भांगरभूंय | प्रतिनिधी
आमच्या ह्या माणकुल्या आनी सुपुल्ल्या गोंयांत रस्त्याचेर अबसुयेग खूब वाडल्यात. रस्त्यार अपघात नासतना एकूय दीस वचना म्हणल्यार फट जावचें ना. कितले लोक जखमी जातात. कितले मरतात, हें नियाळूंक जायना. आदीं असो एक काळ आसलो, जेन्ना एक अपघात जाल्यार मनीस जखमी जाल्यार वा मेल्यार ते रगताचे व्हाळ पळोवन आंगार कांटो उबो जातालो. आयज तें घडना. कित्याक शेंकड्यांनी अपघात जातात. मनीस रगताचे व्हाळ जातात हें सगळें पळोवपाची आमकां संवय जाल्या.
कारणां
अबसुयेग कित्याक घडटा? आमचे रस्ते सारके बिगडल्यात म्हूण? रस्त्यार चलपी येरादारीचे कायदे मानीनात, रस्त्याचो सारको वापर करीनात म्हण? वा वाहनां चलोवपी चालक बेजबाबदार चलयतात म्हण? हय ह्या कारणाक लागून अबसुयेग घडटा हातूंत मातूय दुबाव ना. पूण तीच कारणां म्ह्त्वांचीं न्हय. अदीक म्हत्वाचें कारण म्हणल्यार रस्त्यांचो वापर करपी लोकां भितर ट्रॅफिक सॅन्स ना आनी हाका लागून अपघातांत अदीक प्रमाणें घडटा.
जबाबदारी
वायट रस्त्याक लागून अपघात घडटा. हें कोणाच्यान ना म्हणपाक जायना. त्या खातीर आमचे रस्ते बरे तरेन सांबाळून दवरपाची गरज आसा. गांवांनी रस्ते सांबाळपाची जबाबदारी ग्राम पंचायतीची आसता. शारांनी रस्त्यांचो परामर्स करपाचें कार्य नगरपालिकेचें आसता जाल्यार व्हडले रस्ते जांकां पी. डब्लू. डी. रोड्स म्हणटात ते सांबाळ करपाचे कर्तव्य सरकाराचें आसता. जे हाय- वे रस्ते आसात. तांचो सांबाळ केंद्र सरकार करता. पयले सुवातेर ह्या ऑथरिटीस म्हणल्यार ग्राम पंचायतीं, नगरपालिका, राज्य सरकार, वा केंद्र सरकार आप- आपली जबाबदारी प्रमाणीकपणें पाळटात काय? रस्ते सांबाळपाक खातीर कोटींनी दुडू मोडटात. पूण रस्त्याची कॉलिटी मात सकयल्या पांवड्याची आसता. हांचें कारण आमच्या सरकारांत चलता तो भ्रश्टाचार. आमी एक मनांत दवरूंक जाय. रस्ते बरे कॉलिटीचे जावंच्या भ्रश्टाचार नास केल्या शिवाय आनी रस्त्याचेर मरणां उणीं जावंची ना. रस्ते निवळ जाल्या शिवाय.
पांय– चलपी
रस्त्यार भोंवपी बेजबाबदार पांय- चलपी हांकां लागून जायते अपघात घडटात. सायकल चलोवपीय अबसुयोग घडयता. पूण चडांत -चड अपघात करतात ते मोटार सायकल चलोवपी तरणाटे आसतात. ते सगळ्यां कायद्यांक मस्तून मोटार सायकलीं चलयतात. कायदे मोडून चलयतात पूण पुलीस तांकां कसलीच ख्यास्त फावो करीनात. अपघात जाल्या उपरांतूच, कोण वा मेल्ल्या उपरांतूच पुलीस एक्शन घेतात. बेजबाबदारेन चलोयतल्यांची आदीं फुडेंच कारवाय केल्ली जाल्यार अपघात जरूल थोडे जातले आशिल्ले. आदल्याचीं इंग्लेज भाशेंत एक म्हणणीं आसा. ‘Prevention is better than cure? हे म्हणीचो अर्थ आमच्या पुलीस सायबांक कळना काय? येरादारीचे नेम कांय जाण मात लेगीत पाळिनात. सोरो पियेवन वाहनां चलयतात. दुस-या मोटारींक सायड मारतना उजव्यान वा दाव्यान नातर खंयचेय वाटेन वतात. कांपरो निर्माण करतात. मोबायलांचेर उलयत- उलयत वाहन चलयतात. स्पीड – लिमीट पळयनासतना वेगान वचून अपघात करतात. निरपराधी लोकांक जिवेशी मारतात.
इत्सा जाय
सांगतात त्या प्रमाणें, गोंयांत 80 टक्के अपघात पी.डब्लू. डि.च्या रस्त्यांचे तशेंच हाय-वेचेर जातात खंय. पंचायत वा नगरपालिका वाठारांत भोव थोडे अबसुयोग घडटात खंय. अशें जालें जाल्यार आमचे येरादारी पुलिसांनी हाचेर उपाय घेवंक जाय. गोंय इतलें ल्हान आसा कीं, आमच्या गोंयांत हाचेर उपाय घेवंक जायना जाल्यार आनीक खंयच्याच प्रांतांक तें जावंचें ना. कित्याक? गोंय हें ल्हान प्रांत गोंयांत हाचेर उपाय घेवंक जायना जावन आसा. गोंयच्या येरादारी अधिका-यांनी हाचेर बारीक नियाळ करपाची गरज आसा. रस्त्यावेले अपघात आनी मरणां कमी करपाक आमकां कापस्ताद आसा म्हण तांणी दाखोवपाची गरज आसा. ते करपाक फकत इत्सा आनी पोटतिडक जाय.
ख्यास्त
गोंयांत ज्या रस्त्यांचेर परतून परतून अबसुयोग जातात ते जागे पळयात. थंय येरादारी अडचण नासतना वचपाक उपाय घेयात. येरादारी नेम मोडटल्यांक कडक ख्यास्त दियात. कायद्यान ड्रायविंग लायसन्स सस्पेंड करपाची तरतुद आसा, जाल्यार तें स्थगीत करात. व्हडले राजकारणी वा दुसरे इनप्लूएन्शल मानेस्तांनी चूक केल्यार चे व्हड मनीस म्हण तांकां सोडूं नाकात. तांकांय कडक ख्यास्त दियात. कोणाकच भियेनासतना मेकळेपणान तुमचें कर्तव्य पाळांत. आनी राजकी फुडा-यांनी पुलीस घेतात ते एक्शन निर्फळ करूंक तुमी तांच्या वावरांत मेंतेर जायनाकात. अशें घडलें जाल्यार रस्त्यांचेर जातात ते अपघात आनी मरणां जरूल उणीं जातलीं.
सोंपयतना..
रस्त्यांचेर जातात ते अपघात आनी मरणां उणीं करप हें सरकाराचें कर्तव्य जावन आसा. आमचें गोंय खूब ल्हान आसा. लोकूय शिकिल्लो आसा. त्या खातीर गोंय अपघांत मुक्त करपाक सरकाराची मोख आसूंक जाय. हे विशय गोंयांक खूब म्हत्वाचें आसा. कित्याक? जेन्ना एक अबसुयोग जाता. फामिलींतलो वांगडी मरता. तेन्ना ते फामिलींची दुर्दशा जाता. तें भोगलां ताकाच कळटा…
(लिप्यांतर : विशाल सिनाय खांडेपारकार, 8080622370)
तोमाझीन कार्दोज
9822170102
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
