भांगरभूंय | प्रतिनिधी
“हें कितें? आयज कपलार हात धरून शे बसल्यात?” ‘मिड डे टी’ मेजार दवरीत घरकान्नीन म्हणलें. सकाळचो नाश्तो करतकच इकरा जालीं की म्हाका च्या लागता. ती घेतले बगर म्हाका सूख लागना. म्हजें लक्ष खंयच लागना. म्हजो दीस बरो वचना. निवृत्त जावन घरा बसत सावन तें म्हजे आंगवळणी पडलां आनी तिकाय ती संवय जाल्या. घरांतल्या लंबकान ( घडयाळीच्या) इकरा फावटीं ट्यॅंव ट्यँव केलें की घरांतलीं कितलींय कामां आसूं, घरकान्न सगलीं कामां कुशीक दवरून गॅसीर म्हजे खातीर च्या उडयता आनी म्हजे आवडीची कार्रेगाद च्या घेवन येता. ते च्याचो तिणेंच बारसो केला आनी तिका ‘मिड डे टी’ अशें नांव दवरलां.
“काडात पळयात तो हात कपला वयलो. चड वेळ कपलार हात दवरल्यार माथ्या वयले केंस खंय बेगीन पिकतात आनी गळून पडटात.” म्हज्या माथ्या वयले उरिल्ले सुरिल्ले केंस तोखणायेन पळयत तिणें म्हणलें.
“तुजे चुलतकाकीच्या मांवाच्या मामाचे मेवणेल्या बापोलभावाल्या भुरग्यांचे सगले केंस ताकाच लागून गळून पडून ते खड्डे जाल्यात काय कितें?” अशें तिका विचारचेंशें दिसलें, पूण ती म्हज्या ‘खड्डेयुक्त’ सोयऱ्यांची वळेरीच वाचतली म्हणून ओगी रावलों आनी च्याचो घोंट मारलो.
“खरें सांगूं तुमकां, म्हाकाय ल्हानपणांत तशीच संवय आसली. तकलेर कसलोय ताण आयलो की हांव कपलार हात दवरून विचार करतालें. एक दीस आज्यान म्हाका तापोवन काडलें आनी कपलार हात दवरनात. केंस बेगीन धवे जातात आनी गळून पडटात अशें सांगलें. तेन्नाच्यान केदोय प्रसंग येवूं, कपलार हात दवरून विचार करप हांवें सोडून दिलें. तुमीय तशेंच करात. खंयचेच परिस्थितींत कपलार हात दवरिनाकात आनी केंसाक गळून पडूंक दिवुंनाकात. तुमी खड्डे जावन तुमकां पळोवन ‘हो पळय आंतरराष्ट्रीय विमानतळ आयलो’ अशें कोणेय म्हणिल्लें म्हाका सोंसचें ना.” माथ्यार आशिल्ल्या कांय काळ्या केंसां कडेन खेळत तिणें म्हणलें.
“ना गो, आयच्यान हांव कपलार हात दवरून विचार करप सोडून दितलों.” हांवें च्या सोंपोवन म्हणलें.
“देट्स लायक अ गूड हजबण्ड.” म्हजे फाटीर हात भोंवडायत तिणें अपुरबायेन म्हणलें.
“तूं मुगो एक काम कर. कपलार हात दवरल्यार माथ्या वयले केंस बेगीन पिकतात आनी गळटात हाचें रील करून फेसबूकार घाल. लोकांचे केंस काळेच उरतले आनी लोक तुजें बरें मागतले.” हांवें तिका फुलोवपा खातीर म्हणलें.
“म्हाका लोकांचें कित्याक पडलां? तांचे केंस धवे जावूं नाजाल्यार गळून पडूं. तुमकां सांगतां, आयज कोणाचें कोणाकूच पडूंक ना. बरें तें केंस पुराण आसूं, तुमी आयज कपलार हात धरूनशे कित्याक बशिल्ले? तुमकां अशे बशिल्ले हांवें केन्नाच पळोवंक ना म्हणून विचारलें.” तिणें म्हणलें.
