भांगरभूंय | प्रतिनिधी
नवी दिल्ली, खबरां संस्था: हिट अँड रन कायद्याचेर देशभर चर्चा सुरू आसा. ट्रक चालकांनी हे संबंदी रस्तो लेगीत आडायलो. उपरांत सरकारान आतां हो कायदो चालीक लावचो ना अशें आश्वासन दिलां. हें सगळें जाल्या उपरांत रस्त्यांचेर जावपी अपघातांचो उल्लेख जावपाक लागलो. भारतांत दर वर्सा हजारांनी लोकांक रस्त्याच्या अपघातांत मरण येता. रस्त्यार जावपी अपघातांचो आंकडो सामको भिरांकूळ आसा.
कायद्याचो निशेध
खरें म्हळ्यार भारतीय न्यायीक संहितेच्या तरतुदी आड रस्त्यार निदर्शनां जालीं. जातूंत रस्तो अपघातांत हिट अँड रन प्रकरणांत चडांत चड १ वर्सांचे शिक्षेची तरतूद आसा. तशेंच ७ लाख रुपयांच्या खर दंडाचीय तरतूद आसा. हो कायदो सगळ्या तरेच्या वाहनांक लागू जातलो तरी हाचो चड परिणाम ट्रक चालकांचेर जातलो अशें ट्रक चालक सांगतात.
देशांतल्या अपघातांचो आंकडो
पयलीं सांगूंया देशांतल्या हिट अँड रन केशींचो आंकडो. २०२१ वर्सा हिट अँड रनाच्यो ५७४१५ केशी नोंद जाल्यात, तातूंत २५ हजारां परस चड लोकांक मरण आयलें. २०२२ वर्सा हो आंकडो ६७,३८७ मेरेन वाडलो आनी ३० हजारां वयर लोकांक मरण आयलें. भारतांत रस्त्याचे अपघात वाडत आसात.
धक्को दिवपी आंकडो
रस्त्यार जावपी अपघातांचो आंकडो पळयल्यार तुमकां धक्को बसतलो. २०२२ वर्सा भारतांत वट्ट ४ लाख ६१ हजारां परस चड रस्त्याचे अपघात जाले. तातूंत १ लाख ६८ हजार लोकांक मरण आयलें. अंदूं दर दिसा १२६४ रस्तो अपघात जाल्यात तातूंत ४६२ जाणांक मरण आयलें. खरें म्हणल्यार देशांत दर वराक ५३ रस्तो अपघात जातात आनी तातूंतल्यान १९ जाणांक मरण येता. आतां दर मिण्टांत रस्त्याच्या अपघातांचेर नदर मारल्यार भारतांत दर मिण्टाक रस्त्याच्या अपघातांत तीग जाणांक मरण येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
