भांगरभूंय | प्रतिनिधी
नवी दिल्ली, खबरां संस्था ः चंद्राचेर भारताच्या येसस्वी चांद्रयान- ३ मोहिमेचो खर्च सुमार ६०० कोटी रुपया आसा. हाचेर तुमचो विस्वास बसतलो? नरेंद्र मोदी सरकारान रद्दीच्यो फायली, पिड्ड्यार जाल्लीं कार्यालयीन उपकरणां आनी आदलीं वाहनां विकून अशा दोन मोहिमांच्या खर्चा इतले पयशे उबे केल्यात. ऑक्टोबर २०२१ सावन भंगार विकून सुमार १,१६३ कोटी रुपया जोडल्यात. अंदूं ऑक्टोबर ह्या एकाच म्हयन्यांत सुमार ५५७ कोटी रुपयांचें उत्पन्न मेळ्ळें.
ऑक्टोबर २०२१ सावन केंद्र सरकाराच्या कार्यालयांनी वट्ट ९६ लाख फायली काडल्यात. ह्यो फायली कम्प्युटराचेर अपलोड केल्यात. हातूंत आनीक एक फायदो जाला आनी तो म्हळ्यार सरकारी कार्यालयांतलो सुमार ३५५ लाख चौरस फूट जागो रिकामी जाला. ताका लागून कार्यालयांतल्या कॉरिडॉराची नितळसाण, मेकळी सुवात, मनोरंजन केंद्रां आनी हेर उपेगी गजाली वापरप शक्य जालां.
अंतराळ राज्यमंत्री जितेंद्र सिंह हांणी ह्या वर्साचे सुरवातेक सांगलें, रशियन चंद्र मोहिमेचो खर्च सुमार १६,००० कोटी रुपया आशिल्लो. आमच्या चांद्रयान- ३ मोहिमेची किंमत सुमार ६०० कोटी रुपया आशिल्ली. चंद्र आनी अंतराळ मोहिमेचेर आधारीत हॉलिवूड चित्रपटांची किंमत ६०० कोटी परस चड आसा. भंगाराचे विक्रेंतल्यान मेळिल्ल्या १,१६३ कोटी रुपयांच्या महसुलाचो आंकडो नितळसाणे विशीं सरकारी कार्यावळ कितली व्हड आनी म्हत्वाची हें कळटा. प्रशासकीय सुधारणा आनी भौशीक कागाळ विभागान हे मोहिमेचें नेतृत्व केलें.
चडांत चड महसूल कोणे मेळयलो?
भंगार विकून सरकारान ह्या वर्सा जोडिल्ल्या ५५६ कोटी रुपयां मदल्या एकट्या रेल्वे मंत्रालयाक सुमार २२५ कोटी रुपया मेळ्ळ्यात. हेर मुखेल जोडपी विभागांनी संरक्षण मंत्रालयाचे १६८ कोटी रुपया, पेट्रोलियम आनी सैमीक वायू मंत्रालय ५६ कोटी रुपया आनी कोळसो मंत्रालय ३४ कोटी रुपये अशे आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
