भांगरभूंय | प्रतिनिधी
खबरां संस्था ः हालींसराक ल्हान भुरगीं चुकीच्या मार्गार वतात अश्यो कितल्योश्योच घडणुकी आमकां आयकूपाक मेळटात. अशीच एक धक्को दिवपी घडणूक आंध्र प्रदेशांत घडल्या. पडंग पडिल्ल्या एके इमारतींत नव्या वर्साच्या निमतान 6 वी- 7 वेंत शिकपी इकरा- बारा वर्सांचीं भुरगीं बिर्याणी बरोबर बियर पार्टी करतना दिसलीं. सुरक्षा रक्षक आनी शाळेच्या ड्रायव्हराक ही गजाल लक्षांत आयले उपरांत तांणी थंय वचून व्हिडियो काडलो आनी ही घडणूक उजवाडाक आयली.
नेमकें कितें घडलें?
हो प्रकार आंध्र प्रदेशांतल्या अनाकपल्ली जिल्ह्यांतल्या चोडावरम मंडल वाठारांत घडलो. सुमार 16 भुरगीं 31 डिसेंबराचे रातीं नव्या वर्साची पार्टी करपाक जमिल्लीं. हीं सगळीं भुरगीं सवी, सातवी आनी धावी वर्गांत शिकतात. ह्या भुरग्यांच्या पार्टीचो व्हिडियो सध्या सोशल मिडियाचेर व्हायरल जावपाक लागला. आनी तो शाळेच्या ड्रायव्हरान काडला अशें म्हणटात.
व्हायरल व्हिडियोंत कितें आसा?
ह्या व्हिडियोंत भुरगीं एके बंद इमारतीचे कुडींत बसल्यात. तांचे मुखार बियरीच्यो बाटल्यो आसात. ही इमारत भुरग्यांच्या हॉस्टेलाच्या लागीं आसा असो उल्लेख ह्या व्हिडियोंत केला. नव्या वर्साक येवकार दिवपाक चले बियर आनी बिर्यानीचो आस्वाद घेताले. उपरांत थंय आयिल्ल्या सुरक्षा रक्षक आनी शाळेच्या ड्रायव्हराक नशेंत आशिल्ल्या ह्या भुरग्यांनी गाळी घाल्यो. ह्या भुरग्यां वांगडा थंय दोन अनवळखी लोक पार्टी करतालें अशें दिसून आयलें.
हीं सगळीं भुरगीं नेण्टीं आशिल्ल्यान हो चर्चेचो विशय थारलां. भुरग्यांच्या पालकांनी रोखडोच शाळा वेवस्थापना कडेन संपर्क सादलो. ही घडणूक नेण्टे भुरग्यां कडेन संबंदीत आशिल्ल्यान शाळा वेवस्थापनान तांची वळख वा हेर म्हायती संबंदी फुडलो तपशील उक्तो करपाक न्हयकार दिला. पूण ह्या प्रकरणाची प्राथमीक चवकशी करपाचो आदेश दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
