भांगरभूंय | प्रतिनिधी
लोकसभा वेंचणुकेचें वर्स निमाणें उदलें. प्रधानमंत्री नरेंद्र मोदी हांची ‘श्रीराम एक्सप्रेस’ आड राहूल गांधी हांची ‘भारत न्याय यात्रा’ अशें कांयशें स्वरूप लोकसभे खातीर फुडल्या चार म्हयन्यांत जावपी लडायेक मेळ्ळां. प्रधानमंत्री नरेंद्र मोदी हांची श्रीराम एक्स्प्रेस अयोध्येंतल्या राम मंदिरांत रामल्लाची प्राणप्रतिश्ठा जावचे पयलींच देशांत सगले कडेन तुफान धांवतना दिसता, जाल्यार काँग्रेसीची सगली आस्त आतां जिचेर चड निंबून आसा ती राहूल गांधी हांची भारत न्याय यात्रा मकरसंक्रातीच्या म्हुर्तार इम्फाळ हांगच्यान सुरू जातली. लोकसभा वेंचणुकेंत भाजपाच्या श्रीराम एक्स्प्रेसी सामकार आपल्या ‘इंडी’ गठबंधनाचो कांय तिगाव लागचो नाा हें वळखून काँग्रेस पक्षान घडये राहूल गांधीक न्याय यात्रेर धाडपाचो निर्णय घेतला आसुये. एके वटेन केंद्रांतल्या सत्तारूढ भारतीय जनता पक्ष लोकसभा वेंचणुके खातीर पुरायपणान सज्ज जाल्लो आसतना काँग्रेस पक्ष आतांच हातपांय हालयतना दिसपाक लागला. तातूंत भर म्हणून, अयोध्येंतल्या श्रीराम मंदिराच्या उबारणेचें काम पुराय जावपा कडेन आयिल्लें आसतनाच काँग्रेसीक केंद्रांतल्या सत्तेच्या मार्गान एका फाटल्यान एक अशी व्हडलीं विघ्ने येवपाक लागल्यांत अशें चित्र स्पश्ट दिसपाक लागलां. आतां नरेंद्र मोदी हांच्या श्रीराम एक्स्प्रेसीक आडावपा खातीर रामलल्लाची प्राण प्रतिश्ठा जावपाचे आठ दीस रावन राहूल गांधीची भारत न्याय यात्रा सुरू करून काँग्रेस नक्की कितें सादपाक सोदता हें कळपाक मार्ग ना.
अयोध्येंतल्या श्रीराम मंदिराची उबारणी आडावपा खातीर जांणी सर्वोच्च न्यायालयांत बावीस वकिलांची फौज उबी केल्ली त्या काँग्रेस पक्षा खातीर तोच राम आतां व्हडली आडमेळीं जावन तांच्या मार्गांत उबो रावला. सहन करपाक येना आनी सांगपाकूय येना अशा दुखण्यान काँग्रेस पक्षाक सध्या पुरायपणान पछाडलां आनी ताचेर भारत न्याय यात्रा होच उपाय आसा अशें तांकां दिसता. राहूल गांधी 14 जानेवारी सावन इम्फाळच्यान मुंबय मेरेन 67 दिसांच्या न्याय यात्रेक वतलो. आतां काँग्रेस पक्षान भारत न्याय यात्रेचो निर्णय घेवचे पयलीं ‘इंडी’ गठबंधनांतल्या हेर सहकारी पक्षां कडेन विचारविनिमय करप अपेक्षीत आशिल्लें पूण थंय ते कमी पडिल्ल्यान गठबंधनांतले खूबशे पक्ष आतां काँग्रेसी पसून पयस वचपाक लागल्यात. काँग्रेस पक्ष येता ते लोकसभा वेंचणुकेंत पुरायपणान एकटो तर पडचो ना अशेंय कांयशें चित्र तयार जाता. घडये काँग्रेस पक्षाक गंठबंधनांतल्या हेर घटक पक्षांचो एकूण रुख कळून आयिल्ल्यान तांणी भाजपा आड आपबळार दोन हात करपाचो निर्णय घेवन सगल्यांक काळखांत तर दवरलें नात मूं, असो दुबाव कांय जाणांक येवपाक लागला. भाजपा कडेन लडपाची ताकद सध्या काँग्रेस पक्षा कडेन ना. गठबंधनाच्याे मर्यादा वेंचणूक जसजशी लागीं येतली तश्यो चड उक्तडार येवपाक लागल्यात. काँग्रेस पक्षाचो सध्याचो पवित्रो पळयल्यार लोकसभा वेंचणुकेंत विरोधी पक्ष चडूचन फाफुडला अशे दिसता ताचें कोणाक अजाप दिसपाचें कारण ना.
