भांगरभूंय | प्रतिनिधी
2923 लोकांक आनी 92519 जनावरांक मरण, 80563 घरांचे लुकसाण
नवी दिल्ली, खबरां संस्था ः सेंटर फॉर सायन्स अँड एन्वरायमेंटच्या (सीएसई) सर्वेक्षणा प्रमाण भारताक वेगवेगळ्या सैमीक संकश्टांक लागून व्हड लुकसाण जालां. सीएसईन दिल्ले म्हायती प्रमाण अंदूं एल निनोक लागून मोसमी पावस उसरां सक्रिय जाल्ल्यान, व्हड पावस, हुंवार, गारांचें वादळ, भुंयकांप आदी सैमीक संकश्टांक तोंड दिवचें पडलें. ह्या सैमीक संकश्टांक लागून वर्सभरांत देशांत 2923 लोकांक मरण आयलां. हुंवार, व्हड पावस, नेटाचो उदकाचो प्रवाह हाका लागून देशांतली 18.4 हेक्टर सुपीक जमीन आनी पिकांक लुकसाण जालां. हुंवार, दुकळाची परिस्थिती आनी भुंयकांपाक लागून 92,519 जनावरांक मरण आयलां, जाल्यार देशभरांत 80,563 घरांचें लुकसाण जालां.
मध्य प्रदेशाक सैमीक संकश्टांचो खूब त्रास जालो. बिहाराक सगळ्यांत चड लोकांक मरण आयलें. जून ते सप्टेंबर ह्या काळांत बिहारांत 642 जाणांक मरण आयलां. ह्याच काळांत हिमाचल प्रदेशांत 365 आनी उत्तर प्रदेशांत 341 जाणांक मरण आयलां.
ह्या सैमीक संकश्टांचो सगळ्यांत चड परिणाम गरीब लोक, शेतकारांक जालो.
14 देशांक धक्को…
क्रिस्तांव एड हे संस्थेन काउंटिंग द कॉस्ट 2023 ए ईयर ऑफ क्लायमेट ब्रेकडावन असो अहवाल जाहीर केला. ह्या अहवालांत 2023 वर्सा संवसारांत 20 व्हड सैमीक संकश्टांक तोंड दिवचें पडलां अशें म्हणलां. व्हड पावस, हुंवार, दुकळ, वादळ आनी रानांतल्या उज्याचो सगळ्यांत चड परिणाम 14 देशांचेर जालो. तातूंत अमेरिकेतल्या हवाई रानांत लागिल्लो उजो, गुआम, वानुअतु, न्यूझीलंडांत जाल्ली वादळां, न्यूझीलंड, इटली, लिबिया, पेरू, चिली आनी हैती देशांत आयल्लो हुंवार आनी स्पेनांत जाल्लो दुकळ हांचो आस्पाव जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
