भांगरभूंय | प्रतिनिधी
कॉन्ट्रॅक्ट किलरा कडेन 18 लाखांची कबलात
हैदराबाद, खबरां संस्था ः तेलंगणांत एके बायलेन (30) आपल्या ट्रांसजेंडर घोवाचो (35) कॉन्ट्रॅक्ट किलरा कडल्यान खून केलो. तिणें आपल्या घोवाक मारपा खातीर 18 लाख रुपयांची दोन जाणां कडेन कबलात केली. तातूंतले 4.6 लाख रुपया तिणें पयलींच दिल्ले. दोनूय कॉन्ट्रॅक्ट किलरांनी 11 डिसेंबराक घोवाचो खून केलो. ही बायल कांय दिसा सावन घोवा पसून वेगळी रावताली.
सुरवेक पुलिसांनी दुबावीत मरण अशें म्हणत मरणाची चवकशी करपाक सुरवात केली. तेन्ना चवकशे वेळार पुलिसांक मेळिल्ल्या पुराव्याचेर आदारून शेनवारा पुलिसांनी बायले वांगडा दोनूय खून करप्यांक अटक केली. ही म्हायती आयतारा उजवाडाक आयली. हे प्रकरण तेलंगणाच्या सिद्दीपेट जिल्ह्यांतले.
पुलिसांनी दिल्ले म्हायती प्रमाण, ह्या जोडप्याचें लग्न 2014 वर्सा जाल्लें आनी 2015 वर्सा तांकां भुरगें जालें. 2019 वर्सा घोव शस्त्रक्रिया करुन बायल जालो. तेन्ना सावन दोगांय वेगळीं रावतालीं. ही बायल खाजगी शाळेंत लेखाकार म्हणून काम करताली. ती आपल्या ट्रांसजेंडर घोवान आपल्याक आनी भुरग्याक पळोवचें अशी मागणी करताली. हाका लागून तिचो घोव तिका त्रास दिवपाक लागलो. बायलेच्या शाळेंत वचून तो तिका सतावपाक लागलो. ह्या गोंदळाक लागून शाळा वेवस्थापनान बायलेक कामा वेल्यान काडून उडयली. तेन्ना बायलेन रागान घोवाक मारपाचें थारायलें. तिणें दोन कॉन्ट्रॅक्ट किलरां कडेन संपर्क सादलो. तांणी ट्रांसजेंडर घोवाक बियर पियेवपाक आपयलो आनी ताचो खून केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
