भांगरभूंय | प्रतिनिधी
भारत आनी अफगाणिस्तान ह्या पंगडां मदीं 11 जानेवारी सावन तीन टी-20 मॅचींची माळ जातली. हे माळे खातीर भारतान आपल्या पंगडाची घोशणा करूंक ना. पंगडाची घोशणा 5 जानेवारीक जातली अशें जाहीर केल्लें. पूण, त्या दिसा पंगड जाहीर जालो ना. मजगतीं, शुक्रारा उसरां आयसीसीन अंदूं जावपी संवसारीक टी-20 सर्तीचें वेळापत्रक जाहीर केलें.
कोणाची निवड करची आनी कोणाक भायर दवरचो अशी भारताचे निवड समिती मुखार समस्या उप्रासल्या. रोहीत शर्मा आनी विराट कोहली हे अणभवी खेळगडे माळेंत खेळुये. तशेंच अश्टतासांचो खेळगडो हार्दिक पांड्या आनी आक्रमक बॅट्समन सुर्यकुमार यादव हे दोगूय जखमी आसात. ताका लागून ते अफगाणिस्ताना आडचे माळेंत खेळचे नात हें आदींच निश्चीत जालां. तांचे गैरहाजेरे मुखार अजीत आगरकराच्या अध्यक्षतायेखालचे निवड समितीची कोंयडी जाल्या.
तशेंच माळेंत फुडारपण कोण करतलो रोहीत शर्मा काय शुभमन गिल हे विशीं लेगीत निवड समितीक निर्णय घेवपाक कठीण जालां. कारण निवड समिती मुखार श्रेयस अय्यर आनी रवींद्र जडेजा हांच्या रुपान लेगीत मुखेलपदा खातीर पर्याय आसा.
अंदूंची संवसारीक टी-20 सर्त नदरे मुखार दवरून फुडल्या पांच म्हयन्यांची तयारी करची काय फुडारांतलो विचार करून एक युवा खेळगडो तयार करप हे विशीं निवड समितीच्या वांगड्या मदीं एकमत जावंक ना.
तशेंच फुडारांत टी-20 फॉर्मेटांत खेळपा विशीं रोहीत शर्मा आनी विराट कोहलीक तांचें विचार विचारिल्ले. दोगांयनी ह्या फॉर्मेटाक आपूण उपलब्ध आसात अशें स्पश्ट सांगलां. दोगांकूय आंतरराष्ट्रीय टी-20 खेळ्ळ्यार बरोच तेंप जाला. ऑस्ट्रेलियेंत जाल्ले संवसारीक टी-20त इंग्लंडा आड जाल्ले सेमी फायनलींत रोहीत आनी कोहली खेळिल्ले. तेन्ना सावन ते आंतरराष्ट्रीय टी-20 पसून पयस आसात.
फुडाराचो विचार करून साबार येवजण्यो तयार करप आनी तरणाट्यांक चडांतचड संद दिवपा विशीं निवड समिती विचार करता.पूण, रोहीत शर्मान हालींच मुखेली आनी बॅट्समन म्हूण बरें प्रदर्शन केलां. ताका लागून निवड समितीक रोहीताचेर आडनदर करप सोंपें आसचें ना. निवड समिती खेरीत मुखेल प्रशिक्षक राहुल द्रविडाची हे विशीं म्हत्वाची भुमिका आसतली.
अफगाणिस्तानाचो पंगड जाहीर
भारता आडचे टी-20 माळे खातीर अफगाणिस्तानान आपल्या 19 वांगड्यांच्या पंगडाची घोशणा केली. इब्राहीम झद्रान फुडारपण करतलो. राशीद खानाचे गैरहाजेरेंत इब्राहीमाच्या फुडारपणाखाला अफगाणिस्तानान माळ 2-1 अशी जिखिल्ली. राशीद खानाचें पुनरागमन जालां. हालींच ताचे फाटींचेर ऑपरेशन केल्ल्यान ताका युएई आडची माळ चुकिल्ली.
अफगाणिस्तान पंगड: इब्राहिम झद्रान (मुखेली), रहमानउल्ला गुरबाज (विकेटकीपर), इकराम अलीखिल (विकेटकीपर), हजरतुल्ला झझाई, रहमत शाह, नजीबुल्ला जद्रान, मोहम्मद नबी, करीम जनात, अजमातुल्ला ओमरझाई, शराफुद्दीन अश्रफ, मुजीब उर रहमान, फजलहक फारूकी, फरीद अहमद, नवीन उल हक, नूर अहमद, मोहम्मद सलीम, कैस अहमद, गुलबदिन नायब आनी राशिद खान.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