“आँ, बरी याद जाली पळय. आगो, ‘नवसागर’ पेपराच्या संपादकालो म्हाका मॅसेज आयला. ‘नव्या वर्साचो संकल्प’ हाचेर एक लेख बरय म्हणून. येता त्या वर्सा कसलो संकल्प करचो तोच कळना. म्हणून कपलार हात दवरून विचार करतालों.” हांवें खरें तेंच सांगलें.
“तुमकां आनीक संकल्प कोणे सांगल्यात? दर वर्सा तुमी संकल्प करतात. दोन दीस करतात आनी तिसऱ्या दिसा सोडून दितात. तुमकां याद आसा? जानेवारी 2023 वर्सा सावन सदांच नेमान योगा करतले म्हणून तुमी संकल्प केल्लो. दोन दीस योगा केलो, रामदेवबाबाबा भशेन पोटांत पोट घालें आनी तिसऱ्या दिसा सावन पोट दुखता म्हणून निमित्त घेवन योगा करपाचेंच सोडून दिलें. जानेवारी 2022 वर्सा सावन नेमान अर्दवर फांतोड पावली मारतले म्हणून तुमी संकल्प केल्लो. दोन दीस फांतोडेर उठून फांतोड पावली मारूंक गेले. तिसऱ्या दिसा उजव्या पांयाचें उजवें धोंपर कस्स जालें म्हणून निमित्त घेतलें आनी फांतोड पावली मारप सोडून दिलें. जानेवारी 2021 वर्सा सावन सोरो तो मागीर जावं देशी वा विदेशी उश्टावचे नात म्हणून तुमी संकल्प केल्लो. दोन दीस केलो. तिसऱ्या दिसा भायर सरतना तिस्कार सोरो पियेल्लो पेद्रू तुमकां मेळ्ळो. उलयतां उलयतां ताच्या तोंडांतलो सोऱ्याचो वास तुमकां आयलो आनी तुमकां सोंसूंक नजं जालें. तुमी सोमते रुजारील्या बार्रांत गेले आनी पेग मारून आयले. जानेवारी 2020 वर्सा सावन सिगार ओडचो ना असो तुमी संकल्प केल्लो. दोन दीस वतात थंय आसा, तिसऱ्या दिसा रस्त्यार कोणाचें तरी सिगाराचें थोटूक दिसलें आनी तुमकां सिगार ओडपाची हुकी आयली. दामूल्या पसऱ्यार वचून तुमी सिगार घेतलें आनी ओडलेंच. जानेवारी 2019 वर्सा …..’’
“आगो, आगो, पुरो. तुका बरी याद उरता मुगो. म्हाका जाल्यार कालची आयज याद उरना.”
“हें कांयच न्हय. फाटलीं 25 वर्सां तुमी जितले संकल्प केल्यात आनी सोडल्यात तें हांवें म्हज्या मेंदवांतल्या मेमरी कार्डांत फीड करून दवरल्यात.”
“खरेंच! वालोर तुका. म्हाका जाल्यार काल कितें जालें ताची रोखडीच विसर पडटा. तुज्या मेंदवांतलें मेमरी कार्ड म्हाका दी गो.”
“तें काडूंक मेळना. इनबिल्ट तें.”
“कितले जिबीचें गो तें?”
“फकांडां नाकात. ‘काल कितें जालें तें आयज म्हाका याद उरना’ अशें म्हणून मिरयनाकात. तुमची मेमरी फ्राक म्हणून लोक तुमचो फायदो घेतात. तुमकां फसयतात, फटयतात, नागयतात. मनशाक कांय वर्सांची याद उरुंकूच जाय.”
“तें याद पुराण आसूं, हांव ह्या वर्सा खंयचो संकल्प करूं आनी कितें बरोवं तें मातशें सांग पळोवया. ते म्हज्या लेखाची वाट पळयतले.”
“हांव कितें सांगूं? तुमचे सगले संकल्प करून जाल्यात, सोडुनूय जाल्यात. आँ, तुमच्यांनी 2024 वर्सा सावन एक संकल्प करूं येता.”
“कसलो? बेगीन सांग पळोवया.”
