भांगरभूंय | प्रतिनिधी
नवी दिल्ली, खबरां संस्था: केंद्र सरकारान तीन नवे फौजदारी कायदे हाडल्यात. ह्या नव्या कायद्यांक लागून आतां गुन्यांवाच्या कलमांत बदल जाला. भारतीय न्याय (दुसरी) संहिता २०२३, नागरीक सुरक्षा (दुसरी) संहिता २०२३, भारतीय साक्ष संहिता २०२३ (दुसरी) हे तीन नवे कायदे राष्ट्रपतींचे मंजुरी उपरांत कायद्यांत रूपांतर जाल्यात.
नवे बदलूय जाल्यात
भारतीय दंड संहितेंत ५११ कलमां आशिल्लीं. पूण आतां भारतीय दंड न्याय संहितेंत फकत ३५८ कलमां उरल्यांत. दंड प्रक्रिया संहिता म्हळ्यार सीआरपीसीची जागा आतां भारतीय नागरीक सुरक्षा संहितेन घेतल्या. सीआरपीसीच्या ४८४ कलमांच्या बदल्यां मदीं भारतीय नागरीक सुरक्षा संहितेंत ५३१ कलमां आसात. खुना खातीर ३०२ कलम सांगताले. पूण आतां ३०२ च्या जाग्यार १०१ हें कलम आसा. तशेंच कोणाक फटयल्यार ताका ४२० कलम म्हणटाले. मात हातूंतय बदल जाला. आता फटींगपणा खातीर ३१६ हें कलम आसा. जमावबंदी खातीर आशिल्लें कलम १४४ त बदल जाला. हाका आतां १८९ हें कलम लागू जातलें.
ह्या म्हत्वाच्या गुन्यांवाच्या कलमांनी जाला बदल
गुन्हा आयपीसी भारतीय न्याय संहिता
देशद्रोह कलम १२४ कलम १५२
जमावबंदी कलम १४४ कलम १८९
खून कलम ३०२ कलम १०१
खुनाचो यत्न कलम ३०७ कलम १०९
वायट कर्मां कलम ३७६ कलम ६३
मानहानी कलम ३९९ कलम ३५६
फटोवपाचें कलम ४२० कलम ३१६
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
