डँड्रफाची समस्या सतायता? हे उपाय करून पळयात
भांगरभूंय | प्रतिनिधी
शिंयाच्या दिसांनी कांत सुकी पडटा. तशेंच माथ्यार डँड्रफ (कोंडो )जावपाक लागता. माथ्यार डँड्रफ जावप म्हळ्यार तकली दुखपाचेंय कारण थारूं येता. डँड्रफ माथ्यांत चड वाडल्यार तें लजेचें कारण थारूं येता.
डँड्रफाक लागून केंसांचीं मुळां दुबळीं जावंक लागतात आनी केंस पडपाची समस्या सुरू जाता.
जायते फावटीं शिंयाच्या दिसांनी डँड्रफाचो प्रस्न इतलो वाडटा, तो तकलेवयल्यान कपड्यांचेर आनी तोंडार पडटा. कपड्यांचेर डँड्रफ पळोवपाक बुरसो दिसता. तशेंच तोंडार पिंपल्स जातात. डँड्रफाच्या त्रासांतल्यान मुक्त जावपा खातीर कांय घरगुती उपाय करून पळयात.
लिंबाचो रोस – डँड्रफ प्रॉब्लेम पयस करपाक लिंबू हो एक बरो घरगुती उपाय. नाल्ल, ऑलिव्ह तेल वा सांसवाच्या तेलांत लिंबाचो रोस घालून तो माथ्याक लावचो. आनी सुमार देड वरां उपरांत केंस धुवचे. हो उपाय सप्तकांतल्यान दोन ते तीन फावटीं करचो. तशेंच अर्ध्यां लिंबाचो रोस उदकांत पिळून केंस धुवचे. ह्या उपायान तुमचो डँड्रफ रोखडचो ना जातलो.
ऍपल सायडर व्हिनेगर आनी मुलतानी माती – मुलतानी मातयेचो वापर केंस धुवपा खातीर आदीं सावन करतत. डँड्रफ पयस करपा खातीर मुलतानी माती ऍपल सायडर व्हिनेगरांत मिक्स केंस धुयात. सप्तकांतल्यान दोन फावटीं हो उपाय केल्यार डँड्रफ बेगीन उणो जावपाक मजत जाता.
कांद्याचो रोस – जायत्या केंसांच्या तेलांतूय कांद्याचो रोस वापरूं येता. माथ्या वयलो डँड्रफ पयस करपा खातीर कांद्याचो रस लायात आनी केंस धुवपाच्या एका वा अर्द वरा पयलीं ताळयेची मालीश करात. अशें केल्यार डँड्रफा वांगडा केंस गळतीथ थारतली.
ह्यो गजाली लक्षांत दवरच्यो
जर तुमकां डँड्रफाची समस्या आसल्यार रातभर केंसांक तेल लावं नाका. वांगडा केंस धुवपाच्या एका वरा पयलीं तेल लायात अशें केल्यार ताळी ओली उरतली. भरपूर उदक पियात. इतलें करूनय डँड्रफाची समस्या पयस जायना जाल्यार दौतोरांचो सल्लो घेवप गरजेचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