“2024 ह्या नव्या वर्सा सावन आपूण लेख, कविता, कथा, कादंबरी, नाटकुलें, ललित लेख असलें कांयच बरोवचों ना असो संकल्प करात. हरशीं तुमी जें बरयतात तें कोण वाचिनात. हांव सोडल्यार तें कोण वाचता अशें दिसना म्हाका. फाटलीं 25 वर्सां हांव पळयतां. तुमी खूब बरयतात, बरयिल्लें छापुनूय येता. पूण एकल्या सभाग्यान तुमकां फोन करून वा मॅसेज धाडून तुमचो लेख वा कविता वा तुमी जें कितें बरयलां आनी छापून आयलां तें आवडलें अशें म्हणून सांगिल्लें म्हाका तरी याद जायना. तुमच्या लिखाणाच्या कात्रणांच्या फायलींनी आरमारींतलो एक खण भरला. तातूंतल्या कांय कात्रणांनी आपलो रंग लेगीत बदल्ला तरी तुमी तीं कात्रणां काडून उडोवंक तयार नात. उज्यांत घालात तीं कागदां अशें म्हणल्यार तुमकां राग येता. त्या लिखाणाचो उरिल्ल्या आयुश्यांत तुमकां कसलो फायदो तेंच कळना म्हाका.”
“तुका तें कळचेंय ना. ताचें म्हत्वूय कळचें ना. जशें चित्रकाराक आपल्या दरेका चित्राची अपुरबाय आसता आनी तें चित्र कितलेंय पोरणें जालें तरी तो तें वर्साचींवर्सां सांबाळून दवरता तशी लेखकाक आपले दरेके साहित्यकृतीची अपुरबाय आसता. तो छापून आयिल्लें आपलें लिखाण केन्नाच भायर उडयना. वर्साचींवर्सां सांबाळून दवरता.”
“तुमचें सेर्मांव नाका म्हाका. म्हाका तरी दिसता, तुमी 2024 वर्सा सावन आपूण कांयच बरोवचे नात असो संकल्प करचो आनी मातशें घरांत लक्ष घालचें. घरांतली माळी मोडूंक पावल्या. मेस्ताक आपोवन ती सारकी करून घेयात. नळ बंद जाता तेन्ना म्हाका शेजान्नीले बांयचेर वचून उदक हाडचें पडटा. उदकाची टांकी बांदात म्हणून तुमकां कितले फावटीं सांगलें, पूण तुमी कानामनार घेवंकूच तयार नात. आतां आमचो पूत लग्नाच्या वयाचो जालो हाचें धंगण दवरात. ताचें खंयूय जमता जाल्यार पळयात.”
“सगलें जाग्यार घालतां, पूण कांयच बरयनासतना म्हज्यान रावंक जावचें ना गो. हांव मनांत येता तें बरयतां म्हणून म्हाका लोक लेखक म्हणून वळखतात. हांवें बरोवपाचें बंद केलें जाल्यार म्हाका कोण किंमत दिवचों ना. हांव बरयतां, बरोवंक शकतां म्हणून म्हाका खबरांपत्रांतल्यान आमकां कितेंय बरय म्हणून फोन येतात, मॅसेजी येतात. हांवें जर बरोवपाचें बंद केलें तर म्हाका ते कोनशाक काडून उडयतले आनी म्हजें अस्तित्वूच ना नपयत जातलें. तरीपूण तूं म्हणटा म्हणून 2024 वर्सा सावन कांयच बरोवचों ना असो संकल्प करतां.”
“आँ! आतां कशें जालें! आतां बंद करात तें बरोवपाचें आनी हातांत सान्न घेवन घर आनी आंगण मातशें निवळ करात. तुमकां तुमचे आवडीचे मेथयेचे पराठे करतां.” अशें म्हणून ती आनंदान नाचतनाचत रांदचेकुडींत गेली आनी “आगो, म्हजो संकल्प दोन दिसांचोच आसता. 2024 ह्या नव्या वर्साक दोन दीस हांव कांयच बरोवचों ना. तिसऱ्या दिसा सावन मात हांव बरप सुरू करतलों.” अशें मनांतल्यान मनांत म्हणून हांवें लिखणी हातांत घेतली.
अतुल र. पंडित
9623269013
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
