एक असोय बल्ब, शंभर वर्सा परस चड काळ चालू
भांगरभूंय | प्रतिनिधी
गिनीज पुस्तकांत “लाँगेस्ट बर्निंग लाईट ब्लब” नांवान नोंद
न्यूयॉर्क, खबरां संस्था ः आजकालचे इलेक्ट्रीक बल्ब फकत कांय म्हयने, चडांत चड तर एक वर्स तिगून उरतात. पूण अमेरिकेंतल्या कॅलिफोर्निया शारांत शंबर वर्सां परस चड काळ सतत चलपी एक बल्ब आसा. हो कार्बन फिलॅमेंट बल्ब 1901 वर्सा सावन आसा आनी ताका सेंटेनियल बल्ब [Centennial Bulb] अशें नांव दिलां. हो खाशेलो बल्ब अमेरिकेंतल्या कॅलिफोर्निया हांगाच्या लिव्हमोर उजो पालोवपी दळ विभाग क्रमांक 6 हांगा लायला. इतलेंच न्हय तर गिनीज पुस्तकांतय ताची नोंद जाल्या. ह्या बल्बाक तांणी “लाँगेस्ट बर्निंग लाईट ब्लब” अशें नांव दिलें. हो बल्ब ओहायो हांगा 1899 ते 1900 ह्या काळांत शेलबी इलेक्ट्रीक कंपनीन हातांन तयार केल्लो आनी 1901 वर्सा लिव्हमोर पॉवर आनी वॉटर कंपनीचो धनी डेनिस बर्नाल हाणें लिव्हमोर उजो पालोवपी दळाक हो बल्ब दिल्लो.
हो बल्ब पयलेच खेपे एल स्ट्रीटचेर उजो पालोवपी दळांत लायिल्लो आनी 1976 वर्सा मेरेन तो सतत चालू आसलो. पूण एल स्ट्रीट वयल्यान सद्याच्या विभाग 6 कडेन हो दिवो व्हरा मेरेन फकत 22 मिनटां खातीर तो बंद दवरलो अशें गिनीज बुक ऑफ वर्ल्ड रेकॉर्डांत म्हणलां.
हो दिवो आनीक शंबर वर्सां काम करतलो अशें “अ मिलियन आवर्स ऑफ सर्व्हिस, द सेन्टेनिअल लाइट बल्ब फॅक्ट्स अँड हिस्ट्री” ह्या पुस्तकाचे लेखक टॉम मानता. असो एक वेळ येतलो की हो दिवो बंद जातलो. कारण खंयचीय वस्त केन्ना ना केन्ना नश्ट जाता. पूण तंत्रगिन्यानांतली ही लगळ्यांत उत्कृश्ट कामगिरी, अजापीत करपी येस जावन आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
