सुकणें : अर्दो नर, अर्दी मादी
भांगरभूंय | प्रतिनिधी
नवी दिल्ली, खबरां संस्था : कोलंबियांत मेळिल्ल्या शेवण्याची उजवी बाजू नराची आसा जाल्यार दावी बाजू मादी सारकिल्ली आसा. ह्या शेवण्याक लागून पक्षीशास्त्रज्ञ अजापीत जाल्यात.
शेवण्यांचो मोगी जॉन मुरिलो हो कोलंबियाच्या डॉन मिगेल अभयारण्यांत शेवणी पळयत आसतना ताका एक विचित्र शेवणें दिसलें. हेर शेवण्यां परस तें सामकें वेगळें आशिल्लें. वाइल्ड ग्रीन हनीक्रीपर अशी ह्या शेवण्याची जात. ताचे दावे पाखाटें पाचव्या रंगाचें आनी उजवें निळ्या रंगाचें आशिल्लें. पूण विशेश गजाल म्हळ्यार हे जातींत पाचवें पाखाटें मादींचें आनी निळें नरांचें आसता. आतां ह्या खाशेल्या शेवण्यात दोनूय रंगाचें पाखें आशिल्लें म्हळ्यार हें शेवणें अर्द नर आनी अर्द मादी आशिल्लें.
जॉन मुरिलो हाणें पळयल्लें हें शेवणें फाटल्या शंबर वर्सांत नोंद जाल्लें अशें फकत दुसरें शेवणें.
शेवणें कशें जल्मलें?
थंयच्या पेशींच्या क्रोमोझोम्सांक लागून मादी आनी नर दोगांय सारकें पाखें जालां आसतलें अशें स्पेंसर सांगता. हार्मोनांतल्या बदलां कडेन ताचो संबंद नासूं येता. किडी, फुलपाखें, विचू आनी कुल्ली ह्या सारक्या कवचधारी जनावरां, कोळी, पालींच्या प्रजाती आनी हुंदीर हांचे मदीं अशीं लक्षणां दिसतात. पेशी विभाजन करतना कितें तरी चुकलां आसूंक जाय, ताका लागून दोन शुक्राणू दोन फावटीं गर्भधारणा जावन ह्या शेवण्याचो जल्म जाला अशें स्पेंसर म्हणटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
