स बँकांची गिरायकांक नव्या वर्साची भेट

भांगरभूंय | प्रतिनिधी

मुंबय, खबरां संस्था ः वर्स सोंपचे पयलीं देशांतल्या स बँकांनी गिरायकांक नव्या वर्साचीं भेट दिल्या. भारतीय स्टेट बँक ते कोटक महिंद्रा मेरेन भोवतेक बँकांनी गिरायकांक व्हड समाधान दिलां. आतां बँक ऑफ बडोदाचें नांवूय हे वळेरेंत जोडलां. ह्या बँकांच्या निर्णयाक लागून गिरायकांक व्हड फायदो जातलो. ह्या स बँकांनी फिक्स डिपॉजिटचो (FD Interest Rate Hike) व्याजदर वाडयला. हे वळेरेंत खंयच्यो स बँको आसात तें पळोवया.

बँक ऑफ बडोदा – वर्साच्या निमाण्या म्हयन्यांत ह्या बँकांनी फिक्स डिपॉजिट दर वाडयलां. हालींच बँक ऑफ बडोदानूय व्याजदरांत वाड केल्या. बँकेन विंगड विंगड मुदतीच्या एफडीचेर व्याजदर १० बेसीस पॉयंट्सांनी १२५ बेसीस पॉयंट्स तशेंच ०.१० टक्के ते १.२५ टक्क्यां मेरेन वाडयल्या. ही वाड २ कोटी रुपयां उण्या आशिल्ले एफडी खातीर केल्या.

स्टेट बँक ऑफ इंडिया – भारतीय स्टेट बँक ऑफ इंडियानूय २ कोटीं परस उणे रक्कमेच्या एफडींचेर व्याज दर वाडयला. ते प्रमाण ७ ते ४५ दिसांच्या एफडीचेर ०.५० टक्क्यांची वाड केल्या. जाल्यार ४६ -१७९ दिसांच्या एफडीचेर ०.२५ टक्क्यांची वाढ केल्या. जाल्यार, १८०-२१० दिसांच्या एफडीरूय ०.५० टक्क्या मेरेन वाड केल्या. २७ डिसेंबर २०२३ सावन हे बदल लागू जाल्यात.

कोटक महिंद्रा बँक – कोटक महिंद्रा बँकेन एफडीचेर व्याजदरांत वाड केल्या. हातूंत तीन ते पांच वर्सांनी मॅच्युर जावपी एफडीचेर व्याजदरांत वाड केल्या. आतां बँकेंत एफडी करपी सामान्य गिरायकां खातीर २.७५ टक्के ते ७.२५ टक्के आनी ज्येश्ठ नागरिकां खातीर ३.३५ टक्के ते ७.८० टक्के अश्या विंगड विंगड काळा खातीर व्याज दिता.

डीसीबी बँक – डीसीबी बँकेन २ कोटी रुपयां परस उणे एफडीचेर विंगड विंगड कालावधी खातीर व्याजदर वाडयला. ह्या बदला उपरांत १३ डिसेंबर सावन नवें व्याजदर लागू केलां. व्याजदरांत वाड केल्या उपरांत सात दिसां सावन ते १० वर्सांचे मुदतीचे एफडीचेर आतां ३.७५ टक्के ते ८ टक्के व्याज दितलें. जाल्यार ज्येश्ठ नागरिकांक ४.२५ टक्के ते ८.६० टक्के व्याज दितात.

फेडरल बँक – फेडरल बँकेन ५०० दिसांच्या एफडीचेर व्याजदर वाडयलां. बँकेन ५ डिसेंबर २०२३ सावन नवें दर लागू केलां. हाचे वरवीं आतां ७.५० टक्के व्याजदर दिता. जाल्यार ह्या काळा मेरेन गुंतवणूक करपी ज्येश्ठ नागरिकांक ८.१५ टक्के व्याज दिता. २१ म्हयने ते तीन वर्सां परस उण्या काळाच्या एफडीचेर सामान्य गिरायकांक ७.३० टक्के जाल्यार ज्येश्ठ नागरिकांक ७.८० टक्के व्याज मेळटा.