भांगरभूंय | प्रतिनिधी
संदीचो फायदो
पावसाचे दीस चालू आसतात. एका गांवांत हुंवाराची परिस्थिती निर्माण जाता. ताका लागून लोक तो गांव सोडून वचपाक लागतात. त्या गांवांत एक देवूळ आसता. तातूंत एक भटजी आसता. त्या भटजीचो देवाचेर खूब विस्वास आसता. जेन्ना त्या गांवचे लोक गांव सोडून वता तेन्ना ते त्या भटजीकूय आपल्या वांगडा येवपाक सांगता. पूण भटजी तांकां ‘‘आपल्याक देवाचेर विस्वास आसा. देव आपलें रक्षण करतलो. आपूण हांगाच्यान खंयच वच्चो ना. देव म्हाका नक्की पावतलो.’’ अशें सांगता आनी तांकां थंयच्यान वचपाक लायता.
कांय वेळान उदकाची पातळी आनीक वाडटा आनी पुराय गांव ल्हव ल्हव करून व्हांवून वचपाक लागता. तेन्ना एकलो मनीस भटजीच्या घरा मुखारच्यान पेंवत वता. पेंवतना तो भटजीक पळयता आनी ताका म्हणटा, ‘‘भटजी, म्हज्या वांगडा यो. हांव तुका म्हजे फाटीर मारून गांवां भायर व्हरता.’’ पूण भटजी ताचेंय कांय एक आयकना. तो त्या मनशाक थंयच्यान वचपाक सांगता. देव आपलें रक्षण करतलो म्हणटा.
कांय वेळान एक व्हडें भटजीच्या घरा मुखारच्यान पासार जाता. मात भटजी तातूंतय बसना. उदकाची पातळी भटजीच्या गळ्या मेरेन पावता. इतल्यान थंय एक हॅलिकॉप्टर येता आनी भटजी मुखार शिडी उडयता. पूण भटजी आपल्याक देव राखतलो अशें म्हणीत तांकांय थंयच्यान वच म्हणटा. निमाणें हुंवाराचें उदक वाडटा आनी भटजीचें घर बुडटा. तातूंत भटजीय बुडटा आनी ताका मरण येता.
भटजीन बरीं कामां केल्ल्यान मरणा उपरांत तो सरळ सर्गान वता. थंय ताका देव मेळटा. देवा कडेन तो कागाळ करता. तो म्हणटा ‘‘हांव तुजो इतलो व्हडलो भक्त आसून लेगीत तुवें म्हाका कित्याक वाटोवंक ना?’’
तेन्ना देव हांसतूच म्हणटा, ‘‘हांवें तुका वाटावपाक एक मनीस, एक व्हडें आनी एक हेलिकॉप्टर धाडिल्लें. पूण तुवें दिल्ले संदीचो फायदो घेवंक ना. तुवें आपल्या हट्टीपणाक लागून सगळ्यो संदी होगडायल्यो.’’
हें आयकून भटजी कपलार हात मारता.
देख : जिणेंत अश्यो जायत्यो संदी येतात आनी वतात. पूण तुमचें कल्याण करपा खातीर आयिल्ली संद वळखून तिचो योग्य तरेन फायदो घेवचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