राहूल गांधी हांच्या पयलींच्या भारत जोडो यात्रेन काँग्रेस पक्षान अशें कितें जोडलें कीं तांकां वेंचणुकेच्या तोंडार नव्यान चौदा राज्यांची यात्रा ते सुरू करतात. ह्या प्रस्नाची जाप कोणे तरी दिवपाक जाय. राहूलान विदेशांत वचपा पसून आडावपा खातीर ताच्या गळ्यांत ही यात्रेची जापसालदारकी घातली आसुये असो तर्क कोणेय काडलो जाल्यार तो चुकीची म्हणपाक जावचो ना.
भारत जोडो यात्रेन कर्नाटक आनी हिमाचलांत काँग्रेसीक सतेर हाडलें अशे मानल्यार राजस्थान, मध्य प्रदेश आनी छत्तीसगड ह्या तीन राज्यांत हो चमत्कार कित्याक घडलो ना, हाचोय विचार करचो पडटलो. कर्नाटक आनी हिमाचल प्रदेशांतली विधानसभा वेंचणुकेंतल्या काँग्रेसीच्या येसा फाटलीं कारणां वेगळींच आशिल्लीं. पूण ताचें स्रय राहूल गांधीच्या भारत जोडो यात्रेक दिवपाची घाई केली आनी हेर राज्यांनी काँग्रेस नाकान आपटली. आतां नरेंद्र मोदी हांची ‘श्रीराम एक्सप्रेस’ देशांत सगले कडेन तुफान धांवतना राहूल गांधीची न्याय यात्रा काँग्रेस पक्षाक न्याय कसो मेळोवन दितली हें एक हुमाणेंच आसा. मणिपूरचो मुद्दो देशा सामकार नव्यान व्हरपा खातीर काँग्रेसीन इम्फाळच्यान यात्रेक सुरवात करची हें समजूंग शकता. पूण महाराष्ट्रा मेरेन 67 दिसांचे यात्रेंत अस्तंत बंगाल, उत्तर प्रदेश, बिहार ह्या राज्यांत निमाणें काँग्रेस पक्ष कोणा कडेन न्याय मागतलो आनी तांकां थंय किदें अपेक्षीत आसा हें कळपाक मात मार्ग ना. राहूल गांधी हेर राज्यांतल्या मतदारां कडल्यान ताचेर जाल्ल्या अन्याया आड दाद मागतलो जाल्यार ताच्या पदरांत नेमकें किदें पडटलें हाचो विचार करपाक येवचो ना तरी पक्ष कार्यकर्त्यां मदीं मात्शी उमेद हाडपाचें काम हे यात्रेच्या निमतान जातलें आशिल्लें हातूंत दुबाव ना.
लोकसभेचे येता ते वेंचणुकेंत भाजपाचो चौफेर धांवत आशिल्लो अश्वमेध आडावप काँग्रेस आनी तांच्या गठबंधनाचे तांकी भायलें आसा हें आतांच अधोरेखीत जाल्लें आसतना राहूल गांधीच्या भारत न्याय यात्रेन कितें सादतलें हाचो विचार केल्यार तातूंत पदरांत कितें पडटलें अशें खुद्द काँग्रेसीक घडये दिसना जायत, पूण लोकसभा वेंचणुकांच्या प्रचाराक निदान यात्रेच्या निमतान कांय जायना सुरवात केल्ल्चाचें समाधान तांकां मेळपाक शकतलें. राहूल गांधी हांची 67 दिसांची यात्रा ज्या चौदा राज्यांतल्यान वतली त्या चौदा राज्यांत फाटल्या लोकसभा वेंचणुकेंत काँग्रेसीच्या वांट्याक वट्ट 355 जाग्यांतले फकत चार टक्के म्हणल्यार चौदाच जागे आशिल्ले, जाल्यार भाजपान 67 टक्के म्हणल्यार 236 जागे जिखिल्ले. ह्या चौदा राज्यांतल्या मतदारांनी काँग्रेसीचेर केल्लो घोर ‘अन्याय’ हातूंत दिसून येताशिल्ल्यान घडये राहूल गांधीची ही न्याय यात्रा ह्या चौदा राज्यांतल्यान वचना जायत. राहुल गांधी कडल्यान ताच्या पक्षाक आनीक एक अपेक्षा आसतली ती म्हणल्यार चौदाय राज्यांत फाटले वेंचणुकेंत जिखिल्ले 14 जागे हे खेपे राखून दवरपाची.
काँग्रेसीची सद्याची दुरावस्था पळयल्यार राहूल गांधीक हे चौदा जागे राखून दवरपाक येस आयलें तरी खूब जालें अशें म्हणपाक मेळटलें. उत्तर प्रदेश, अस्तंत बंगाल, बिहार ह्या राज्यांत राहूल गांधी हाची न्याय यात्रा थंयचें एकंदर वातावरण चडूच इबाडपाक शकता अशें जायत्या जाणांक दिसता, जाल्यार हेर राज्यांतूय काँग्रेसीचें अस्तित्व लागीं लागीं सोंपपा कडेन आयलां. अशे परिस्थितींत राहूल गांधीच्या नव्या यात्रे कडल्यान कोणूय चड आस्त बाळगून आसत जाल्यार तांच्या पदरांत निर्शेणीच पडपाची शक्यताय आसा.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
