भांगरभूंय | प्रतिनिधी
गेलें बाबा गेलें, खंयच्यानूच गेले, तरणें आसलें पोरणें जावन गेलें, आमचें मदें रावन जायतें ताणें केलें, वायट बरें हांगाच सोडून गेलें….. आल्फ्रेड रोझ हांचें नव्या वर्साचें हें कांतार. नकळटां 2023 सोंपलें आनी आमी 2024 वर्सांत पावल घालें. पोरुंची सगल्यांत व्हडली घडणूक म्हणल्यार इस्रायल- हमास झूज. जमनीच्या हक्का खातीर चलिल्ले हे लढायेंत हजारांनी निश्पाप लोकांक मरण आयलें. अब्जांनी डाॅलरांची मालमत्ता नश्ट जाली. आमच्या देशांत चंद्राचेर चांद्रयान देंवप हें विज्ञानीक मळा वयलें सगल्यांत व्हडलें जैत. 370 वें कलम रद्द करपाचो केंद्र सरकाराचो निर्णय सर्वोच्च न्यायालयान योग्य थारायलो. कुस्ती पेलवानांचें आंदोलन, नवी संसद… लोकसंख्येचे बाबतींत आमी नंबर वन थारले, ते 2023 वर्साच. आनिकूय ल्हान, व्हड म्हत्वाच्यो गजाली घडल्यात. गोंयांत टायगर रिझर्व्ह, पेडणें झोनींग प्लान गाजलो. 1- 1 वर्स येता, वता. मात, आमी त्या वर्सांत जावपी प्रसंगांचेर शांत चित्तान विचार करपाक जाय. तांचे पसून बोध घेवपाक जाय. नव्या वर्सांत पावल दवरतना आमचे मदलो दुस्वास, तिडक पोरण्यां वर्सांतूच सोडून मुखार वचपाक जाय. समाज, गांव, राज्य मुखार व्हरपाक, मनशाची सर्वांगी उदरगत करपाक सगलेच योगदान दिवपाक शकतात, हें कोणें विसरचें न्हय. ह्या नव्या वर्सांत सकारात्मकताय आंगांत केळोवया, नवे संकल्प करुया. वर्सभर तरी ते पाळुया.
सध्या मेळत तो गोंय काबार जालें अशें न्हयकारत्मक उलयतना दिसता. म्हणल्यार गोंयच्यो जमनी भायल्यांच्या ताब्यांत गेल्यात. सगले उद्देग, वेवसाय तांणी हातासल्यात. कोणाक लागून हें जालां, अशें विचारल्यार म्हणटात, सरकाराक लागून! उरिल्ल्यांचें मत फक्त गोंयकारांक लागून!! अर्थांत हातांत निर्णय घेवपाची तांक आशिल्ले हाका चड जापसालदार आसात. कांय जाणांनी स्वताच्या अर्थीक फायद्या खातीर हें केलां खंय. हातूंत मात पसून तथ्य ना, अशें म्हणपाचें धाडस गोंयकाराक जावचें ना. हांव साव, तो चोर, अशेंय कोणाक म्हणपाचो अधिकार ना. कारण वाल्या कोळ्याच्या पापांत सगलेच वांटेकार आसात. भायल्यांच्या हाता खाला काम करपाचो वेळ गोंयकारांचेर आयला, ही गजाल खरी. ताका लागून सरकारी यंत्रणांनी थळावे नोकरदाता निर्माण जातले, हे खातीर आनीक चड नेटान यत्न करूंक जाय. नव्या वर्सांत दरेकल्यान हो संकल्प करचो. वेवसायिका फाटल्यान ताची फुडली पिळगी त्या वेवसायांत देंवता. मात त्या वेवसायाचे एकाचे दोन जाताच अशें ना. कश्ट करपी गोंयकार सोंपल्यात. शिक्षणाच्या प्रसाराक लागून हालींचे पिळगेक ते करपाची तशी गरजूय ना. देखून बरींच मळां रिकामी उरपाक लागल्यांत. म्हणटकच भायले थंय येतलेच. तरीय लोकप्रतिनिधींनी सरकारी वा हेर नोकऱ्यो, वेवसायांत थळाव्यांकूच प्राधान्य दिवपाक जाय.
फाटल्या 10- 20 वर्सांचो नियाळ केल्यार गोंयकार हेरां परस फाटीं पडिल्ल्याचें दुखदिणें चित्र दिसता. सगल्या मळां वयल्या गोंयकार धनयांचो आंकडो कांयसो देंविल्लो दिसता. गोंयांत कॅसिनो (जुगार ही वायटूच गजाल), दर्यादेगां वयलीं नवीं हाॅटेलां वा हेर वेवसाय, सरकारी मळां वयलीं काॅण्ट्रेक्टां, भलायकी सेवा, येरादारी- रस्ते बांदकाम…. आनीक जायतीं व्हडलीं कामां, वेवसाय आसात. कितले गोंयकार ताचे धनी आसात? कांय कडेन तांची भागिदारी आसत! ज्या वेवसायांत आपूण वावुरतात, ताचो कितल्या गोंयकारांनी विस्तार केला? उरफाटे नीज गोंयकारांचे कांय उद्देग, वेवसाय बंद पडल्यात. नव्या वर्सा ह्या अर्थीक मळाचेर कितें तरी भव्य, दिव्य करपाचो संकल्प करुया. न्हय करचोच.
गोंयांतल्यो जमनी, दोंगर, बाजारांतलीं दुकानां कांय तेंपान गोंयकारांचीं उरचींनात, अशी खंत, तिडक गोंयकार उक्तायतात. पूण, हें सगलें विकपी, भाड्यान चलोवपाक दिवपी आमी गोंयकारूच. खीणभर आमी हें विसरतात. नव्या वर्सा आमची जमीन, दुकानां, वेवसाय कोणाक विकचे नात, असो एक मायभुंयेचो मोग दाखोवपी संकल्प करप शक्य आसा? यत्न तरी करुन पळोवया! राज्यांत येरादारीची कोंयडी, अपघात वाडल्यात. ते उणें करपाक जाय. घुंवळे वखदां राज्यभर शिंपडल्यांत. तीं ना नपयत करपाचीं आसात. हप्तेवाले, कमिशन एजंट, खंडणी बहाद्दर दिसतात, तांकां आळो घालपाचो आसा. आवाजाचें प्रदुशण सतायता. चोरयो सदच्योच जाल्यात. पर्यटकांचे गोंया विशींचे गैरसमज पयस करपाचे आसात…. घेवया, तर हे संकल्प आनी ते पूर्ण करपाचो संकल्प करुया!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
