भांगरभूंय | प्रतिनिधी
नवी दिल्ली, खबरां संस्था : सामान्य लोकांची बरे तरेन वेवस्था जावची देखून भारतीय रेल्वे बेगीनूच सुपर अॅप सुरू करपाची तयारी करता. भारतीय रेल्वेच्या ह्या अॅपाची सगळ्यांत खाशेली गजाल म्हळ्यार वापरप्यांक वेगवेगळ्या सेवां खातीर फोनाचेर वेगवेगळे अॅप ह्यान फुडें स्थापन करपाचो हुस्को आसचो ना. भारतीय रेल्वेचो हो सुपर अॅप आयिल्ल्यान वापरप्यांक ह्या एकाच अॅपांत तिकीट बुकींग, पीएनआर स्टेटस चेक आनी रेल्वे ट्रॅकिंगाची सुविधा मेळटली.
फक्त भारतीय रेल्वेच्या या सुपर अॅपांत UTS (अनारक्षित तिकीट प्रणाली), Rail Madad आनी NTES (National Train Inquiry System) वरवीं ऑफर केल्ल्यो विवीध सुविधायो मेळटल्यो.
भारतीय रेल्वेचें हें सुपर अॅप आयल्या उपरांत विंगड विंगड सेवां खातीर वेगवेगळ्या अॅप्सांनी मल्टीटास्किंगची गरजूय सोंपतली. रिपोर्ट्स प्रमाण हें अॅप विकसीत करपा खातीर वट्ट ९० कोटी रुपया खर्च येवपाक शकता आनी हें अॅप विकसीत करपाक आनी कांय वेळ लागतलो.
भारतीय रेल्वेचें हें सुपर अॅप सेंटर फॉर रेल्वे इन्फॉर्मेशन सिस्टम म्हळ्यार CRIS वरवीं विकसीत करता. आतां ह्या अॅपा वरवीं वयर दिल्ल्यो सेवाच मेळटल्यो? काय आनीक सेवा ह्या अॅपा वरवीं दितले? असो प्रस्न सध्या आसा.
रेल्वेच्या सुपर अॅपा वरवीं तुमकां फकत तिकेट बुकींग, पीएनआर स्टेट्स चेक आनी ट्रेन ट्रॅकिंगचो लाव घेवपाक मेळचोना. जाल्यार फ्लायट तिकेट बुकींग, ट्रेनींत जेवण डिलिव्हरी अश्या सुविधांचोय लाव घेवपाक मेळटलो. सरकाराचें उमंग अॅप जे तरेन एकाच अॅपा वरवीं लोकांक जायत्यो सेवा दिता ते प्रमाण रेल्वेचें हें सुपर अॅप लोकांक एकूच न्हय तर खुबश्यो सेवा दिवपाच्या हेतान सुरू करतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
