काणी काणी कोतवा – 9

भांगरभूंय | प्रतिनिधी

नव्या वर्साचो संकल्प

गजाल ही खूब आदली. एका ल्हानश्या गांवांत एक कुटूंब रावतालें. त्या कुटुंबांत सगळ्यांत बुदवंत एकलो १० पिरायेचो चलो आसलो. ताचें नांव जॅरी. जॅरी खूब मेहनती आशिल्लो. दर नव्या वर्सा तो आपलें लक्ष्य पुराय करपाचो निर्णय घेतालो. ताका लागून तो सदांच नव्या वर्साची वाट पळयतालो.

नवें वर्स येतांच जॅरीन आपल्या इश्टांक आपलें आनी तांकां आपल्या नव्या संकल्पा विशीं सांगलें. आपणें आनी आपल्या इश्टांनी ह्या नव्या वर्सा बरीं कामां करचीं आनी सगळे कडेन खुशालकाय वाटची अशें जॅरीक दिसतालें.
जॅरी भितर एक खाशेली संवय आशिल्ली आनी ती म्हळ्यार तो आपल्या इश्टांक जाता तितली मजत करतालो. जॅरीक खबर आशिल्लें, खोस वाटल्यार ती दुपेटीन वाडत वता म्हणून.

एक दीस जॅरीच्या गांवांत एक मनीस आयलो. ताचे सयत ताचीं भुरगीं आशिल्लीं. त्या जाण्टेल्यान गांवच्या सगळ्यांक आपल्या भुरग्यां वांगडा खेळपाक सांगलें. तांणी जॅरीकूय आपयलो. परत वतना त्या जाण्टेल्यान सगळ्यांचीं बॅगां खेळण्यांनी आनी खाणांनी भरलीं. ह्या कामांत त्या जाण्ट्याक जॅरीन मजत केली. जॅरीन तेन्ना पळयलें, जेन्ना तीं बॅगां ताच्या इश्टांनी घेतलीं तेन्ना तांची खोस दुपेटीन वाडली. तेन्ना जॅरीन विचार केलो, आतां ह्यान फुडें आपूण सगळ्यांची मजत करतलों आनी सगळ्यांच्या तोंडार खोस हाडपाचो यत्न करतलो, म्हणून.

तांणी आपल्या इश्टांक आपयले आनी ह्या नव्या वर्सा आपणें कितें संकल्प केला हें सांगलें. ताच्या इश्टांनीय ताका साथ दिली. दर दिसा एकल्याच्या तरी मुखामळार हांसो हाडपाचो जॅरी आनी ताचे इश्ट यत्न करपाक लागले. ते सगळ्यांची मजत करपाक लागले, दुखी दिसपी लोकांच्या मुखामळार हांसो हाडपाचो यत्न करपाक लागले. हें सगळें करतना तांकां स्वताय खूब खोस भोगताली. सगळ्यांक खोशी दवरप हो जॅरी आनी ताच्या इश्टांचो वर्सां वर्साचो संकल्प आशिल्लो.

देख: दुसर्‍यांक खोस दिवपाचो यत्न करचो. ताचे बदला तुमचेय आनी तांचेय जिणेंत दुपेटीन खुशालकाय येतली.

सगळ्यांक नव्या वर्साचीं उर्बेभरीत परबीं!