रावप, वेसनांक लागून मोडटात. हे घडणुकेन एक कुटुंब उध्वस्त जालां. पयसो, प्रतिश्ठा आसून कितें उपकारता? तारतम्य बाळगून सारासार विचार करिनासतना पावल उखल्ल्यार कितें जाता, ताची ही देख. जीण पळोवंक नाशिल्लो तो चार वर्सांचो निश्पाप भुरगो मात आवयचे चुकीक लागून गेलो. तिका आतां ख्यास्त जातली. सुटली तरी जीणभर ही खंत, मानसीक घाय घेवन जगचें पडटलें. घोवाकूय त्रास, मनस्ताप जातलो. अश्वत्थामा सारकी ती जखम मर मेरेन सोंसची पडटली. असले प्रकार जायत्या कुटुंबांनी घडटात. त्या वेळार सगले षड्रिपू (काम, क्रोध, लोभ, मद, मोह आनी मत्सर.) कुशीक दवरून थंड तकलेन विचार करपाक जाय. समुपदेशकाचो सल्लो घेवपाक जाय. एक घाव दोन कुडके करपाचे आसल्यारूय उतावीळ जावन उपकारना. हें सिकेरीचे घडणुके पसून हेरांनी बोध घेतल्यार बरो!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
