भांगरभूंय | प्रतिनिधी
ऑस्ट्रेलियेच्या बायलांच्या क्रिकेट पंगडान भारताच्या बायलांच्या पंगडा आडची तीन मॅचींची टी-20 माळ 2-1 अशा फरकान जिखली. निर्णायक मॅचींत टॉस हारल्या उपरांत पयलीं बॅटींग करतना भारतान निर्धारीत 20 ओव्हरींनी 6 विकेटी वगडावन 147 धांवड्यो केल्यो. ऑस्ट्रेलिया पंगडान एलिसा हिली (55) आनी बेन मुनी (नाबाद 52) हांच्या अर्द शेंकड्या नेटार 18.4 ओव्हरींनी 3 विकेटी वगडावन 149 धांवड्यो करून जैत मेळयलें.
भारतान सुरवात सादूर केल्ली. शेफाली वर्मा आनी स्मृती मंधाना हांणी पयले विकेटी खातीर 39 धांवड्यांची भागिदारी केली. शेफालीन 17 बॉलांनी 26 धांवड्यो केल्यो. जाल्यार जेमिमा रॉड्रिग्स फकत दोन धांवड्यो करून सदरलॅण्डाची शिकार थारली.
9वे ओव्हरींत स्मृती मंधाना लेगीत 27 धांवड्यो करून तंबूंत परतली. पंगडाचो स्कोर 4 बाद 66 आशिल्लो, त्या वेळार ऋषा घोषान एक बाजू सांबाळून धरली. गार्डनराच्या बॉलाचेर बोल्ड जावचे पयलीं घोषान 28 बॉलांनी दोन चवके आनी तीन सक्यांचे मजतीन 34 धांवड्यो केल्यो. तशेंच दिप्ती शर्मान 18 बॉलांनी 14, अमनजोत कौरान 14 बॉलांनी दोन चवक्यांचे मजतीन 17 आनी पुजान 2 बॉलांनी सात धांवड्यो करून स्कोर 147 मेरेन पावयलो.
मोखीचो फाटलाव करपी ऑस्ट्रेलियेन उत्कृश्ट सुरवात केली. फॉर्मांत आशिल्ली मुखेली एलिसा हिलीन बेथ मुनी वांगडा मेळून पयले विकेटी खातीर 10 ओव्हरींनी 85 धांवड्यो केल्यो. हेलीन 38 बॉलांनी णव चवके आनी एका सक्याचे मजतीन 55 धांवड्यो केल्यो. ताहिला मॅकग्रान 15 बॉलांनी चार चवक्यांचे मजतीन 20 धांवड्यांचें योगदान दिलें. एलिसा पेरी ही पुजाच्या पयल्या बॉलाचेर बाद जाली. पूण, ते उपरांत मुनी आनी लीचफिल्ड हांणी आनीक विकेटी पडपाक दिल्यो ना आनी आपल्या पंगडाक 7 विकेटींनी जैत मेळोवन दिलें.
माळेंतली पयली मॅच भारतान 9 विकेटींनी जिखिल्ली, जाल्यार दुसरे मॅचींत ऑस्ट्रेलियेन 4 विकेटींनी जैत जोडून माळेंत 1-1 अशी बरोबरी सादिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
