भांगरभूंय | प्रतिनिधी
खूब तेंपान हांव मडगांवच्या सकयल्ल्या बाजारांतल्यान चलून वतालें. आतां सकयल्लो बाजार म्हणल्यार खंयचो बाजार तें पयलीं सांगचें पडटलें. तर हो सकयल्लो बाजार म्हळ्यार पोरणो बाजार, ओल्ड मार्केट, दामोदर साल काडून जो रस्तो मेळटा थंयच्यान हो सकयल्लो बाजार सुरू जाता आनी कोलव्यां जार्दिनाच्या मुखार भांगराचीं दुकानां आनी कपड्याचीं दुकानां हाचे मदीं जें मार्केट आसा तो वयलो बाजार वा न्यु मार्केट.
ह्या सकयल्ल्या बाजारांत काम्राची म्हळ्यार म्युन्सिपाल्टीची एक पोरणी इमारत आसा. एका तेंपार ही इमारत खरेंच सुंदर आशिल्ली. आतां मोडपाक तेंकल्या. जीर्ण जाल्या, तरीय सोबीत दिसता. हांगाच्यान वतना सदांच म्हजी नदर ह्या इमारतीचेर वता. तशी आजूय गेली आनी हांव पळयतूच उरलें इमारतीचेर एक वाल चडिल्ली आनी नाजूक अशे इल्ल्या इल्ल्या फुलांचे गुलाबीच घोंस थंय लांबताले. आरे! हीं फूलां तर भुरगेपणांत आमकां खूब आवडटालीं! खूब वर्सां जालीं दिश्टी पडल्यार.
हरशीं येतना वतना ह्या इमारतीचेर नदर वता, पूण फुलां केन्ना पळयल्लीं याद जायना. घडये वाल थंयच आसताली, पूण घडये म्हजी नदर गेल्ली तेन्ना फुलांचो मोसम बी नाशिल्लो दिसता. बेश्टींच हंगाम नासतना फुलां फुलतात तर! तांचोय म्हूणन एक सिझन आसता फुलपाचोपरमळ दिवपाचो
आमच्या कोंबांतल्या घरामुखारल्यान एक रस्तो सरळ चडटेर वता. थंय एका घरार ही वाल फुलिल्ली आसताली. तेन्ना हीं गुलाबी फुलां आमचेर भुरळ घालतालीं. तांचेर भोंवताले रंगरंगयाळे फुलपांखे! हालींच सकयल्ल्या बाजारांतल्यान येतना हांव त्या पायणींतल्यान वयर सरलें. पळयत जाल्यार अजुनूय तें घर आसा. हीं आमचीं दूद कोल्डींगाचीं फुलां त्या बंद घराचेर पातळ्ळ्यां. हय, आमी तांकां दूद कोल्डींगाचीं फुलां म्हणटालीं.
दूद कोल्डींग ! आतां दूद कोल्डींग म्हळ्यार कितें तें म्हाका सारकें सांगपाक कळचें ना. तो एक अणभव. आमचे पिळगेनूच घेतला तो. लग्न सुवाळ्याचे खास पेय. दूद कोल्ड्रींकाचें दूद कोल्डींग कशें जालें कोण जाणां. पूण ह्या गुलाबी पेयाक दूद कोल्डींगूच म्हणिल्लें आयकलां हांवें.
काचेच्या ग्लासांत गुलाबीच पेय आनी भितर गुलगुलीत तुपमिरयां. आतांच्या भाशेंद फालुदा सिड्स. एकदां एका लग्नाक दूद कोल्डींग करपाची क्रिया हांवें पळयिल्ली. व्हडलो आलिमेनचो तोप, तातूंत दूद, दुदांत साकर, आनी राजबेरीचें तांबडें सरबत. ह्या सरबताचो रंग तांबसर आसतालो. पूण दुदांत घालतकच गुलाबीच रंग येतालो. निमाणे घालतालीं फुगिल्लीं तुपमिरयां आनी व्हडलो झेलाचो कुडको. असल्या झेलाद दूद कोल्डींगान भरिल्ले ग्लास बी पियेवप म्हळ्यार अमृत पिल्ले भशेन. आमी दुसरो ग्लास पिवपाक मेळटा काय म्हणून वाट पळयतालीं.
तर ह्या दूदकोल्डींगाचो कोर आनी ह्या फुलांचो कोर एक्काभशेन कोणाक सुचलें काय हें नांव? याद जायना पूण आमी म्हणटालीं तें मात खरें. हें नांवूंय ह्या फुलांक ज्युस्त सोबता. ह्या फुलांचें इंग्लिश नांव खंय आयसक्रिम क्रिपर म्हळयार दूदकोल्डींगाक लागीचें. पूण फुलांचें मूळ मात खूब खूब पयस. सामकें मॅ्क्सिकोंत उत्तर अमेरिकेंत. तेखातीर चडश्या भारतीय भासांनी ह्या फुलांक नांव ना. बांगला भाशेंत मात आसा. ‘‘अनंतलता’’ घडये कोंकणींतूय वेगळें नांव आसुंये. पूण दुसरें नांव मेळ्ळें जाल्यार लेगीत म्हजे खातीर मात तीं दूद कोल्डींगाचींच फुलां.
हर्षा शेटये
9850530152
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
