भांगरभूंय | प्रतिनिधी
ब्लूमबर्ग बिलियनर्स इंडेक्साच्या म्हणण्या प्रमाण, अदानी ग्रुप ऑफ कंपनींचे चेअरमन गौतम अदानी हांणी परतून एक फावट रिलायन्स इंडस्ट्रीजचे चेअरमन मुकेश अंबानी हांकां फाटीं घालून भारताचो सगळ्यांत गिरेस्त मनीस जाला. संवसारीक क्रमवारींत अदानी पयल्या १२ क्रमांकाचेर पावला, जाल्यार अंबानी १३ वे सुवातेर आसा.
अदानी गटाचे मुखेली गौतम अदानी हे हालींच तांचे गिरेस्तकायेंत जाल्ले वाडीक लागून आशियांतले सगळ्यांत गिरेस्त मनीस जाल्यात. अदानी आनी अंबानी ह्या दोगांयचीय क्रमवारी फाटल्या वर्सा परस सुदारल्या. गौतम अदानी हांची संपत्ती फाटल्या २४ वरांत ७.६ अब्ज डॉलर वाडल्या. मुकेश अंबानी हांची संपत्ती ९७ अब्ज डॉलर आसा. फाटल्या २४ वरांत तांची निव्वळ संपत्ती ६६५ दशलक्ष डॉलर वाडल्या.
३ जानेवारी २०२४ दिसा अदानी- हिंडेनबर्ग प्रकरणांत सर्वोच्च न्यायालयान दिल्ल्या निकाला उपरांत गौतम अदानी हांचे कंपनींचे शेअर दर नेटान घटमूट जाल्ल्यान तांची संपत्ती वाडल्या. अदानी- हिंडेनबर्ग प्रकरणांत सेबीन केल्ली चवकशी समाधानकारक आसा अशें सांगून सर्वोच्च न्यायालयान बाजार नियंत्रक सेबीक वट्ट २४ प्रकरणांतल्या उरिल्ल्या २ प्रकरणांची चवकशी करपा खातीर आनीक ३ म्हयने दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
