भांगरभूंय | प्रतिनिधी
पोरणें वर्स सोंपता आनी नव्या वर्साची सुरवात जाली काय जाची तुमकां चड याद येता ती म्हळ्यार कॅलेंडराची.
कॅलेंडर म्हळ्यार दर घराचो एक भाग. शाळांनी, ऑफिसांनीय, कंपनीनी, हॉस्पिटल आनी जायते जाग्यांनी कॅलेंडर हें आसताच. नाजाल्यार तारखो, दीस, म्हूर्त आमकां कळटले तरी कशे? तें सगल्यांच्याच जिवाभावाचें, वळखीचें आनी आवडीचें. कोणाक इंग्लिश जाय तर कोणाक मराठी आनी कोंकणी कॅलेंडराचो आस्वाद आमकां घेवंक मेळटा. सण केन्ना, परबो केन्ना, केन्ना फेस्तां, केन्ना कोणाकोणाच्यो जयंती सगलें आमकां कॅलेंडरूच सांगता. कॅलेंडर आमच्या घरातलें एक वांगडी जाका ना वाडचें पडटा ना अपुरबायो करच्यो पडटात. पूण ल्हान भुरग्यांपासून मात्शें सांबाळचें पडटा. नवें बरें करकरीत हाताक सापडल्यार केन्ना टर्र जायत नेम ना. दर जानेवारीन कॅलेंडराचो एक नवो प्रवास सुरू जाता आनी डिसेंबरान तो सोंपता. उपरांत नव्या जोशान परत तें नव्या वर्सा नव्यान कामाक लागता. ताचो जागो खिळ्याक, मरजार वा वंटीक, पूण दर ऐकल्यागेर ताचो राबितो आसताच.
1 जानेवारीक नव्यान हें कॅलेंडर आपल्या जीविताक सुरवात करतां. त्योच तारखो तेच दीस नव्या वर्साची नवी रीत, विकत घे ताका बेगीन कळटलें तुमकां सगलें गणीत. तें आमच्या वांगडा दुःखानूय आसता आनी सुखानूय बी. तें बरो काळ तशेंच वायट काळ पळयता. पिळग्यान पिळग्यो ताचो सांगात आमकां मेळटा. लग्नाचे म्हूर्त आसूं वा मुजीचे वा कोणाक घर बांदपाक जाय, बरो दीस बरो वेळ सगलो तेंच दाखयतां. कोण जल्मल्लो वेळ, कोण गेल्लो तेंच सगल्यांक कळयता. खंयचो दीस खंयचें वर्स, कितले शके कितलें गिराण ,केन्ना वेध ,नक्षत्र खंयचे ,केन्ना आनी कात ताचे कडल्यानं कळपाचें. उमाशेचे आसूं वेध वा आसूं पुनवेचो चंद्रीम, तारखांचो खेळ, चंद्र सुर्या मेळ सगलें दाखोवपाची जापसालदारकी ताची. केन्ना हाडलो गॅस, केन्ना लायटीचें फारीक केलें बिल, प्लंबराचो जावं फोन नंबर वा आसूं केन्ना मोबायलाक रिचार्ज केल्लो दीस सगलो शेणिल्लो चुकिल्लो हिशोब तुमकां हांगां मेळटलो. दुदकराचे आसूं पयशे वा पेपरवाल्याचो हिशोब, गरजेचे फोन नंबर सगळ्यांचो पेज घेवपाची तांक ह्या कॅलेंडराक आसा. नक्षत्राचो मेळ, केन्ना गिराणा सगलें पुता हाका खबर उत्सवांची वळेरी. तांबडे निळे रंगांत रंगिल्ल्यो सुटयो. हाचे वयल्यान आनी एक गजाल याद जाली. नवें कॅलेंडर हातान पडटकच नव्या वर्साचो नियाळ एकदां कॅलेंडर वाचून कांय जाण घेतात. हां ह्या वर्सा हळदीकुकमाक कितले दीस मेळटले काय? घरच्याचें वाडदिसा सोमारा आयल्या काय बिरेस्तारा? कामाक वचपी लोक सुटयांचो हिशोब घेवन बसतात. देवा अंदूं चवथ आयतारा आयल्या? म्हजी एक सुटी गेली. आमची जात्रा केन्ना आयल्या तर? कांय लोकांक भविष्य पळोवपाचें पिशें. खंयच्या म्हयन्यांत कितें घडटलें काय तें पयलींच जाणून घेवपाची उमळशीक कांय जाणामदीं दिसून येता. अशे वेगवेगळे प्रस्न कॅलेंडराक हातान पयल्याच खेपे घेतले कांय पडटात.
ह्या कॅलेंडराचीं तरेकवार रुपां आमकां पळोवपाक मेळटात. देवळांचीं उत्सवांचीं आपलीं कॅलेंडरा, कांय शाळा आपलें कॅलेंडर काडटात, बँकांचीं आपलीं कॅलेंडरा, कांय संस्था आपलें कॅलेंडर काडटात आनी जायत्या तरेची कॅलेंडरां पळोवपाक मेळटात. रंग नवो कागद जरी नवें आसलें तरी काम ताचें तेंच. जेन्नाच्यान तें आसा तें तेंच काम करीत आयलां आनी ह्या फुडेंय करतलें. नवें वर्स कितें घेवन येतलें हाची उमळशीक दर ऐकल्याक आसता. सगलें बरें कितें तें मेळू हीच आस्त. अंदूंचें कॅलेंडर आनी येणारें वर्स सगल्याच्यो इत्सा पुराय करूं हेंच मागणें.
शिल्पा लाड
8411007204
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
