भांगरभूंय | प्रतिनिधी
संदी वरवीं बरें तशेंच वायटूय आमचे कडल्यान घडटा. आमच्या अंतस्कर्णांत आमी हात घालून, हे विशीं आमी आमकांच प्रस्न करुंक जाय. आमकां आनी समाजाक फायद्याक पडटा तें करुंक आमकां मेळिल्ले संदीचो वापर करप ही काळाची गरज.
टोनी एका इश्कोलांत हिशोबनीस (accountant) कसो वावुरतालो. ताका कोणाचीच पर्वा नासली. आपल्याक जाय तेन्ना येतालो आनी वतालो. ताका वेवस्थापना कडल्यान शिटकावणी मेळिल्ली. तरूय आसताना असली जीण जियेवंची ताका संवय जाल्ली. हिशेब बरयताना खर्च चडोवन बरयतालो. हें करुंक ताणें क्लार्काचो आदार मागलो. त्या क्लार्कान सातवीकपण दाखयलें आनी हे वरवीं ताची येवजण फिस्कटावन उडयली. तेन्ना तो अशें उदगारलो, “म्हाका एकूच संद मेळूं दी…” एका दिसा तो क्लार्क कचेरेंत उसरां पावलो. हीच बरी संद घेवन ताणें मुख्याद्यापिकेक वचूंन सांगलें. तिणें त्या क्लार्काचेर कारवाय केली. दुसऱ्यांचो बदलो घेवूंक ताणें मेळिल्ल्यो संदी घेतल्यो.
आमचे जिणेचे वाटेर आमकां साबार संदी मेळटात. सगळ्योच आमी घेतात अशें न्हय. थोड्यांचेर आमी दुर्लक्ष करतात जायत. आमचे मदलीं जायतीं जणां संद मेळटा काय म्हूण वाट पळेवून रावतात. ही तांची वागणूक बरी आनी वायटूय जावंक शकता. थोडीं वयल्या घडितांतल्या टोनी भशेन बदलो घेवूंक संदीचो वापर करतात जाल्यार थोडीं मोग शिंपडायतात. अंजली ‘त्या’ घराब्याची सून. फिरगोज गंवळीक सभेंत ( Parish Pastoral Council) सक्रीय तरेन वांटो घेताली. तिचीं शेजारीं तर तिका वेगळेच नदरेन पळेतालीं. तिणें कितेंय बरें करूं, तांचे नदरेन तिणें केल्लो वावर व्यर्थ. तिची सासूमाय पासून तिका किकोंत ( worthless) करताली. इतलें आसुनूय अंजली आपलें बरेपण शिंपडायताली. सासूमायची मोगान सेवा करताली. अकस्मात एका दिसा तिची शेजान्न पिडेंत पडली. ती चड करून तिचेर टिकेचो शिंवर घालताली. तिका हाॅस्पिटलांत व्हरुंक कोणूच नासलो. अंजलीन हीच संद घेतली आनी तिका मोगान आपली सेवा दिली.
आमकां संद मेळ्ळ्यार आमी कितें करीत, कसलो निर्माणकारी वावर जायत वा नाशक कार्याक पाखां फुटत म्हूण सांगूंक जायना. साबार फावटी आमी विच्यार करिनासताना देवान दिल्ल्या फुकट देण्यांचेर आमकां जाय तसो निर्णय घेतात. आमी घेतलले निर्णय आमकां आनी आमच्या मनिसपणाक सोबतात जाल्यार चिंतूंक पासून आमी फाटीं सरतात वा तशें करुंक आमकां वेळ ना. संद आमच्या वांट्याक सदांच येना. आमकां मेळटा तेन्ना ती आमी घेवूंक जाय. तिचो वापर मात फावो ते रितीन केलो जाल्यार आमी मारिल्लें पावल शाणेपणाचें थारता.
आमकां मेळटल्यो संदी आमी कशे तरेन घेतात, हाची जाणविकाय आमी आपणायलले वागणुकेंतल्यान दिसून येता.
# बदलो घेवप: दुसरो आमच्या येवजण्याक हयकार दिना जाल्यार वा आमकां जाय तशें घडुंक आदार तांचे कडच्यान मेळना जाल्यार, आमकां मेळ्ळले संदिंतल्यान आमी “टीट फाॅर टेट” वृत्ती आपणावन दुसऱ्यांचो बदलो घेतात.
# देण्यांचो वापर : जायतीं जणां मेळिल्ली संद घेवन आपल्या देण्यांचो वापर करतात. रचणार देवाचे म्हयमे खातीर आपले गूण वेव्हारांत घालतात. खूप बरी गजाल.
# सुख-दुख वांट्टात: आमी मनशां भावनीक आनी आत्मिकूय. जिणेची वाट तांकताना चडटी- देंवती आमकां मेळटा. कांय जणांक असल्या परिस्थितिंक फुडो करुंक आडखळी जातात. असल्या वेळार संद मेळटा तेन्ना जिणेंतलें सुख- दुख दूसऱ्यांक वाट्टात आनी तात्पुरते तरी समाधान मेळोवन घेतात.
# अधिकाराचो गैर- वापर: आमच्या मदल्या जायत्या जणांक अधिकार आसा. वेगवेगळ्या पदांचेर आमी वावुरतात. आमच्या हाता खाला आसलल्यांक सतावूंक जाय जाल्यार आमकां मेळिल्ली संद आमी सोडिनांत. दुसऱ्यांक सतावून आमी आमची पदवी दाखयतात. खरें म्हळ्यार आमकां आशिल्ल्या अधिकाराचो आमी गैरवापर करून खुशाल जातात.
# मोग, सेवा आनी हुस्को दाखयतात : एकदां ट्रेनीत भितर सरताना, महात्मा गांधीची एक व्हाण सकल पडली. ताणें हीच संद घेवन आपली दुसरीय व्हाण सकला उडयली. ताच्या म्हण्ण्या परमाणें व्हाणो घालिनासताना जायतो गरीब लोक आसा. तांकां तरी ह्या व्हाणांचो वापर करूं दी. गांधी भशेन आमच्या समाजांत जायतीं मनशां आसात. संवसाराचो सडवणदार जेजू क्रिस्त तर आपल्याक मेळिल्ली संद मोग, सेवा आनी हुस्को परगटूंक वापरताले. ताची जिणूच मोग, सेवा आनी हुसको. अशे साबार तरेन आमी संदीचो वापर करतात. संद मेळ्ळ्या म्हूण तिचो दुरुपेग केलो जाल्यार दुसऱ्यां वांगडा आमीय सुख- समाधानान जियेवूंक शकचीं नात. हें करुंक आमचे वृत्तीत बदल हाडूंक आमकां मसलतदाराचो आदार घेवंचो पडत.
संदी वरवीं बरें तशेंच वायटूय आमचे कडल्यान घडटा. आमच्या अंतस्कर्णांत आमी हात घालून, हे विशीं आमी आमकांच प्रस्न करुंक जाय. आमकां आनी समाजाक फायद्याक पडटा तें करुंक आमकां मेळिल्ले संदीचो वापर करप ही काळाची गरज. हे वरवीं जिणेचे वाटेर मेळटल्या मोडां- तुफानांक फुडो करून एक सुखी जीण जियेवूक आमी आमकांच आदार करपाचीं.
– जॉन एम्. आल्फोंसो, कार्मेलीत (लोलयें)
7666519837
.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
