वेबसायट खरी वा बनावट ते वळखुपाचे मार्ग

भांगरभूंय | प्रतिनिधी

जायते वेळार वेबसायटींतल्यान बऱ्यो ऑफरी येतात. त्या ऑफरींत तुमकां तुमचे विशीं म्हायती दिवची पडटा. तुमी जायते फावटीं म्हायती भरतात आनी मागीर कळटा ती वेबसायट बनावट आशिल्ली. जायत्या लोकांक खऱ्या आनी फट वेबसायटींतलो फरक कळना आनी मागीर तांची फटवणूक जाता. वेबसायट वळखुपाक जायते मार्ग आसात.

वेबसायटीचें युआरएल (URL)

खऱ्या संकेतथळांच्या युआरएलांत चड करून कंपनीच्या वा संघटणेच्या नांवा कडेन जुळपी डोमेन नांव आसता. देखीक, तुमी Amazon च्या संकेतथळाक भेट दितात जाल्यार, URL “https://www.amazon.in/” अशें आसतले. युआरएलांत कंपनी वा संघटनेचें नांव ना वा विचित्र/अस्पश्ट आसल्यार, ती बनावट वेबसायट आसूं येता.

वेबसायट डिझायन

मुळ संकेतथळां चड करून वेवसायीकांच्या आदारान बरी डिझायन आनी तयार केल्लीं आसतात. वेबसायटीची डिझायन वायट आसल्यार वा तातूंत चुको आसल्यार ती बनावट वेबसायट आसूं येता.

वेबसायट सामग्री

खऱ्या वेबसायटीची सामुग्री विश्वसनीय आनी प्रामाणित आसता. संकेतथळाच्या सामुग्रींत चुकीची म्हायती वा चुको आसल्यार ती बनावट वेबसायट आसूं येता.

वेबसायटीची सुरक्षीतताय

मूळ संकेतथळांचेर चड करून सुरक्षीत जोडणी (HTTPS) आसता. वेबसायटीच्या पत्त्याचेर HTTPS ना जाल्यार ती बनावट वेबसायट आसूं येता.

संपर्क तपशील संकेतथळार उपलब्ध ना जाल्यार

खऱ्या संकेतथळार कंपनीचो वा संघटनेचो पत्तो, फोन क्रमांक आनी ईमेल पत्तो दितात. संकेतथळार संपर्क तपशील ना जाल्यार वा संपर्क तपशील चुकीचो वा अस्पश्ट आसल्यार ती बनावट वेबसायट आसूं येता.

वेबसायटीचेर सोशल मिडिया लिंक्स

मुळ संकेतथळांचेर चड करून कंपनी वा संघटनेच्या सोशल मिडिया पानांचे लिंक्स आसतात. जर वेबसायटीचेर सोशल मिडियाचे लिंक्स नात, वा लिंक्स खोटे आसल्यार ती बनावट वेबसायट आसूं येता.

वेबसायट खरी आसा काय ना हाची खात्री ना जाल्यार तुमी कंपनी वा संघटनेचेर ऑनलायन संशोधन करूंक शकतात. तुमी कंपनी/संस्थेचें नांव गूगल वा हेर सर्च इंजिनांत सोदूंक शकतात. तशेंच कंपनीच्या वा संघटनेच्या सोशल मिडिया पेजींक भेट दिवंक शकतात.

बनावट वेबसायटीं पासून स्वताची राखण करपा खातीर….

० तुमच्या ब्राउझरांत सुरक्षा सेटिंग्ज सक्षम करात.
० अनवळखी मनशान धाडिल्ल्या लिंकाचेर क्लिक करप टाळचें.
० तुमची वैयक्तीक म्हायती वेबसायटीचेर शेअर करचे पयलीं जतनाय घेयात.